Jesaja 32 - O Debleskro Lab 2024 (Sinte-Manouche)

I djipen an o čačepen

¹ Sik vell i baro ray, kay krell halauter an o čačepen, oun i pralstoune pral o them denn hakenes peskro čačepen.

² Oun hakeno lendar hi har i kheer, kay yek nay khatrell pes glan i baro phourdepen, oun glan i baro zorelo brishin. Ava, yon hi har i panya an i moulo them, oun har i baro bar pal koleste yek pes khatrell, te rhačell o kham tele an i tato them.

³ Palle nay dikenn halauter pale mishto. Oun kolla, kay nay shounenn, krenn pengre kanda pre.

⁴ Oun kolla, kay rakran gar pengro djiyeha glan te krenn le čomone, yon dikenn kanna dren, hoy mishto oun gar mishto hi. Oun kolla, kay kek lab vin anan, rakrenn pale mishto, oun i laba nashenn har pani dran lengro mouy.

⁵ I dinelo vell gar bouder kharedo baro morsh, vitar gar vell ap i rhorheno penlo čačepaskro morsh.

⁶ Ko dinelo mensho rakrell dinlepen. Oun an leskro dji hi djounglepen. Yob rakrell douy čipyentsa, oun kova, hoy lo pral o baro Debleste penell, hi gar čačo. Kolen, kay bokenna, dell lo či te rhal, oun kolen, kay troush hi, moukell lo gar te piyell.

⁷ O rhorheno djal rhorhene dromma. Čilačo koova lell lo peske glan, oun leskro rhorhepah anell lo doosh ap i čorvelende, ninna te hi kolla an o čačepen.

⁸ Ko pralstouno, kay hi an o čačepen tardo, lell peske čačo koova glan. oun moukell gar tele, te krell lo kova ninna.

⁹ Shounenn mishto, t'mer djouvya, kay t'menge kek shero krenn pral kova, hoy vella! T'mer ča, kay dikenn kokres ap t'mende, krenn t'mare kanda pre oun shounenn, hoy me rakrau!

¹⁰ An yek bersh trissenn t'mer i daryatar, t'mer, kay kanna patsenn, te djal lauter mishto t'menge. Kek molyakre drake nay anenn dren. Oun či vavar vas baro, te nay lenn les khetne oun anenn les dren.

¹¹ Trissenn, t'mer djouvya, kay t'menge kek shero krenn, trissenn i daryatar, t'mer, kay dikenn kokres ap t'mende! Rivenn t'mare ripya vin, oun čivenn i gono troul t'mende!

¹² Te dikenn t'mer, hoy vas dran i lači phoub oun dran i shoukar drakengre rouka, denn t'mare vasta khetne pral o shero oun rovenn!

¹³ Ap i harhetikri phoub mire menshendar venn soubyengre bourra oun soubyengro zenlepen baro. Rovenn ninna troul i khera, kay pherdo sapen his an ko barhtelo foro.

¹⁴ An o rayeskro kheer vell kek bouder. Mouklo vell o foro, kay yaake boud menshe trouyel nashenn. I zorele barrengre khera oun o turmo, kay pral an o foro tardo hi, perenn khetne. Oun mank lende djivenn divye bourike i rah tsireske, oun bakre oun groumya rhan kote.

¹⁵ Yaake ačell kova bis an ko tsiro, kay čorell o Devel peskro dourho pral mende vin. Palle vell o moulo them i lačo them, kay yaake boud djob tardo hi, te dikell vin har i veesh.

¹⁶ Oun an o tselo them djivenn le pal o Debleskre čačepaskre laba, oun an o moulo tato them har an o lačo them krenn le, hoy čačo hi.

¹⁷ Oun kote, kay o čačepen khere hi, oun i menshe pal o Debleskre čačepaskre laba djivenn, kote hi kek kourepen oun kek čingepen. Oun kekes hounte vell daar. Yaake ačell kova hako tsireske.

¹⁸ Palle djivenn mire menshe an i them, kay kek kourepen hi, an khera, kay hounte vell len kek daar, te krell yek lenge čomone, oun ap platse, kay nay ačenn le, oun kek tradell len krik.

¹⁹ Ninna te denn brishineskre barra o veesh paash, oun o foro djal tele,

²⁰ har barhtele nay venn t'mer, kay nay vitsrenn t'maro djob vin pash hake panya, oun nay moukenn t'mare groumya oun bourike kote djan oun rhan, kay le kamenn.