Jesaja 65 - O Debleskro Lab 2024 (Sinte-Manouche)

I phagi i kolenge, kay o Debles moukan

¹ O baro Devel penell: Me homs koy, te rodenn le man. Oun yon poučan gar pal mande. Me homs koy, te hatsenn le man. Oun yon rodan man gar. Me penom: Kate hom! Kate hom! ap menshende, kay man gar an-gole dan.

² Me rikrom o tselo dives mire vasta vin kol menshenge, kay kaman gar ap mande te shounell, oun djan i drom, hoy gar mishto hi, oun djivenn pal pengro shero.

³ Kol menshe moukenn gar tele, te krenn le kova, hoy man rhoyrell: Yon anenn firhen i vavar deblenge ap lengre shoukar platse, oun rhačrenn lenge soungepaskro koova ap barra.

⁴ Rati hi le beshdo pash i moulengre khera, te poučenn le i moulen, oun ačenn pral i rat an khatede platse, kay mangenn le vavar deblen an. Yon rhan balengro mass, oun piyenn soummi, hoy mass dren hi kol firhendar, hoy pale-čiddo hi.

⁵ Oun yon penenn i vavarenge: Ač krik touke, ma tape man an! Me taprom ko koova miro deblestar an. Save menshe, penell o baro Devel, nay dikau me gar glan i yaka. Miri rholi pral lende hi har i yag, hoy o tselo dives rhačell.

⁶ Dikenn, kova lauter hi pre činlo an i liil glan mande. Oun me rikrau gar miro mouy, bis te dom len ko tselo čilačepen pale, hakeneske ap peskro shero:

⁷ Ko čilačo koova, hoy yon kran, oun ko čilačo koova, hoy lengre phoure kran, penell o baro Devel. Yon rhačran ap i berge vavar deblenge soungepaskro koova, oun koleha anan le ladj ap mande. Yaake dau me kova ap lengre sherya pale, kova lauter, hoy kran le ninna an i phoure tsirya.

⁸ Kava penell o baro Devel: Yaake har kek harho peskre drake tele dell oun krik vitsrell, kay gomme mool an lende hi, yaake kamau me ninna te krell mire menshentsa, te moukap len gar lauteren te marell. Hi save mank lende, kay mange koy hi.

⁹ O Yakobestar venna pale menshe, oun dran Youda venna save, kay ap mire berge djivenna. Kolen, kay me vin rodom, lenge vell o them, oun mire boudepangre djivenn kote.

¹⁰ Mire menshenge, kay poučenn pal mande, vell i tala Sharon koy platsa, kay anenn le pengre bakre, oun i tala Akor vell koy platsa, kay ačenn pengre groumya.

¹¹ T'menge, kay o baro Debles moukan, vell vavarčandes: T'mer bistran miri berga, kay vau an-mangedo, oun čivan o rhorheno debleske, o Gad, rhapen glan. Oun glan o rhorheno debleste, o Meni, čoran mool vin.

¹² Doleske penau me, t'mer venn moulo dino o rhareha, oun hounte djan ap i čanga, te venn maredo har firhe. Har dom me t'men gole, dan t'men gar glan. Har rakrom t'mentsa, shounan gar, oun kran, hoy djoungeles hi an mire yaka, oun rodan t'menge kova vin, hoy gar kamau.

¹³ Doleske penell o baro Devel, maro ray: An ko tsiro, kay t'mer bokenn, hi mire boudepangren rhapaske. An ko tsiro, kay t'mer troushenn, hi mire boudepangren doha te piyell. An ko tsiro, kay han an i ladj, hi mire boudepangre an i barht.

¹⁴ An ko tsiro, kay denn t'mer gole daryatar, oun rovenn dran i phagedo dji, hi mire boudepangre yaake barhtelo, te givenn le i barhtyatar.

¹⁵ Pash mire vi-rodede menshe hi t'mare laba save laba, kolentsa yon i bibarht pral yekeste vin rakrenn, oun penenn: “O baro Devel maro ray, mou dell tout moulo har kales oun koles.” Lengre boudepangren dell yob i nevo lab.

¹⁶ Palle penenn kolla an o them Youda, kay rakrenn i barht vin pral yekeste: “I barht o čačepaskro Deblestar vell pral toute!” Oun kova, kay dell pes sovel an o them, kova dell pes sovel pash o čačepaskro Debleste. Palle hi bistedo kol phare divessa pherdi bibarht, hoy glan kava tsiro his, oun venn mange bouder gar glan i yaka.

I nevo bolepen oun i nevi phoub vella

¹⁷ Čačepah, me krau i nevo bolepen, oun i nevi phoub. Oun ko phouro bolepen oun koy phouri phoub hi palle bistedo, oun venn bouder gar i menshenge an o shero.

¹⁸ Givenn oun denn gole i barhtyatar hako tsiro pral kova, hoy me krau! Me krau, te vell Yerusalem i barhtelo foro, oun i tsele menshe koy dren givenn i barhtyatar.

¹⁹ Me ninna, vau barhtelo pral Yerusalem, oun miro dji givell pral mire menshende. Ropen vell kote bouder gar shounlo, vitar gar dell yek gole i daryatar.

²⁰ Oun kote dell bouder kek ternepen, kay gar boud divessa phouro vell, oun kek phouro, kay merell glan peskro tsiro. O terneder lendar vell sheel bersh phouro. Oun kova, kay merell oun his kek sheel bersh phouro, kolestar penenn le, te vas pral leste i bibarht vin rakedo.

²¹ Yon čivenn penge khera pre tardo, oun djivenn dren. Oun yon čivenn penge drakengre rouka an i phoub oun rhan lengre drake.

²² Yon čivenn kek kheer pre tardo, oun i vavar djivell palle dren. Oun yon čivenn či an i phoub, oun i vavar rhal les palle. Yaake phouro i rouk vell, yaake phouro venn ninna mire menshe. Oun mire vi-rodede menshe venn i rah tsiro barhteles pral kova, hoy lengre vasta kran.

²³ Yon boudrenn gar čičeske, oun lengre čave venn gar boldo, te merenn le sik. Yon hi menshe, ap kolende o baro Debleskri barht čiddo hi, – ap lende, ninna ap lengre čavende.

²⁴ Oun kava vell yaake: Yon dan gomme gar gole, koy dom man glan, oun yon rakrenn gomme, koy shounau me.

²⁵ O divyo djouklo oun o terno bakro rhan khetne yek pash o vavar. Oun o levo rhal phouss har i groumni, oun o sap hounte rhal čik. Kek krell čomone, hoy douka anell, vitar či, hoy čilačo hi ap miri tseli berga, kay djivau, penell o baro Devel.