Jesaja 7 - O Debleskro Lab 2024 (Sinte-Manouche)

Laba pral o tsiro, hoy vella

¹ Oun i kourepen vas an ko tsiro, har o baro ray pral o them Youda o Ahas his, koleskro dad o Yotam his, oun koleskro dad o Usiya his. O baro ray pral Syria, o Rezin, oun o baro ray pral Israel, o Peka, koleskro dad o Remalya his, van pash o foro Yerusalem, te kourenn le pen o foreha. Yon nay lan les gar dren.

² Oun har o baro rayeske pral Youda penlo vas, kay čivan i Syrarya pengre plarhtene khera pre an o Efrayimeskro them, kote trissas lo i trashatar. Oun ninna i tsele menshe an Youda trissan yaake har i rouka an i vesha trissenn, te phourdell i zorelo dourho.

³ Oun o baro Devel penas ap o Yesaya: Dja vin, dja pash o Ahas, tou oun tiro čavo Shear-Yashoub. Tou hatseh les kote, kay o panyeskro drom gar doureder djal, pash ko pralstouno pani, ap ko drom pash koy platsa, kay kolla boudrenn, kay plarhte krenna.

⁴ Oun pen ap leste: “De yak! Ač pokones! Ab zorelo oun ma traash glan kol douyende, o Rezin, ko Syrari, oun o Peka, koleskro dad o Remalya hi. Ninna te hi le rhoyedo, hi le či vavar har tele rhačedo kasht, kay gomme yagakro dourho pre djal.

⁵ Hi čačo, i Syrarya oun i Efrayimarya khetne lengro baro rayeha, o Peka, lan penge čilačepen glan khatar toute oun penan:

⁶ Mer kamah pral te djal an o them Youda, oun i menshenge koy daar te krell, oun lengro them dren te lell. Oun o Tabealeskro čaves čivah pral lende, te vell lo lengro baro ray.

⁷ Kava penell o baro Devel, maro ray: Kova vell gar yaake oun djal lenge gar!

^8-9 O foro Damaskus hi o shero o themestar Syria, oun o Rezin hi o baro ray kokres pral Damaskus. Oun o foro Samaria hi o shero o themestar Efrayim, oun o Peka hi o baro ray kokres pral Samaria. Oun an 65 (shob-deesh-te-panč) bersha dell bouder kek them Efrayim. Oun te patsenn t'mer kava gar, palle ačenn t'mer gar!”

O lab Immanuel kharell o Devel hi pash mende

¹⁰ Oun o baro Devel rakras pale ap o Ahas oun penas:

¹¹ “Mange mandar, tiro baro Deblestar, i sikepen! Mouk man te krap čomone an o moulengro them oder an o bolepen, hoy tout sikrell, te vell kova yaake har penom!”

¹² O Ahas penas: “Me kamau gar te mangap o baro Deblestar, te krell lo čomone, te sikrell lo, kay lo ap mari rig hi.”

¹³ Kote pre penas o Yesaya: “Shounenn, t'mer, kay venna o Davideskre čavendar! Hi t'menge gar doha, te krenn menshen khino? Krenn kanna ninna miro Debles khino?

¹⁴ Doleske dell o baro Devel kanna kokres i sikepen, te sikrell lo, kay hi lo ap t'mari rig: I terni čay vell vavarčandes oun lell i morsh čaves. Oun koles dell li o lab Immanuel.

¹⁵ Khil oun gvin rhal lo, bis te djinell lo, hoy čilačo oun hoy lačo hi.

¹⁶ Glan te vas ko tsiro, kay djinell lo kova, vell ko them mouklo čiddo, glan koleskre douy bare rayende tout savi bari daar hi.

¹⁷ Oun pral toute oun tire menshende oun i menshende an tiro them anell o baro Devel save divessa, har yon gar van, yaake rah har dran o them Israel douy themma van: o Israel oun o Youda. Kol divessa venna o baro rayeha pral o them Assour.”

¹⁸ An ko tsiro phourdell o baro Devel an i tikni phourdepaskri: Oun lourde venna dran o them Egiptia har matsille, oun dran o them Assour har bine.

¹⁹ Oun yon lauter beshenn pen ap hake platse – an i telstouni tala oun mank i bare barra, an i bourra oun ap o zenlepen.

²⁰ An ko tsiro bičrell o Devel o baro rayes dran o them Assour. I vavar rigyatar o panyestar Eufrat kharell lo les kay, te vell lo har i čouri, hoy činell t'mare balla tele ap o shero oun ap i herya. Oun ninna i čora činell lo tele.

²¹ An ko tsiro hi yek morshes yek terni groumni oun douy bakre.

²² Kolla denn yaake boud thoud, te vell i tseli familya khil te rhal. Koon an ko tsiro pral ačas an o them, rhal khil oun gvin.

²³ Oun an ko tsiro vell yaake: Kote, kay kanna i seri drakengre rouka tardo hi, hoy khetne yek zero roupene beme moldo hi, kote hi palle soubyengre bourra oun soubyengro zenlepen tardo.

²⁴ Kote djan le o bogeha oun i faylentsa, te denn le firhen karye. O tselo them hi pherdo soubyengre bourra oun soubyengro zenlepen.

²⁵ Ninna koy phoub, hoy kanna i harhetikri phoub hi, vell yaake pherde soubyengre bourra oun soubyengro zenlepen, te darenn i menshe, te djan le koy. Oun yon tradenn i groumya koy, oun i bakre stakrenn lauter khetne.