Jesaja 35 - O Debleskro Lab 2024 (Sinte-Manouche)

Barhtele menshe venn khere an Yerusalem

¹ Barhteles vell ko them, hoy kanna tato oun moulo hi. Oun o divyo trouk them sal, oun lauter an leste djivell pre oun anell bloume vin.

² Shoukar har divye bloume vell o them, oun givell oun dell gole i barhtyatar. O baro Devel krell les raylo har i berge Libanon, oun shoukar har i berga Karmel oun i tala Sharon. Oun i menshe dikenn o raylepen o baro Deblestar, ko baro koova, hoy maro Devel kras.

³ Krenn pale zoreles t'mare khine vasta, oun t'mare herya, hoy yaake trissenn.

⁴ Penenn ap kolende, kolen i dareno dji hi: Avenn zorelo! Oun ma darenn! Dikenn, kote hi t'maro Devel! Yob vell, te dell lo t'men t'maro čačepen oun i phagi kolende, kay kran t'menge čilačepen. Yob vell oun lell t'men dran lengre vasta vin.

⁵ Palle nay dikenn i korele, oun kolla, kay nay shounan gar, shounenn.

⁶ Oun har i vesheskri bouzni stell kova, kay nay nashas gar. Oun kova, kay nay rakras gar, rakrell nay oun dell gole i barhtyatar. An o moulo tato them vell pani vin dran i phoub. Oun an o divyo trouk them nashenn lengste panya.

⁷ Kote, kay yaake tato his, vell pani khetne oun ačell tardo. Oun kote, kay yaake trouk his, krenn panya i phoub sapeno. Kote, kay i divye djoukle čiddo his, vell panyeskro khass oun shilftikro khass.

⁸ Oun kote hi palle i drom, hoy kharell Debleskro drom. Kek, kay pale-čiddo glan o Debleste hi, nay djal ap leste. Kokres o Debleskre menshe djan ap leste. Kek, kay djal ap ko drom, nashrell pes, vitar kek, kay gar boud hayvell.

⁹ Kek levo hi kote; vitar kek vavar firho, hoy vavar firhen rhal, djal ap ko drom; save firhe venn gar kote hatslo. Ap kava drom djan kokres save menshe, kolen o baro Devel vin las dran o pandepen.

¹⁰ Kolen, kay yob dran o pandepen vin las, venn pale khere, oun venn o gipah pash i berga Sion. Lengri barht lell kek lendar. Lengre djia givenn oun bashrenn i barhtyatar. Oun douk oun ropen dell gar bouder.