Jesaja 42 - O Debleskro Lab 2024 (Sinte-Manouche)

O baro Debleskro boudepaskro

¹ O baro Devel penell: Ake, miro boudepaskro; les hi miro vast. Me rikrau les, oun rodom les mange vin, oun hom barhtelo pral leste. Miro dourho čivom ap leste, te anell lo miro čačepen pash i menshende an i tsele themma.

² Yob dell gar gole, oun krell kek bare laba, oun leskro rakepen vell gar shounlo an i dromma.

³ I an-phagedo shilftikro khass, phagell lo gar tele, oun i momeli hoy gomme i tikni yagah rhačell, koya krell lo gar vin. Čačepah, yob krell, te lell hakeno peskro čačepen.

⁴ Leske kokres djal gar i zoor krik, oun yob phagell vitar gar khetne, bis te kras lo, te djivenn i menshe ap i tseli phoub pal o čačepen. Oun i menshe an dour themma dikenn ap leste, te sikrell lo len peskro drom.

⁵ O baro Devel hi maro ray, kova, kay o bolepen kras, oun har i plarhta bourhles kras. Ninna i phoub kras lo, oun lauter hoy li vin anell. Oun i menshen ap late dell lo o dourho, oun djipen kolende, kay ap late djivenn. Yob penell:

⁶ Me, o baro Devel, dom tout gole, te aness o čačepen pash i menshende. Me taprom tout pash tiro vast. Oun me dau yak ap toute. Tou vess o rakepaskro, kay krell i menshentsa vin, te vap lengro Devel; oun vess i menshenge an i tsele themma i momeli, hoy sikrell len o drom pash mande.

⁷ Tou kress i korelenge i yaka pre, oun less i pandlen vin dran o stilepen, kay hi le beshdo an i kali rat.

⁸ Me hom o baro Devel, kova hi miro lab. Oun ko raylepen, hoy mange hi, dau me kek vavares, vitar gar dau i rhorhene deblen ko sharepen, hoy mange hi.

⁹ Kova, hoy glan i rah tsiro penom, kova vas. Kanna penau nevo koova glan-vi. Glan o tsiro, kay kova vella, moukau me les t'men te shounell.

I sharepaskri gili o Debleske

¹⁰ Givenn o baro Debleske i nevi gili! Sharenn les ap i tseli phoub bis an i palstoune themma! Sharenn les, t'mer, kay ap o baro pani oulerenn, oun t'mer lauter, kay an o baro pani djivenn! Ninna t'mer, kay an o panyeskre themma djivenn, sharenn les!

¹¹ Givenn i bari golyah, t'mer an i forya an i moule tate themma, oun t'mer menshe dran Kedar, kay an i gaba djivenn! Givenn bari golyah, t'mer, kay an o foro Sela djivenn! Denn gole i barhtyatar, t'mer, kay pral ap i berge djivenn!

¹² T'mer lauter, sharenn o baro Debles! Oun kolenge an i panyeskre themma penenn, har baro yob hi!

¹³ O baro Devel djal vin an o kourepen har i zorelo morsh; oun kourell pes har i kourepaskro, koleskro dji pherdo hi, te djal lo an o marepen. Zoreles dell lo o kourepaskri gole, oun kek daryah djal lo vin ap kolende, kay kourenn pen leha.

O baro Devel vell ap i rig peskre menshenge

¹⁴ Yob penell: I rah tsiro penom či, ačom pokones, oun rikrom man pale. Kanna kamau gole te dell, har i djouvel, kay i ternepen lell, lau pharo dourho oun dau palle bari gole.

¹⁵ Dran i tsele bare oun tikne berge krau i moulo them. Lengro zenlepen vell djelto. Kote, kay panya nashenn, vell i trouk them, oun i sapeni phoub vell trouk.

¹⁶ Mire menshen, kay hi har korele, sikrau i drom, kolestar yon či djinenn. Oun anau len ap dromma, kolendar yon či shounan. Yon djivenn har an kali rat, oun me lau o tamlepen glan lende krik. Oun kol barra, hoy ap lengro drom čiddo hi, lau krik. Kava krau lenge, oun moukau len gar.

¹⁷ Kolla, kay rikrenn pen ap i rhorhene debla, oun penenn ap kolende, hoy i menshengre vastentsa kerdo van: T'mer han mare debla, kolla venn pale-čiddo oun hounte ladjenn pen.

I Israelitarya kamenn gar te shounell oun te dikell

¹⁸ O baro Devel penell: Shounenn, t'mer, kay shounenn nay gar! Oun t'mer korele, dikenn oun hayvenn!

¹⁹ Kek hi yaake korelo har tou, miro boudepaskro Israel, kek yaake kashteno har tou, miro bičepaskro, oun kek yaake korelo har tou, miro vi-rodedo boudepaskro, kay mange koy hounte vals.

²⁰ Ninna te dikan t'mer boud koova, lan les gar an o dji. Ninna te his t'mare kanda pre, shounan gar.

²¹ O baro Devel hi o čačepaskro. Doleske his leske shoukar, te sikrell lo, har baro oun raylo leskre čačepaskre laba hi.

²² Hoy vas dran leskre menshende? Lengro them hi vi-čoredo oun vi-randedo. Yon halauter hi tapedo, oun pandlo an o stilepen. Randedo hi le, oun kek hi koy, kay lell len vin dran o pandepen. Čoredo hi le, oun kek hi koy, kay penell: De pale kay!

²³ Koon t'mendar kamell kava peskre kandentsa te shounell? Koon kamell koy pre yak te dell an ko tsiro, hoy vella?

²⁴ Koon his kova, kay moukas o Yakobes vin te randell, oun das o Israeles i čorepangren an i vasta? His kova gar o baro Devel? Yob hi, koleske o doumo sikram oun leskro drom gar djam, oun ap leskre laba gar shounam.

²⁵ Kote moukas lo peskri bari rholi pral mende te vell, oun moukas men an i zorelo kourepen te vell. Leskri rholi his troul mende trouyel har i yag, oun mer hayvam kova gar. Ninna har rhačras men leskri rholi, lam kova gar an mare djia.