Jesaja 55 - O Debleskro Lab 2024 (Sinte-Manouche)Avenn oun ginenn, ninna te hi t'men kek love 1 Avenn pash o pani, t'mer kolen troush hi! Oun t'mer, kay t'men kek love hi, avenn oun ginenn oun rhan! Avenn oun ginenn kek loventsa oun lenn čičeske mool oun thoud! 2 Hoske denn love koleske, hoy kek maro hi? Hoske denn t'mer kova, hoy t'mer t'mari phari boudjake lan, čomoneske vin, hoy gar čalo krell? Shounenn ap mande, palle vell t'men lačo koova te rhal, oun nay rhan t'men čalo ap i feteder rhapen. 3 Shounenn mishto, hoy penau, oun avenn pash mande! Shounenn ap mande, te ačenn djido! Oun me kamau t'mentsa vin te krell, te ačas mer mala hako tsireske. Ko lačo koova, hoy o Davideske penom, vell ap t'mende. 4 Dikenn, me krom les, te vell lo ray oun pralstouno pral vavar themma, te sikrell yob lende, koon me hom. 5 Ninna t'mer denn menshen pash mande gole, kolen gar prindjrenn. Oun save, kay prindjrenn t'men gar, venn pash t'mende naashedo, te dikenn le, hoy me, t'maro baro Devel, t'menge krom. Me, o čačo Devel pral o Israel, krau t'men baro oun raylo. O Debleskro lačo drom 6 Rodenn o baro Debles yaake rah yob moukell pes te hatsell! Denn les an-gole yaake rah yob gar dour hi! 7 Koon kamas či o Deblestar te djinell, kova te djal kanna peskro čilačo dromestar tele! Oun kova, kay čilačo koova an peskro shero hi, yob te moukell savo koova, oun vell pale pash maro baro Debleste, yaake te krell yob peskro dji leske pre, oun lell leskri doosh krik. 8 O baro Devel penell: Kova, hoy mange an o shero djal, hi gar kova, hoy t'menge an t'mare sherya djal. Oun t'mare dromma hi gar mire dromma. 9 Yaake dour o bolepen pral i phoub hi, yaake dour hi ninna mire dromma pral t'mare dromma, oun kova hoy mange an miro shero djal, hi feteder har kova, hoy t'menge an t'mare sherya djal. 10 O brishin oun o gib perenn tele dran o bolepen, oun djan gar bouder kote pale. Yon krenn i phoub sapeno, te djal latar zenlepen oun djob vin, yaake te vell i menshen maro te rhal, oun djob, hoy nay vitsrenn le an i phoub o vavar bersh. 11 Yaake hi kol laba, hoy dran miro mouy vin djan. Yon venn čačo, oun kova, hoy penom, vell yaake har me kamau. Oun kova, hoy mange glan lom, vell yaake kerdo. 12 T'mer djan barhteles vin an o lačepen, oun kek rikrell t'men pre. I bare oun i tikne berge denn gole i barhtyatar, te dikenn le t'men. Oun i rouka an o veesh denn an pengre vasta. 13 Kote, kay soubyengre bourra oun soubyengro zenlepen bares van, djan kanna bare zenele rouka pre. Doleske vell o baro Debleskro lab sharedo. Oun kova hi ninna i sikepen, te bistrell kek, te his o baro Devel kova, kay sau koova kras. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.