Jesaja 57 - O Debleskro Lab 2024 (Sinte-Manouche)

Har i lačenge oun i čilačenge djal

¹ O baro Devel penell: Kova, kay an o čačepen tardo his, meras. Oun kek lell kova an peskro dji. Oun kolla, kay rikran ap mande, nashran pengro djipen. Oun halauter krenna, har te vals kova gar lengro koova. Čačepah, ko čačo mensho vas vin lino dran o tselo čilačepen oun bibarht.

² Yob djal kote, kay leske mishto djal. Kek daryah hi kolla an pengre čibya čiddo, kay pengro drom an o čačepen djan.

³ T'mer, kay mangenn rhorhene deblen an, han har dravepangre, har morsha, kay pash vavar djouvyende djan, oun har djouvya, kay loubya hi.

⁴ T'mer san pral mande, oun krenn t'maro mouy bares pre, oun sikrenn mange i čip. T'mer han phoukepangre oun rhorhene!

⁵ Tel hako baro rouk loubrenn t'mer trouyel, te sharenn i rhorhene deblen! Oun an i tala mank i bare barra marenn t'mer lenge t'mare čaven, har te vans le firhe.

⁶ Oun ap kol lače platse an i tala čorenn t'mer lenge rhapen oun pipen vin. Doleske vell ko dives, kay venn kote maredo čiddo! Patsenn čačepah, te dau yekes, kay savo koova krell, kova gar pale?

⁷ Israel, tou kral tiro čiben pral ap i bari berga, oun djal koy pre, te maress firhen kolenge, kay kek devel hi.

⁸ Oun palla ap o voudar oun ap i pesse kashta, hoy ap i rigya o voudarestar hi, kral tiro sikepen. Mandar rissral tout tele, oun čakral tiro čiben vavarenge pre, djal dren oun kral les bourhles, oun moukal tout lendar te playsrell. Tou kamal te djal an o čiben lentsa, oun dikal len pre čakedo oun nango.

⁹ Tou djal lačo djeteha pash o debleste Molok, oun ap toute čival boud kouč djet, hoy mishto soungella. Tou bičral morshen an dour themma, bis an o moulengro them, te anenn le touke vavar deblen.

¹⁰ Kova lauter, hoy kral, kras tout khino. Oun tou penal gar: “Moukau kanna kova.” Na-a, tou hatsal nevi zoor oun hals bouder gar khino.

¹¹ Konestar trashal oun daral tou yaake, te rhorhral man oun bistral man, oun moukal man touke gar an o shero te vell? Hi kova gar yaake: I rah tsiro penom či koy pral. Oun doleske dareh bouder gar mandar.

¹² Kanna sikrau me, hoy kova moldo hi, hoy tou čačo koova khareh. Ko tselo koova, hoy tou kral, hi touke gar mishto.

¹³ Te deh tou palle gole, mou venn yon ap tiri rig – tire tsele rhorhene debla! I phourdepen hadell len lauter krik. I tikno dourho phourdell len trouyel. Kolla, kay rikrenn pen ap mande, lenn o them, te vell lo lengro, oun djivenn ap miri berga, kay an-mangedo vau.

¹⁴ O baro Devel penell: Krenn o drom! Krenn o drom! Krenn mire menshenge o drom! Lenn halauter krik, hoy lenge ap o drom čiddo hi!

¹⁵ Me, o pralstouno, kay hadedo hom, oun hako tsiro djivau, oun kokres o čačo Devel hom, penau: Me djivau an o pralstunepen an miro bolepaskro kheer, oun ninna pash o mensheste, kay i phagedo oun tele-rikedo dji an leste hi, te dap pale zoor koleste, kay tele rikedo hi, oun moukap koles pre te djivell, koleskro dji phagedo hi.

¹⁶ Kamau gar hako tsiro pral i menshende te čingrell oun man rhoyrell. te merenn le gar lauter glan mande, kol menshe, kolen me krom.

¹⁷ Lengri doosh his, te lan le gar doha. Pral kova vom rhoyedo, oun koleske dom me len, khatrom man glan lende oun rhoyrom man. Oun yon djan doureder ap pengro drom oun van gar pale pash mande.

¹⁸ Lengre dromma dikom me, oun doleske krau yaake: Me krau len sasto, sikrau len o drom, oun rakrau lačes lentsa. Oun kolenge, kay rovenn,

¹⁹ čivau i gili an lengro mouy, kolah sharenn le man. Kolenge, kay dour krik hi, ninna kolenge kay gar dour hi, lenge halauterenge mou djal mishto, penell o baro Devel. Me krau len sasto.

²⁰ I čilače hi har i divyo baro pani, hoy rikrell pes nay gar pale, oun vell pale te pale oun hadell khandli phoub oun čik pre.

²¹ Kek lačo koova hi i čilačenge, penell miro Devel.