Jesaja 59 - O Debleskro Lab 2024 (Sinte-Manouche)

I menshengri doosh hi tardo mank o Debleste oun i menshende

¹ Dik, o baro Debleskri moussi hi lengsto doha, te nay lell lo t'men dran o čilačepen vin! Oun leskre kanda hi gar pandlo, te nay shounell lo gar.

² Na-a, t'mari doosh, hoy ap t'mende lan, hi tardo mank t'mende oun t'maro Debleste. Dran ko čilačepen, hoy kran, khatrell lo peskre yaka t'mendar, oun doleske shounell yob gar.

³ I vavarengro rat kras t'mare vasta ratlo, oun koy doosh, hoy ap t'mende lan, kras t'mare goushte čiklo. T'maro mouy rakrell rhorhepen, oun t'mari čip čilačepen.

⁴ Kekeske t'mendar, kay djal glan o čačepaskro morsheste, djal troul o čačepen. Oun kek, kay anell čomone ap i vavareste pre, penell o čačepen. Pash t'mende hi yaake: Ap kova, hoy či moldo hi, rikrenn t'men, oun rakrenn o rhorhepen. Kova, hoy an t'mare sherya trouyel djal, hi har nay rhorhenn oun doukrenn i vavaren. Ko čilačo koova, hoy vin vell, anell o merepen,

⁵ yaake har tikne čilače sapa, kay dran lengre yare venn, oun har koy netsa, hoy i spinna krell. Kova, kay kol sapengre yare rhala, hounte merell. Te stakrell lo i yaro khetne, vell i sap vin.

⁶ Kova, hoy t'mer vin krenn, hi čičeske, hi gar boudeder moldo har i ripen kerdo dran i netsa, hoy i spinna kras, oun koleha nay čakreh či tele. Kova hoy t'mer krenn, hi rhorhepen. T'mare vastentsa doukenn oun marenn t'mer.

⁷ T'mare herya nashenna pal o čilačepen, oun hi sik, te moukenn le kolen te ratell, kay kek čilačepen kran. Kova, hoy moukenn t'menge an o shero te djal, hi har nay rhorhenn oun doukrenn i vavaren. Ap t'mare dromma ačell phagedo djipen pale.

⁸ T'menge hi či moldo, te djal i vavarenge mishto. Oun o čačepen kamenn gar te krell. Bange dromma djan t'mer. Save menshe perenn an i bibarht.

⁹ Doleske dell men o Devel gar maro čačepen, oun leskro lačepen vell gar ap mende. Hoske bičrell lo menge kek momeli? Lauter, hoy dikah, hi kali rat. Kaana djal menge o kham pre? An o pessester kalepen nashah mer trouyel.

¹⁰ Har korele taprah pal i vanta, har save, kay dikenn gar, kay le djan. Mashkral o dives perah har te vals rati. Mank i saste ham yaake har te vams moule.

¹¹ Har pandle divye firhe dah gole i doukatar, oun rovah har i taube. Mare djia nashenn pal ko dives, kay vell menge o Devel ap i rig, oun lell men vin dran i čilače vasta. Yob vell gar, oun či djala.

¹² Baro Devel, boud kope peram toutar tele. Mari doosh, hoy mer ap mende lam, sikrell har čilačo ham. Ko čilačepen, hoy kram, hi glan mare yaka, oun mer djinah, havo djounglepen ap toute kram:

¹³ Mer phagam maro baro Debleha, djivam har te prindjrams les gar, oun peram lestar tele. Kram i vavaren tiknes maro rakepah, oun phoukram ap lende. Lam men rhorhepen glan oun rakram rhorhepen.

¹⁴ Mer dam i vavaren gar lengro čačepen, oun boud kope rakram gar o čačepen pral lende vin. Ap i parepaskri platsa ginam oun bikram o rhorhepah, oun čačo rakepen hatseh kote gar.

¹⁵ Yaake meras o čačepen, oun ko mensho, kay kamell či o čilačepastar te djinell, vell vin randedo. O baro Devel dikas kova lauter, oun leske his djoungeles, te dell kek čačepen bouder.

¹⁶ Oun bare yakentsa dikell lo, te hi kek morsh koy, kay koy djal, te vell lo kolenge ap i rig, kay tele rikedo hi. Kote vas lo kokres peskri zoryah, oun peskro čačepen vas leske pash o vast.

¹⁷ Oun yaake har rivell i lourdo i sasterno gad an, yaake rivell yob o čačepen an. Oun yaake har i lourdo i sasterni stadi ap peskro shero čivell, yaake čivell yob o kourepaskri barht ap peste. Leskri rholi hi har i plaashka ap leste, te dell lo kolende pengri phagi, kay i vavarenge čilačepen kran.

¹⁸ Kolen dell lo pale pal kova, hoy yon kran. Bari rholyah djal lo ap lende. Ninna kolen dell yob pengri phagi, kay djivenn dour krik vergel o baro pani.

¹⁹ Palle taprell i daar i menshen ap i tseli phoub glan o baro Debleste oun leskro raylepen. Yob vella har i divyo zorelo pani hoy nashella, koles o dourho o baro Deblestar glan peste phourdell.

²⁰ O baro Devel penell: Mire menshenge an o foro Sion vau, te lap len dran o merepen vin. Kolenge dran o kheer Yakob vau, kay moukan pengro čilačo drom.

²¹ Kava krau me lentsa vin, penell o baro Devel: Me čivom miro dourho ap t'mende. Oun mire laba, hoy penom t'menge, ačenn pash t'mende. Oun t'mer penenn len doureder ap t'mare čavende, oun yon ap pengre čavende, oun kolla ap pengre čavende. Kova ačella yaake kanna oun hako tsireske. Kova penau me, o baro Devel,