Jesaja 43 - O Debleskro Lab 2024 (Sinte-Manouche)

O Devel hi hako tsiro pash peskre menshende

¹ Kanna penell o baro Devel, kova, kay t'menge, o Yakobeskre čavenge, o djipen das, oun toutar, Israel, i natsyona kras: Ma dare! Me ginom tout vin! Me dom tout pash tiro lab gole, te vess mange.

² Te djah tou an o pani, me hom pash toute, te tassenn tout kol zorele panya gar. Oun te djah tou an i yag, palle rhačell li tout gar, oun nay krell touke či.

³ Me, o baro Devel, hom tiro Devel. Me, o Israeleskro Devel lau tout vin dran o merepen. Me dau lenge o them Egiptia, te ginap tout vin. I themma Etiopia oun Seba dau koy pashel.

⁴ Tou hal mange yaake kouč oun boud moldo, oun kamau tout o tselo djiyestar, te dap menshen touke koy, oun dau themma koy, te nay djivess tou.

⁵ Ma dare! Me hom touha! Me anau kolen, kay toutar hi, khere dran i themma, kay kote hi, kay o kham pre djal, oun kay o kham tele djal.

⁶ Ap i rayende pral i themma, hoy hi serves oun čačes toutar, penau: De kay! Ma rike len pale! Anenn mire čaven oun čen foun doural, anenn len dran i palstoune themma i phoubyatar!

⁷ Halauter te venn khere, kay miro labeha kharedo venn, kolen mange krom, te vell miro lab baro, kolendar i natsyona krom, hoy miro hi.

O Devel sikrell, te hi lo kokres o Devel

⁸ An kay glan mande kol menshen, kay korele hi, ninna te hi len yaka, oun kolen, kay shounenn gar, ninna te hi len kanda!

⁹ I menshe dran i tsele themma van khetne. Kek kolendar penas glan-vi, hoy an o phouro tsiro vas. Kek kolendar penas menge glan-vi, hoy kanna vell. Mou sikrenn le men, koon lendar čomone glan-vi penas, hoy čačepah yaake vas, te shounas mer kova oun nay penah: Kava hi čačo!

¹⁰ O baro Devel penell: Mire menshe, t'mer han kolla, kay djinenn, hoy me krom; oun t'mer han kolla, kay mange vi-rodom, te venn mange koy. Kanna djinenn t'mer oun patsenn oun hayvenn, te hom me o čačo Devel. Glan mande vas kek vavar devel, oun pal mande vell vitar kek vavar devel.

¹¹ Me kokres hom o baro Devel, oun dell kek vavar har me, kay nay lell t'men vin dran o merepen.

¹² Me penom glan-vi, hoy kroms; me lom t'men vin dran o pandepen, yaake har penom. Kek vavar devel mank t'mende kras kova. Kova nay penenn t'mer i vavarenge. Kova penell o baro Devel. Me hom o Devel.

¹³ Oun kova ačau me ninna. Kek hi koy, kay nay lell vin dran miro vast, oun čivell pes mange an o drom.

O Devel anell i Israelitaryen khere

¹⁴ O Israeleskro Devel hi o baro Devel, kay t'men dran o pandepen vin lell, oun penell: T'menge, kay an o them Babilonia han, bičrom yekes koy, te anell lo t'men, kay pandle han, vin. Oun kol Babilonarya, kay kanna i barhteli gole denn, rovenna palle.

¹⁵ Me hom o baro Devel, t'maro Devel, kova, kay dran t'mende i natsyona Israel kras. T'maro baro ray hom me.

¹⁶ Kava penell o baro Devel, kova, kay kras i drom an o baro pani, te nay djan mank zorele panya.

¹⁷ Me hom kova, kay moukom i vourdya oun i graya vin te djal, ninna boud zorele kourepangre. Khetne his le koy čiddo, oun stan bouder gar pre; vin rhačedo hi le har i momeli, hoy bouder gar rhačell.

¹⁸ Bistrenn ko koova, hoy his! Ap kova, hoy pal t'mende hi, denn bouder gar yak!

¹⁹ Dik, me krau nevo koova! Kanna vell kova! Hayvenn oun dikenn les gar? Ava, me krau i drom an o moulo them, oun moukau bare zorele panya te nashell an o tato them.

²⁰ Mire vi-rodede menshenge dau pani an o moulo them, ava, lengste zorele panya an o tato them. Doleske sharenn man i divye firhe, ninna i divye djoukle oun bare divye čirkle.

²¹ Oun mire menshe Israel, kolen mange krom, sharenn man glan i vavarende.

O Devel lell o Israeleskri doosh krik

²² Yakob, kova hal gar tou, kay dal pal mande gole. Israel, tou maral tout gar pal mande tele.

²³ Kol bakre, hoy anal, te venn le rhačedo, his gar mange. Oun kol firhentsa, hoy mange maral, sharal man gar. Me krom touke kek boudi i djobeha, hoy mange rhačrals, oun krom tout gar khino o soungepaskro koveha, hoy mange rhačrals.

²⁴ Mange ginal tou gar lovenge goudlo soungepaskro khass, vitar gar rhačral o firhengro thulepen, te vap čalo. Na-a, mange kral boud boudi tiri doshah. Ko tselo čilačepen, hoy kral, kras man khino.

²⁵ Kova hom me, kay thovau o čilačepen toutar tele. Me kokres hom kova, kay nay krell les. Oun bistrau koy doosh, hoy tou ap toute lal.

²⁶ Pen mange, hoy krom, hoy kamal tou gar! Dikas khetne ap kova, hoy t'mer kran! Rake tou, te dikap, te hal an o čačepen!

²⁷ Tiro phouro dad, kolendar t'mer lauter van, ninna kova las doosh ap peste, oun tire rakepangre phagan mantsa.

²⁸ Doleske čivom tire rashayen pale. Oun moukom menshen dran vavar themma pral toute vell, te vess paash dino, Yakob. Oun krom, te van t'mer Israelitarya praasedo.