Jesaja 33 - O Debleskro Lab 2024 (Sinte-Manouche)

O Devel dell kolen trad, kay peskre menshen tele rikrenn

¹ Djungeles djal touke, kay tou lauter khetne dal, oun kokres val gar khetne dino. Djungeles djal touke, tou phoukepaskro, ap koleste kek phoukras. Pal kova, kay dal halauter khetne, veh tou ninna khetne dino. Pal kova, kay phoukral ap hakeneste, phoukrenn le ap toute ninna.

² Baro Devel, ab lačes menge! Ap toute dikah. De men zoor hako dives! An ko pharo tsiro le men vin dran i bibarht!

³ I menshe dran vavar themma nashenn penge, te shounenn le tiri gole. Te steh tou pre an tiri zoor, venn le krik tradedo ap hake rigya.

⁴ Palle perah pral kova, hoy le čiddo moukan, har stepangre perenn pral o zenlepen, ava, har boud stepangre venna oun halauter pre rhana.

⁵ Sharedo pral halauter hi o baro Devel. Pral an o bolepen djivell lo. Oun ap i berga Sion krell yob o čačepen vin, te lell hakeno peskro čačepen.

⁶ Oun t'mer menshe an Yerusalem, t'menge vell i tsiro, kay hounte darenn či. Boud barht oun gosvepen vell t'menge. T'mer djinenn, hoy t'menge mishto oun gar mishto hi, oun djivenn o baro Debleha. Yob hi t'maro bareder bravlepen.

O Devel penell, hoske leskri phagi vell

⁷ Shounenn, zorele morsha denn bari gole, oun kol bičepangre, kay bičedo van, te penenn le, te hi o kourepen vin, kolla rovenn zoreles.

⁸ I dromma hi vi-meredo, oun kek djal bouder gar koy. Kolla, kay vin kran, te rikrenn le khetne, rikrenn gar pengro lab. Oun ap kolende, kay koy pashel his, har kova vin kerdo vas, vell gar shounlo. I menshengro djipen hi lenge či moldo.

⁹ Ninna o them rovell oun nashrell peskri zoor. I rouka ap i berge Libanon ladjenn pen oun merenn tele. O shoukar telstouno them Sharon dikell vin har i divyo trouk them. Oun i rouka ap i berge Bashan oun Karmel vitsrenn pengre patria tele.

¹⁰ “Kanna kamau me pre te stell”, penell o baro Devel. “Kanna hadau man oun sikrau miri zoor.”

¹¹ Hoy t'menge an o shero trouyel djal, hi phouss. Hoy koy pashel vin vell, hi khass. T'mari rholi hi har i yag, hoy t'men kokres pre rhal.

¹² Kol menshe an vavar themma venn rhačedo, te ačell či har parni yagakri čik. Har soubyengre bourra, hoy tele dino van, venn le rhačedo an i yag.

¹³ T'mer, kay dour krik han, oun t'mer kay gar yaake dour han, shounenn, hoy me krom oun hayvenn havi zoor man hi!

¹⁴ Ap i berga Sion lenn kolla traash, kay doosh ap pende hi. Halauter trissenna, kay o Debles bistran, oun penenn kanna: Kek mendar nay ačell tardo pash i yag, hoy lauter pre rhačrell. Kek mendar nay rikrell kova vin pash koy yag, hoy rhačell hako tsiro har koy yag ap o Debleskri rhačepaskri.

¹⁵ Kolla, kay an o čačepen tardo hi, oun rakrenn, hoy čačo hi; kolla, kay kekeske rhorhepah love tele lenn, te venn le bravelo, oun tserdenn pengre vasta pale, te kamell yek len love te dell, te anenn le rhorhepen pre; kolla, kay shounenn gar ap kolende, kay kamenn yekes te marell, oun kolla, kay djan gar kolentsa, kay o čilačepen krenn,

¹⁶ save menshe djivenn palle an o pralstunepen, an i berge hi lengro khatepen. Oun len hi doha rhapen oun pipen.

O baro Devel hi maro baro ray

¹⁷ Tire yaka dikenn o baro rayes an peskro tselo shoukapen. Tou dikeh i bourhlo them.

¹⁸ Kova, hoy glan kava tsiro touke traash kras, vell tout an o shero, oun tou poučeh toutar: Kay hi kol činepangre, kay mendar love lan? Kay hi kol pralstoune, kolenge roup ap i vaga hounte čivam? Kay hi kova, kay pal dikas, har boud turme koy hi?

¹⁹ Kol pre-phourde menshen dikeh tou gar bouder, kolengro rakepen gar hayval, kol laba, kolendar gar djinal, hoy kamenn le te penell.

²⁰ Dik ap ko foro Sion, kay mer khetne vah ap i bare divessa. Dik, har i Yerusalem i foro hi, kay djivenn i menshe kek daryah. Ko foro hi har i plarhteno kheer, hoy bouder gar tele phagedo vell. Kol saster, hoy les rikrenn, venn gar bouder vin tserdedo, oun lengre shelle djan gar bouder paash.

^21-22 Kote hi o baro Devel zoreles pash mende. Yob hi maro čačepaskro ray, oun kova, kay menge glan djal, ava, maro baro ray, kay men dran o merepen vin lell. Oun o foro hi čiddo pash bourhle lengste panya. Oun kek bero oulerell ap lende. Oun kek kourepaskro shiffo oulerell ap lende trouyel.

²³ Te vell yek shiffo, palle hi lengre pesse shelle gar zoreles pandlo, oun nay rikrenn ko mashkralstouno pesso kasht gar. Oun kol plarhte hi gar bourhles kerdo. Palle venn kolla, kay pash o pani djivenn oun lenn, hoy le hatsenn. Ninna kolla, kay bango djan, hidjrenn čomone krik, – yaake boud hi koy.

²⁴ Oun kek mensho, kay kote djivell, penell bouder: “An mande hi kek zoor.” Oun kol menshe, kay an kava foro djivenn, kolenge hi pengri phagi krik lino.