Jesaja 29 - O Debleskro Lab 2024 (Sinte-Manouche)

Bibarht vell ap o foro Yerusalem

¹ Djungeles djal t'menge an o foro Ariel, ko foro, kay o David djivas! Djungeles djal t'menge, ninna te moukenn gar tele oun venn hako bersh, te rikrenn t'mare bare divessa!

² Me anau yaake boud traash ap o foro Ariel, te denn t'mer bari gole, oun denn i vasta khetne pral o shero. Oun palle vell o foro i čačo rhačepaskro bob mange.

³ Me čivau lourden troul o foro pre ap hake rigya. Oun moukau barra oun čik troul leste pre te čivell, te venn t'mer dren pandlo.

⁴ Palle han čiddo ap i phoub. Oun dran i čik rakrenn t'mer palle yaake, har te vans tel i phoub. Oun t'maro rakepen vell gar mishto shounlo, oun hi har o rakepen i moulestar, kay dran i phoub rakrell.

⁵ Ap yek kopo venn kol boud boud lourde, kay ap t'mende djan, krik phourdedo har i stauba. Oun kol zorele kourepangre hi har o phouss, hoy krik phourdedo vell oun bouder gar koy hi. Yaake sik, har yek i yakentsa dell,

⁶ vell o baro Devel, o ray pral o bolepen oun i phoub, oun lell t'men vin dran lengre vasta. Yob vella bari golyah oun moukell i phoub trissell. Oun o bolepen dell gole, oun i zorelo dourho phourdell pral i phoub, oun bari yag rhal troul peste.

⁷ Oun kol tsele natsyone, kay pengre boud lourdentsa ap o foro Ariel djan, oun o foro dren pandan, oun leske daar kran, kolla hi yaake sik krik, har djal i souni krik, oun kova, hoy yek an i souni dikas.

⁸ Yek, kay bokella, dell souni, te rhal lo. Oun te krell lo peskre yaka pre, hi les gomme bok. Oun yek, kay troushella, dell souni, te piyell lo. Oun te krell lo peskre yaka pre, hi les troush, oun leskro mouy hi trouk. Yaake djal kol menshenge dran i tsele themma, kay djan an o kourepen i bergah Sion.

I menshe an Yerusalem kamenn gar te shounell

⁹ Krenn doureder, har te vans dinelo an o shero! Krenn doureder, har te vans korelo ap i douy yaka! T'mer han mato – oun piyan kek mool. T'mer perenn yek rigyatar ap i vavar – oun piyan kek zorelo pipen.

¹⁰ O baro Devel čivas i sopaskro dourho ap t'mende. O Debleskre rakepangre hounte vans t'mare yaka, – o Devel kras len korelo, oun i dikepangre dikenn bouder či, har te vals i diklo troul lengre yaka pandlo.

¹¹ Lauter, hoy t'men o Devel sikras, hi t'menge har i laba an i liil, hoy krell nay kek pre. Kova hi yaake, har te dals yek i liil yekeste, kay hayvell te draverell, oun penell leske: Drave mange glan, hoy tardo hi. Oun kova penell: Kova djal gar, ko liil nay krell kek pre.

¹² Oun palle dell lo ko liil yekeste, kay hayvell gar te draverell, oun penell: Drave mange glan, hoy činlo hi. Oun kova penell: Me hayvau gar te draverell.

¹³ O baro Devel, maro ray, penas: Kal menshe sharenn man labentsa. Lengre čipya hadenn man. Lengre djia hi dour krik mandar. Te mangenn le man an, rakrenn le palla, hoy lenge glan penlo vas.

¹⁴ Doleske krau kal menshentsa pale savo koova, hoy le gar hayvenn, oun hoy vin dikell, har te vals kova gar mandar, yaake te ačell lenge o rakepen krik. Lengre goseve menshe hi palle bouder gar gosevo. Oun kolla, kay boud hayvan, hayvenn bouder či.

¹⁵ Djungeles djal kolenge, kay kova, hoy le penge an pengre djia glan lan, glan o baro Debleste khatrenn, oun an o kalepen i ratsyatar pengro koova krenn, oun penenn: “Koon dikell men? Oun koon djinell, te hams mer kova?”

¹⁶ T'mer rissrenn lauter trouyel! Hi o čik, dran koleste i pirya oun khore rhačedo venn, kanna boudeder har ko morsh, kay len krell? Nay rakrenn i pirya lestar: Yob kras men gar. Nay penals o khoro lestar: Kova hayvell či.

Lauter vell vavarčandes

¹⁷ Čačepah an i tikno tsiro vell o veesh ap i berga Libanon i djobeskro them. Oun hoy kanna i djobeskro them hi, vell palle i veesh.

¹⁸ Ap ko dives shounenn kolla, kay nay shounenn gar, i laba dran i liil. Oun i korele nay dikenn oun djivenn bouder gar an o kalepen oun an i rat.

¹⁹ Oun o baro Devel krell kolen pale barhtelo, kay van tele rikedo. Oun i čorvele givenn i barhtyatar pral o Israeleskro Debleste.

²⁰ Zorele raya, kay i vavaren tele rikran, nashrenn pengri zoor. Oun i pre-phourde hi bouder gar koy. Oun maredo venn halauter, kay kaman i bibarht pral i vavarende te anell,

²¹ kolla, kay rhorhepah doosh ap i vavarende anan, oun rhorhenn i čačepangre morshen, oun anenn len pengre rhorhene labentsa yaake dour, te denn le kek čačepen koleste, kay kek doosh ap leste hi.

²² O baro Devel, kay o Abrahames vin las dran peskro phouro djipen, kova penell pral o Yakobeskro kheer: Kanna hounte ladjell pes o Yakob bouder gar, oun leskro mouy hounte vell gar bouder parno.

²³ Te dikenn leskre čave ko koova, hoy mire vastentsa mashkral lende krau, palle hadenn le miro lab; yon sharenn man, o Yakobeskro Debles, kay hom kokres o čačo Devel. Oun yon mangenn man an, o Israeleskro Debles.

²⁴ Oun kolla, hoy či hayvan, hayvenn palle, hoy mishto oun gar mishto hi. Oun kolla, kay moukenn pen či te penell, lenn kova an, hoy lenge siklo vell.