Jesaja 34 - O Debleskro Lab 2024 (Sinte-Manouche)

O Devel dell o themes Edom i phagi

¹ Avenn kay, t'mer menshe dran vavar themma, oun shounenn! Denn yak ap hako lab! I tseli phoub oun lauter, hoy ap late djivell, mou shounell, hoy penau.

² O baro Debles hi i bari rholi ap i tsele themma lengre boud lourdentsa. Oun yob kras pash peste vin, te hounte merenn le, oun das len an i vasta kolendar, kay marenn len.

³ Oun kolla, kay temerl dino van, ačenn čiddo oun venn gar paskedo. Oun o khand lendar djal pre, oun ko rat lendar nashell i berge tele har pani.

⁴ Oun i tsele bolepangre momlia perenn khetne. Oun o bolepen tserdell pes khetne har i liil, hoy vell khetne lino. Oun kol bolepangre momlia perenn tele har moule patria ap o drakengro rouk oun har fayge, hoy gar bares van ap i faygetikro rouk.

⁵ Miro rharo kras peskri boudi ap o bolepen. Kanna moukau les tele te perell ap o them Edom, oun ap leskre menshende, kolen pengri phagi dau oun len marau.

⁶ O rharo o baro Deblestar hi pherdo rat oun thulepen, yaake har i čouri pherdo rat oun boukengro thulepen hi ap ko dives, kay venn terne bakre, bouzya oun morsh bakre maredo o Debleske. Kanna rikrell o baro Devel i marepaskro dives an o foro Bozra, oun marell boud boud menshen an o them Edom.

⁷ Ninna divye gourma merenn lentsa, terne gourma khetne kol zorele phourentsa. Oun lengro them vell pherdo rat, oun thulepen čakrell lengri phoub.

⁸ Kava hi o tsiro, kay o baro Devel i vavar themma pengri phagi dell, koleske, hoy le ap i menshende ap i berga Sion kran.

⁹ Oun kol panya, hoy nashenn an o them Edom, venn har pesso kalo djet, oun leskri phoub rhačrell oun vell djelti yagakri čik. Ko tselo them vell pesso kalo djet,

¹⁰ hoy rhačell dives oun rati. Oun koy yag djal gar vin. Oun latar djal i kalo dourho pre an o bolepen hako tsiro. Oun kek nay djivell bouder an ko them yaake rah har menshe koy hi, oun kek djal pral vergel an i vavar them an kek tsiro.

¹¹ I ratsyakre čirkle oun i moulengre čirkle djivenn kote. Oun massengre čirkle oun korake hi kote khere. Oun o baro Devel dell o themeske peskre rigya, mashkral lende ačell o them moulo oun mouklo.

¹² Kek an-dikle morsha hi bouder koy, kolendar yek lengro ray nay vals. I tsele pralstoune hi bouder gar.

¹³ Oun an i rayengre khera djan i soubyengre bourra pre, oun ap i barrengre massourya vell soubyengro zenlepen baro. I divye djoukle djivenn kote, oun bare divye čirkle hi kote khere.

¹⁴ Vavar divye firhe dran o moulo tato them venn kote khetne, oun divye bouzya denn gole yek ap o vavareste. Ninna o moulo, kay rati trouyel djal, hatsell i platsa kote, kay ačell lo.

¹⁵ Kote krenn i ratsyakre čirkle pengro kheer, čivenn pengre yare dren, beshenn pen koy pre oun denn yak ap lende. Ninna i bare čirkle, kay mass rhan, venn kote khetne, hakeno peskri romyah.

¹⁶ Rodenn kanna an o liil o baro Deblestar oun draverenn, hoy kote činlo hi: Kal tsele firhendar oun čirklendar hi koy. Kek lendar hi kek romyah. Yaake penas o baro Devel, oun leskro dourho anas len khetne.

¹⁷ Oun yob das len ko them, hakenes peskro kotar; oun hakenes hi peskri platsa, kay lo khere hi, te djivenn yon oun pengre čave an ko them hako tsireske, yaake rah, har save lendar koy hi.