Jesaja 38 - O Debleskro Lab 2024 (Sinte-Manouche)

O Hiskiya vell nasselo oun pale sasto

¹ An kol divessa vas i merepaskro nasslepen pral o Hiskiya. Oun o Debleskro rakepaskro, o Yesaya, koleskro dad o Amoz his, vas pash leste oun penas ap leste: “Kava penell o baro Devel: Tou veh gar sasto kava nasslepastar, oun hounte meress. Doleske pen tire menshenge, har te djal pal tiro merepen doureder!”

² O Hiskiya rissras pes o mouyeha ap i massouri, oun mangas o baro Debles oun penas:

³ “Ah, baro Devel, mangau tout, biste gar, kay djivom glan toute an o čačepen oun i djoudjo djiyeha oun krom, hoy mishto hi glan tire yaka.” Oun o Hiskiya rovas i baro ropen glan leste.

⁴ Kote penas o baro Devel ap o Yesaya:

⁵ Dja pash o Hiskiya, oun pen leske: “Kava penell o baro Devel, ko Devel tiro dadestar, o Davidestar: Me shounom tiro mangepen, oun me dikom tire sva. Shoun, me kamau pash tiro djipen gomme 15 (deesh-te-panč) bersha pashel te čivell.

⁶ Oun kamau tout oun kava foro vin te lell dran o vast o baro rayestar pral o them Assour. Oun me rikrau mire vasta pral kava foro.

⁷ Kova hi touke ko sikepen o baro Deblestar, te djiness, kay o baro Devel kova rikrella, hoy lo penas.

⁸ Dik ap i khameskri kambana, hoy moukas o Ahas te krell. O baro Devel moukell i kambana deesh kotya pale te djal.” Oun yaake kras les o kham ninna, oun i kambana djas deesh kotya pale pale.

⁹ Kava hi koy gili, hoy kras o Hiskiya, ko baro ray pral o them Youda, har yob nasselo his oun pale sasto vas:

¹⁰ Me penom mange: Mashkral an miro djipen hounte merap oun pash i moulende hounte djap. I bersha, hoy mange hounte vans, van mange randedo!

¹¹ Me dikau o baro Debles gar bouder kate an o them, kay i djide hi. Oun kote, kay hi kek djipen bouder, dikau kek vavar menshen bouder.

¹² Tele phagedo hi miro djipen, har o plarhteno kheer i bakrengro morshestar, kay doureder djal. Tele činlo hi miro djipen har i thab dran i kotar than. Dives oun rati moukeh tou man te hayvell, te hi mantsa trouyel.

¹³ I tseli rati rovau i doukatar, hoy yaake hi, har te phagals i levo mire kokale. Dives oun rati moukeh tou man te hayvell, te hi mantsa trouyel.

¹⁴ An miri gole hi kek zoor. Har i čirklengri gole shounell pes miri gole an, oun har te rovals i tauba. Mire yaka hi khino, yaake rah dikom ap toute pre. Miro ray, hom an o merepen! Ab tou ap miri rig!

¹⁵ Hoy penap pal kova gomme: Yob kras, hoy lo mange penas Me nay sovau bouder gar. Miro tselo djipen vas mange shoutlo.

¹⁶ Ray, dran tire laba djivenn i menshe. Oun dran lende djivau me ninna. Kre tou man sasto! Oun rike man djido!

¹⁷ Dik, kova his mange mishto, te vom nasselo: An tiro kamlepen tserdal tou miro djipen vin dran o merepen. I tseli doosh, hoy me ap mande anom, vitsral tou pal tiro doumo.

¹⁸ An o moulengro them sharenn le tout gar. I moule nay givenn touke kek gilya. Oun kolla kay paskedo hi, nay dikenn bouder gar, te rikreh tou tiro lab.

¹⁹ Kolla, kay djivenn, ava, i djide hi kolla, kay sharenn tout, yaake har me sharau tout kava dives. I dada penenn pengre čavenge, kay tou tiro lab rikreh.

²⁰ O baro Devel his kova, kay las man vin dran o merepen. Oun mer kamah leske te bashrell ap i doryengre bashepangre an o baro Debleskro kheer hako dives yaake rah mer djivah.

²¹ Oun o Yesaya penas, te lenn le i merkli, hoy dran fayge kerdo vas, oun čivenn lat ap ko doukepen pre, te vell lo pale sasto.

²² Oun o Hiskiya penas ap o Yesaya: “Hoy hi ko sikepen, kay me nay pral djau an o baro Debleskro kheer?”