Jesaja 3 - O Debleskro Lab 2024 (Sinte-Manouche)

O Debleskri rholi vell ap Yerusalem oun Youda

¹ O baro Devel, ko ray pral o bolepen oun i phoub, lell dran o foro Yerusalem oun dran o them Youda lauter krik, ap koleste i menshe pen rikran oun hoy len zoor das. O tselo maro oun o tselo pani lell lo lendar krik.

² Ninna i zorele morshen, i kourepangren, i čačepangre morshen, o Debleskre rakepangren, i dourkepangren oun i phoureden lell lo lendar.

³ Ninna i pralstoune lourden, i an-dikle menshen, i rakepangren, i goseven, i dourkepangren oun kolen, kay i moulen poučenn, lell lo kolendar krik.

⁴ Yob penell: Me moukau terne morshen pral lende ray te vell, kay lentsa krenn, hoy le kamenn.

⁵ Oun an o them djal hakeno ap o vavareste oun dell les pral o kand: o terno o phoures, o či-moldo o an-dikles.

⁶ Palle taprell yek peskro phrales an peskro dadeskro kheer oun penell ap leste: “Tout hi i baya ap toute, tou vess maro pralstouno an kava pharo tsiro.”

⁷ Ap ko dives dell yob pes sovel oun penell: “Me hom kek dramaskro, oun an miro kheer hi kek maro oun kek baya. Ma krenn te vap me ray pral t'mende!”

⁸ O foro Yerusalem peras, oun o them Youda hi koy čiddo. Hoske? Yon doukran o baro Debles pengre labentsa, oun ninna koleha, hoy le kran. Kova, hoy o zorelo Devel lenge penas, kaman le gar te krell.

⁹ O čilačepen dikell dran lende vin. Oun yon anenn doosh ap pende oun kolah sharenn le pen ninna gomme, yaake har kol menshe an o foro Sodom ninna kran. I bibarht vell ap lende, koya anenn yon kokres pengro djoungelo djipah pral pende!

¹⁰ I barht vell ap kolende, kay an o čačepen tardo hi! Oun lauter djal lenge mishto. Ko lačo koova, hoy le kran, vell ap lende pale.

¹¹ Ap i čilačende vell bibarht. Lenge djal gar mishto. Ap lengro shero vell ko čilačepen pale, hoy le kran.

¹² Mire menshe, penell o baro Devel, t'mare pralstoune hi čave. Oun djouvya hi i raya pral t'mende. Kolla kay hounte sikrans t'menge o drom, anenn t'men o čačo dromestar tele, oun krenn, te nashrenn t'men.

¹³ Koy vell lo, o baro Devel, te penell lo, kones čačes hi an o čingepen. Yob hi koy tardo, te krell lo o čačepen vin pral peskre menshende.

¹⁴ Ap i phourende oun rayende pral peskre menshende penell yob: T'mer rhan i tsele drake, hoy ap miro drakengro them bares van, An t'mare khera hi kova, hoy t'mer i čorvelenge randan!

¹⁵ Hoske stakran t'mer mire menshen tel t'mare herya? Oun hoske dan o čorveles an o mouy? Me, o baro Devel, ko ray pral o bolepen oun i phoub, poučau kova t'mendar.

¹⁶ Oun o baro Devel penas: Dikenn, har pre-phourde yon hi, kol djouvya an o foro Yerusalem! Lengre sherya hidjrenn le pre, vitsrenn pengre yakentsa trouyel, te dikenn len hakeno. Yon khelenn pash o naashepen. Lengre pire hadenn le yaake, te bashrenn kol verklia, hoy le troul pengre pire čivan.

¹⁷ Doleske moukau me, o baro Devel, i čiklo doukepen ap lengre sherya te vell, oun moukau lenge i tsele balla tele te činell.

¹⁸ Ap ko tsiro lell o baro Devel i djouvyenge ko tselo kouč koova krik, koleha yon pen yaake shoukar krenn, kol verklia, hoy čivenn le troul pengre pire, pengre sherya, pengre menya,

¹⁹ pengre moussya. Oun lengre kanengre oun lengre shereskre dikle lell lo lendar ninna krik,

²⁰ ninna lengre stadja, tikne verklia, pereskre dorya, lengro soungepaskro pani, lengre barhtyakre,

²¹ lengre goustria oun nakeskre kanengre,

²² lengre shoukar ripya, lengre plaashke oun baya oun ladetse,

²³ lengre blendarya oun lengre gada, lengre stadja oun lengre shereskre bare dikle.

²⁴ Oun palle vell, te hi djoungeli khand, kay shoukar soungepen his, oun kote, kay i shoukar pereskro pandepen his, hi kanna i dori. Oun kolat, kay shoukar bal his, kolat hi palle kek bal ap o shero, oun kolat, kay kouč koola his, koya rivell palle i gono troul peste. Oun kote, kay shoukapen his, hi kanna či har i ladj.

²⁵ I morshen an o foro venn moulo dino o rhareha. Ninna i zorleder merenn an o kourepen.

²⁶ I menshe an tiro foreskre voudya, Yerusalem, denn palle gole oun rovenn. Oun o foro hi palle vi-čoredo oun mouklo.