Jesaja 46 - O Debleskro Lab 2024 (Sinte-Manouche)O baro Devel hi vavarčandes har i rhorhene debla 1 O rhorheno devel Bel phagas khetne, oun o rhorheno devel Nebo peras. Lengre figure, hoy t'mer trouyel hidjran, van kanna i firhenge ap lengro doumo pandlo. Yon hounte hidjrenn len oun venn khino tel ko pharo hidjepen. 2 Kal rhorhene debla phagenn khetne oun perenn, oun nay anenn gar pengre figuren vin, oun hounte djan pandles an i vavar them. 3 T'mer dran o kheer Yakob, t'mer, kay pral ačan dran o kheer Israel, shounenn ap mande, t'mer, kolen rikrom yaake rah har ap i phoub han. Ava, yaake rah har boldo van, hidjrom t'men. 4 Ninna te van t'mer phouro, ačau me kova, kay homs; ninna te lan t'mer parne balla, rikrau t'men. Me hom, kay krom t'men. Oun me rikrau t'men, oun hidjrau t'men, oun lau t'men dran o čilačepen vin. 5 Konestar nay penenn t'mer: “Kova hi yaake har o Devel?” Kek hi yaake har me! Ap koneste nay penenn: “Tou oun o baro Devel, t'mer han yek har o vavar?” Kekestar nay penenn kova. 6 Kol menshe, kay krenn pen i rhorheno devel, lenn sonakay dran lengri possita, oun čivenn roup ap i vaga, te playsrenn le koles, kay hayvell mishto te boudrell an sonakay oun roup, te krell lo kolestar i devel lenge. Glan koleste vitsrenn yon pen tele ap i phoub, oun mangenn les an. 7 Yon hadenn les ap pengri phik, oun hidjrenn les trouyel, oun čivenn les pale pale ap leskri platsa. Oun kote hi lo tardo, oun djal foun kokres gar doureder. Dell yek gole ap leste, rakrell lo gar pale, krell peskro mouy gar pre, oun djal gar koy, te lell lo les vin dran i bibarht. 8 Bistrenn kova gar, t'mer, kay peran o Debleskro dromestar tele! Moukenn les an t'maro dji te djal! 9 Moukenn t'menge an o shero te djal, har an o phouro tsiro his: Me hom o Devel, oun dell kek vavar har man. Kek hi yaake har me! 10 An o phouro tsiro penom me glan-vi, hoy vella. Glan rah tsiro rakrom kolestar, hoy gomme gar his. Oun me penau: Kova hoy me mange glan lom, vell yaake. Oun me krau lauter, hoy kamau te krell. 11 Foun kotar, kay o kham pre djal, dau gole i baro čirkleste, kay mass rhal, te vell yob. Kova hi ko morsh, kay krell, hoy mange glan lom. Dran i dour them vell lo. Kova vell yaake, har penom. Hoy mange glan lom, krau ninna. 12 Shounenn ap mande, t'mer, kay barrengre djia an t'mende hi, t'mer, kay patsenn, te vell t'men kek čačepen. 13 Me anau t'menge miro čačepen. Kova hi gar dour t'mendar krik. Sik lau t'men dran i bibarht vin. An o foro Sion krau i menshen barhteles. oun i Israelende sikrau miro raylepen. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.