Jesaja 62 - O Debleskro Lab 2024 (Sinte-Manouche)O raylo foro Yerusalem 1 Te dikau tout, Yerusalem, nay rikrau gar miro mouy, dran o kamlepen ap toute dau gar pre, bis te lell o foro peskro čačepen, oun leskri barht pre djal har o kham oun diklo vell har i yag an i rati. 2 Palle dikenn i menshe an vavar themma tiro čačepen, oun i tsele bare raya dikenn tiro raylepen. Oun tou veh pash i nevo lab kharedo, kova, hoy o baro Devel tout dell. 3 Oun tou veh har i kouč rayeskri stadi an o baro Debleskro vast, ava, i rayeskro shereskro an tiro Debleskro vast. 4 Tou veh gar bouder kharedo mouklo foro oun tiro them moulo them. Tou veh gole dino o Debleskri pirni, oun tiro them barhteli romni. O baro Devel dikell lačes ap toute, oun romedinerell pes tiro themeha. 5 Yaake har i terno morsh peske i terni čay lell, yaake lenn tire menshe o them Youda penge. Oun yaake barhtelo ko biyabeskro hi pral i terni čay, kolah yob biyab krell, yaake barhtelo hi tiro Devel pral toute. 6 Yerusalem, me čivom morshen ap tire massourya, te denn le yak ap toute. O tselo dives oun i tseli rat denn le bares gole, oun moukenn gar tele, te bistrell tout o baro Devel gar. 7 Yon denn yaake rah gole, bis te yob o foro Yerusalem pale pre tardo čivas, oun bis te yob les yaake kras, te vell o foro ap i tseli phoub sharedo. 8 O baro Devel das pes sovel oun das peskro čačo vast pre, oun hadas peskri zoreli moussi, oun penas, te dell kek tsiro bouder, kay moukell lo kolen tiro djob te rhal, kay kourenn pen touha, oun vitar gar i menshen dran vavar themma tiri mool te piyell, kolake tou yaake phares boudral. 9 Ava, kolla, kay o djob dren anan, kolla rhan les ninna oun sharenn o baro Debles. Oun kolla, kay i drake dren anan, kolla piyenn ninna i mool lendar ap i platse glan miro kheer. 10 Morshale an o foro Yerusalem, djan vin dran o foreskre voudya! Djan vin! Krenn i drom i menshenge, kay khere venn! Krenn o drom čačo! Lenn kol barra krik! Krenn ko drom djoudjo! Hadenn i sikepen pre i menshenge dran vavar themma! 11 Dikenn, o baro Devel moukell kal laba te shounell ap i tseli phoub: Penenn i menshenge an o foro Yerusalem: Kova, kay lell t'men vin dran o čilačepen, hi ap o drom. Kolen yob peske khetne anas, kolla hi pash leste. Ava, kolen yob peske ginas, kolla djan glan leste. 12 Oun yon venn kharedo Debleskre menshe oun vi-ginle o baro Deblestar. Oun tout denn le gole o foro, hoy o Devel kamell oun o foro, hoy bouder gar mouklo hi. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.