Jesaja 45 - O Debleskro Lab 2024 (Sinte-Manouche)

¹ Kava penell o baro Devel ap o Cyrus, koles yob vin rodas, te vell lo baro ray: Me taprom tiro čačo vast, te vitsrap vavar themma tel tire herya, oun te lap i rhare lengre bare rayendar krik, te venn voudya pre kerdo glan toute, te ačenn foreskre voudya gar pandlo glan toute.

² Me djau glan toute, oun krau tiro drom čačo. Me dau kol sasterne voudya dren, oun phagau ko saster, hoy rikrell kol voudya pandles.

³ Me dau tout bravlepen, hoy khatedo his, oun kouč koova, hoy mishto čakedo his. Te hayvess tou, te hom me o baro Devel, ko Devel pral o Israel, oun dom tout gole pash tiro lab.

⁴ Me krom tiro lab bares, ninna te prindjral man gar, oun dom tout gole tiro labeha. Kova krom o Yakobeske, kay mange koy hi, ava, o Israeleske, koles mange vin rodom.

⁵ Me hom o baro Devel oun dell kek vavar. Me kokres hom o Devel. Me dom tout bari zoor, ninna te prindjral man gar,

⁶ te hayvenn le ap i tseli phoub, te dell kek vavar devel har man. Me hom o baro Devel. Oun dell kek vavar.

⁷ Me hom kova, kay krell, te vell dives oun rati. Me hom kova, kay dell barht oun bibarht. Me, o baro Devel, krau kova lauter.

⁸ Tou bolepen, de čačepen ap i phoub har brishin! Tou phoub, kre tout pre, oun an lačepen vin! Oun o čačepen mou vell baro ap toute! Me, o baro Devel krom kova lauter.

O Israeleskro pre-phourdepen

⁹ Djungeles djal koleske, kay rhoyedo hi koleha, kay les kras! Yob hi či har i kotar dran i paash dino čaro mank vavar paash dine kotya. Ko čik, dran koleste čare rhačedo venn, nay penell lo ap koleste, kay lestar čomone krell: Hoy kreh tou? Oun ko čaro, hoy lo kras, penell kova nay ap leste: Tou hayveh či!

¹⁰ Djungeles djal koleske, koon ap peskro dadeste penell: Hoske kral tou man? Oun ap i date penell: Hoske anal man ap i phoub?

¹¹ Kava penell o baro Devel, kay kokres o čačo Devel hi. Yob hi o Israeleskro Devel, oun kova, kay les kras: Hounte penap t'menge, hoy mire čaventsa krau? Kamenn mange glan te činell, hoy te krap mire vastentsa?

¹² Me hom kova, kay kras i phoub, oun ko menshes, kay ap late hi, ninna. Mire vastentsa krom o bolepen bourhles, oun kol tsele momlia ap leste penom me, kay le venn.

¹³ Me hom kova, kay moukas o Kiruses pre te stell, te anell lo o čačepen. Oun me kamau lauter krik te lell, hoy leske ap leskro drom čiddo hi. Yob čivell mange ko foro pale pre. Oun mire menshe, kay pandles krik anlo van, kolen moukell yob te djal. Kek dell les love koleske, vitar gar vavar koova. Kova penell o baro Devel, ko ray pral o bolepen oun i phoub.

O raylepen o Deblestar

¹⁴ Kava penell o baro Devel: O bravlepen dran o them Egiptia, oun kova, hoy i menshe dran Etiopia dren lan, vell pash toute, te vell lo tiro. Oun kol bare zorele morsha dran Seba venn tire boudepangre. Pandles shellentsa venn le pash toute, oun vitsrenn pen glan toute ap i phoub, oun penenn: Kokres pash toute hi o Devel, oun dell kek vavar devel.

¹⁵ Čačepah, tou hal i Devel, kay rikrell pes khatedo, tou o Devel pral o Israel, tou leh dran o čilačepen vin!

¹⁶ Yon halauter, kay pen rhorhene deblen kran, hounte venn vi-ladjedo koy tardo, oun hounte venn lolo i ladjatar.

¹⁷ O Israel vell vin lino o baro Deblestar dran o čilačepen hako tsireske. Kek ladj oun kek praasepen vell ap leste – an kek tsiro.

¹⁸ O baro Devel hi o Devel, kay o bolepen kras. Yob hi o Devel, kay i phoub kras oun zoreles pre čivas. Yob kras lat gar yaake, te nay djivell či koy pre. Na-a, yob kras lat yaake, te vell djipen ap late. Yob penell: Me hom o baro Devel, oun dell kek vavar Devel har man!

¹⁹ Me rakrom gar čorrhanes an i khatepen, kay kek shounell, oun penom gar ap o Yakobeskre čavende: Rodenn man čičeske! Me, o baro Devel, rakrau o čačepen, oun penau t'menge, hoy čačo hi.

²⁰ Avenn khetne, t'mer, kay nashan t'menge glan o kourepen dran boud themma! Avenn pash mande, te kras o čačepen vin! Kolla, kay hidjrenn pengre deblen pentsa, hayvan či, yon mangenn deblen an, kay nay venn lenge gar ap i rig.

²¹ Avenn oun sikrenn, te hi t'men čačo. Rakrenn khetne oun krenn vin, hoy kamenn te penell! Koon hi kova, kay moukas glan i rah tsiro te shounell, hoy kanna djal? Koon penas kova glan-vi? Homs me kova gar, o baro Devel? Oun dell kek vavar Devel har man. Me hom i Devel, kay o čačepen penell oun krell. Oun i Devel, kay dran o merepen vin lell, hom me kokres oun kek vavar.

²² T'mer menshe ap i tseli phoub, avenn pash mande! Oun me lau t'men dran o čilačepen vin. Me hom o Devel oun dell kek vavar har man!

²³ Me dom man sovel pash mande kokres, oun hoy penom, hi čačo oun nay vell gar krik lino: Hakeno hounte vitsrell pes glan mande ap i phoub, oun hako mouy dell pes sovel

²⁴ oun penell mandar: “Kokres an o baro Debleste hi čačepen oun zoor.” Kolla, kay čingran ap mande, venna vi-ladjedo glan mande tardo.

²⁵ O baro Devel čivell o tselo Israel an o čačepen. Oun yon venn barhtelo pral kova, hoy me, o baro Devel, krom.