Jesaja 50 - O Debleskro Lab 2024 (Sinte-Manouche)

O Israeleskri doosh hi tardo mank o Debleste oun leskre menshende

¹ Kava penell o baro Devel: Kay hi ko liil, hoy me hounte činoms, kay dren tardo hi, te moukom me t'mari dat? Koon hi kova, pash koleste man siyaan vals oun t'men leske bikroms. Dran t'mari doosh han bikedo. T'mer peran miro dromestar tele. Doleske hi t'mari day mouklo.

² Hoske vom me, oun kek mensho his koy, dom gole, oun kek das pes glan? Hi miri moussi gar lengsto doha, te nay lap t'men gar dran o pandepen vin? Hi an mande kek zoor, te nay lap gar yekes vin dran o vavareskro vast? Dikenn, te čingrau me ap o baro pani, palle vell lo trouk i daryatar, oun lengste panya venn har o moulo them. I mačen an lende hi bouder gar doha pani, oun merenn i troushatar oun khandenn palle.

³ Me rivau o bolepen an kalepen, yaake te hi lo, har hidjrals lo kales yekeske, kay meras.

⁴ O baro Devel, miro ray, das man i čip har i siklen yek hi, te djinap, har te rakrap lačes kolentsa, kay khino hi. Taysarlakro djangrell lo mire kanna pre, te shounap har yek, hoy lestar siklo vell.

⁵ O baro Devel, miro ray, kras mange o kand pre, oun me čivom gar leskro lab ap i rig, oun me djom leske gar dran o drom.

⁶ Me rikrom kolenge miro doumo, kay dan mange dava, oun rikrom mire čamya kolenge koy, kay tserdan balla dran miri čora. Me khatrom gar miro mouy, har praasan le man oun čoungran ap mande.

⁷ O baro Devel, miro ray, hi ap miri rig. Doleske ačom gar vi-ladjedo tardo. Me krom miro mouy har dran bar, oun djinom, me dikau gar čičeske ap leste.

⁸ O Devel hi pash mande oun dell man miro čačepen. Koon kamell mantsa an o čingepen te djal? Mou vell lo, te stakras mer khetne glan o čačepaskro ray! Koon hi kova, kay anell čomone pre ap mande? Kova stakrell glan, te dikap les.

⁹ Dikenn, o baro Devel, miro ray, hi ap miri rig. Koon hi palle, kay penell, te hi man i doosh? Lauter kolla, kay kamenn čomone ap mande pre te anell, perenn khetne har i phouro ripen, hoy an kotya perell, te rhan les i kirme pre.

¹⁰ Kova t'mendar, kay krell, hoy o baro Devel kamell, oun shounell ap leskro boudepaskro, kova nay djinell: Ninna te djivell lo an i kali rat oun dikell kek momeli glan peste, hi lo an o baro Debleskro vast. Oun kova krell leske halauter mishto.

¹¹ T'mer lauter, kay i yag krenn, oun kashta činenn oun an-rhačenn, te denn čourye lentsa, nashenn an t'mari yag! Oun rhačrenn t'men kokres kol kashtentsa, hoy an-rhačan! Kava hi, hoy ap t'mende vell dran o vast o baro Deblestar: An phare douka venn t'mer koy čiddo.