Jesaja 56 - O Debleskro Lab 2024 (Sinte-Manouche)Menshe dran vavar themma venn ninna Debleskre menshe 1 Kava penell o baro Devel: Djivenn pal mire čačepaskre laba, oun krenn, hoy čačo hi! Sik vell ko dives, kay lau t'men dran o čilačepen vin, oun čivau t'men an o čačepen. 2 Mishto djal ko mensheske, kay djivell yaake, oun rikrell pes zoreles ap mire laba: kova, kay rikrell o Debleskro dives dren oun boudrell gar ap leste; oun kova, kay rikrell peskro vast pale, te krell lo čilačo koova. 3 Oun i vi-themari, kay djal ap o baro Debleskro drom, kova hounte penell gar: O baro Devel čivell man pale peskre menshendar. Oun ko morsh, kay yaake činlo hi ap peskro mass, te lell lo bouder kek čave, hounte penell gar: Me hom i moulo rouk! 4 Leske penell o baro Devel: Te rikreh tou o Debleskro dives dren, oun kameh kova te krell, hoy mange mishto hi, oun rikreh tout ap kol laba, hoy mire menshendar vin krom, 5 palle dau tout i bar an miro kheer, kay tiro lab dren činlo hi. Kova hi feteder har čave oun ča. Kava lab, hoy tout dau, vell an kek tsiro bistedo. 6 Oun kol vi-themarya, kay djan ap o baro Debleskro drom, oun hi leske koy, oun kamenn les pengro tselo djiyeha, oun kamenn leskre boudepangre te vell, hakeno, kay rikrell o Debleskro dives dren oun boudrell gar ap leste, oun rikrell pes ap kol laba, hoy mire menshentsa vin krom, 7 kolen anau pash miri berga, kay me djivau, oun krau len barhteles an miro kheer, kay mangenn man i menshe an. Yon nay anenn mange firhen: save, hoy venn mange rhačedo ap miri rhačepaskri, ninna save, hoy rhan le glan mande. Oun me dikau lačes ap kova. Miro kheer vell kharedo: Kheer, kay i menshe dran hake themma o Debles an-mangenn. 8 O baro Devel, maro ray, kova kay anas i krik-tradede Israelitaryen pale an lengro them, penell: Me anau gomme boudeder khetne pash kolende, kay khetne anlo van. O Israeleskre pralstoune hi či moldo 9 Avenn kay, t'mer lourde dran vavar themma, oun perenn pral mire menshende har divye firhe oun rhan! 10 Kol morsha, kay hounte yak denn ap mire menshende, hi korelo, oun yon halauter hayvenn či, oun hi har djoukle, kay kek gole denn. Yon hi koy čiddo oun dikenn souni, oun kamenn te sovell. 11 Boud rhapen kamenn le, oun lenn gar doha. Yaake hi kolla, kay ap mire menshende yak denn. Yon hayvenn či, hakeno dikell ap peste kokres, oun rodell, har nay anell lo peskre love khetne. 12 Yon denn gole: Avenn kay, me kamau mool te anell, te piyas men mates! Oun taysar krah har kava dives, oun gomme shoukeder! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.