Jesaja 28 - O Debleskro Lab 2024 (Sinte-Manouche)

Bibarht vell pral o foro Samaria, ko shereskro foro o themestar Israel

¹ Djungeles djal touke, tou foro Samaria! Tou hal čiddo ap i berga, hoy hi tardo pral o bravelo them. Oun hal har i rayeskri stadi. I menshe dran o them Efrayim, kay i molyatar mate hi, sharenn pen touha. Tiro shoukapen hi har i bloume, hoy merell tele.

² O baro Devel bičrell yekes, koles boud zoor oun penepaske hi. Oun kova vell har i baro divyo phourdepen, kay brishineskre barra dren hi, oun hoy lauter paash dell. Yob vitsrell halauter tel peste an i čik, yaake har i baro brishin, hoy lauter tel pani tassell.

³ Peskre heryentsa stakrell lo ko pre-phourdo foro khetne, kay i mate dran Efrayim djivenn.

⁴ Oun ko raylepen kol pralstunendar hi har i blouma, hoy merell tele, oun hi bouder gar koy. Lenge djal har i fayge, kay van glan lengro tsiro bares. Yaake sik har yek len dikell, hi le an leskro vast oun yob rhal len pre.

⁵ Ap ko dives hi o baro Devel, ko ray pral o bolepen oun i phoub, har i shoukar rayeskri stadi oun shereskro sonakay kolenge, kay pral ačan leskre menshendar.

⁶ Oun i čačepangre rayende dell lo o čačepen an o dji, te nay rakrenn le čačepah o čačepen vin. Oun kol kourepangren dell lo i zoor, te nay tradenn le i lourden dran vavar themma pale dran o foro vin.

I rashaya oun o Debleskre rakepangre hi mato

⁷ Ninna i rashaya oun o Debleskre rakepangre hi mato i molyatar, oun perenn yek rigyatar ap i vavar o zorelo pipastar, hoy le piyan. Yaake boud mool oun zorelo pipen piyan le, te nay ačenn le bouder gar tardo. Te rakrenn le o Debleskro lab vin, hi le mato koy pashel. Te krenn le o čačepen vin, perenn le yek rigyatar ap i vavar.

⁸ Lengre rhapangre, kay yon beshdo his, hi pherdo čadepen, kek platsa ačas djoudjo.

⁹ Yon penenn: “Menge kamell yob čomone pashel te anell oun leskre dromma te sikrell? Mer ham bouder kek tikne čave, kay glan i tikno tsiro gomme o thoud pash pengre daya piyan!

¹⁰ Čačepah, lauter hoy lo rakrell, hi laba, hoy hayvell kek, hi sau koova, har i ternepen rakrell: ba-ba-ba, ma-ma-ma.”

¹¹ Ava, i tsiro vella, koy bičrell o Devel vi-themarya pash kal menshende. Oun kolengro rakepen hayvenn le gar.

¹² Kova rakras yob, kay glan rah tsiro ap lende penas: “Kate hi o them, kay nay lenn nevi zoor. Moukenn kolen pen tele te čivell, kay yaake tele maredo van. Kate nay čivenn le pen tele.” Yon kaman gar te shounell.

¹³ Doleske hayvenn le gar, hoy o baro Devel lenge penell. Leskro lab hi lenge či vavar koova har sau koova, hoy i ternepen rakrell: ba-ba-ba, ma-ma-ma. Yaake te djan le koy oun perenn, oun phagenn pen i herya, taprenn pen an i dori, oun venn pandlo.

¹⁴ T'mer pre-phourde, kay penenn i menshenge an o foro Yerusalem, hoy le hounte krenn, kanna shounenn o lab o baro Deblestar:

¹⁵ T'mer penan: “Mer kram vin o merepah oun o moulengro themeha, te vas menge či. Ninna te venn i lourde dran vavar themma har i baro zorelo pani pral mende, venn le gar zorleder har mer.” T'mer patsenn, te nay khatrenn t'men pal t'mare rhorhene laba oun pal ko rhorhepen, hoy kran.

¹⁶ Doleske penell o baro Devel, maro ray: Ap i berga Sion čivau i zorelo bar, ap koleste miro kheer tardo vell. Zorelo oun kouč hi ko bar oun rikrell lauter vin. Ap leste hi tardo: Koon ap mande patsell, nashell peske gar.

¹⁷ An miro kheer djivell o čačepen, oun mire menshende dau čačepaskre laba. Zorelo brishin, kay brishineskre barra dren hi, dell palle o rhorhepen paash, ap koleste t'men rikrenn. Oun panya hidjrenn t'maro khatepen krik.

¹⁸ Oun kova, hoy t'mer vin kran o merepah oun o moulengro themeha, vell krik lino oun hi gar bouder. Oun i lourde venn har i baro pani, oun stakrenn t'men khetne.

¹⁹ Hako kopo, kay venn le, taprenn le t'mendar oun anenn t'men krik, nay vell ap o dives oun ninna an i rat. Te hayvans t'mer, hoy shounenn, palle ačals t'menge o rakepen krik i trashatar.

²⁰ Palle djans t'menge har penlo vell: O čiben hi gar lengsto doha, oun i plarhta hi gar bourhles doha, te nay čivess lat troul toute.

²¹ O baro Devel stell pre, har kras lo pash i berga Perassim, oun vell rhoyedo har an i tala Gibeon, te krell lo lauter, hoy yob peske glan las. Oun kova hoy yob kanna krell, hayvenn t'mer gar. Kova vell t'menge yaake glan, har te vals gar lestar.

²² Kanna, ma san bouder pral mire laba, te venn i shelle troul t'mende gar gomme zorleder khetne pandlo. O baro Devel, ko ray pral o bolepen oun i phoub, moukas man te djinell, te las lo pes glan, te vell o merepen pral o tselo them.

O gosevo harho

²³ Shounenn, hoy penau! Denn mishto yak ap miro rakepen!

²⁴ I harho, hoy peskri phoub trouyel boudrell, krell yob kova hako dives? Vitsrell yob pale te pale i phoub pre?

²⁵ Hi kova gar yaake: Te kras lo i kotar phoub, palle vitsrell lo tikne djoba dren: o dill oun i kimmla, ninna o gib oun o djob, hakenes ap i vavar kotar phoub, ninna čomone ap i rig.

²⁶ Oun har yob kova hounte krell, sikras les o Devel, kova hoy yob djinell, vell lestar.

²⁷ O dill dell lo gar vin har yek o djob vin dell, oun pral i kimmla oulerell lo gar. Na-a, o dill oun i kimmla vell o kashteha vin dino.

²⁸ Vell o djob yaake vin dino, te djal lo paash? Na-a, kova vell i tikno tsiro dino. Oun te oulerell o harho peskre grayentsa koy pral, krell lo kova gar yaake rah, te ačell či pral.

²⁹ Ninna kava djal vin o baro Deblestar, ko rayestar pral o bolepen oun i phoub. Kova, hoy yob peske glan las, hi yaake shoukar, te ačell menge o rakepen krik. Oun leskro gosvepen hi baro.