Jesaja 27 - O Debleskro Lab 2024 (Sinte-Manouche)

¹ Ap ko dives lell o baro Devel peskro baro zorelo rharo, hoy yaake mishto činell, oun dell o sapes moulo, hoy kharell Leviatan, ava, ko baro panyeskro sap, hoy ap o naashepen hi oun moukell pes gar te taprell.

I nevi gili pral o Debleskri molyakro them

² Ap ko dives penell o baro Devel t'menge: Man hi i shoukar drakengro them; givenn leske i gili!

³ Me, o baro Devel, dau ap leste yak, oun dau les pale te pale pani. Kek tsiro moukau les dran miro yak, yaake te nay krell les kek čomone.

⁴ Me hom bouder gar rhoyedo ap leste. Te hatsoms soubyengre bourra oun soubyengro zenlepen dren, djoms ap lende oun rhačroms len halauter pre.

⁵ Yaake djal lauterenge, kay gar pash mande venn, te rikrap mire vasta pral lende. Mou venn le pash mande, te las kova krik, hoy mank mende tardo hi. Ava, mou venn le, te vas mer mala.

O Israeleskri doosh vell krik lino

⁶ Ko tsiro vella, kay vell o Yakob pale zorelo. Ava, o Israel vell har i rouk, koles zorele draba hi, oun zenelo vell, oun ap koleste bloume pre djan, oun boud roukengre vin anenn. Kolendar vell i tseli phoub pherdo.

⁷ Das o baro Devel i Israelitaryen yaake har lo kolen das, kay len dan? Maras yob yaake boud lendar, har maras lo kolendar, kay len maran?

⁸ Na-a, yob das len lengri phagi, har yob len pestar krik bičras. Dran lengro them van le krik tradedo har i zorelo dourheha, hoy kotar phourdell, kay o kham pre djal.

⁹ Yaake vell o Israelengri doosh krik lino. Oun ap kova sikrell pes, te hi lengri doosh krik lino: Te denn le i pre-čidde barra yaake khetne, kay mangan le i vavar deblen an, te ačell či har čik. Oun te moukenn le kek figure tardo, hoy sikrenn i debletsa Ashera, vitar kek boba, kay lake soungepaskro koova rhačedo vas.

¹⁰ I zorelo foro hi mouklo. Kek djivell bouder an i shoukar khera. O foro hi har i divyo mouklo them, kay i groumya rhan oun pen tele čivenn, oun o zenlepen ap i bourra rhan.

¹¹ Oun lengre kashta venn trouk oun phagenn tele. Oun djouvya venn oun lenn len, te krenn le i yag. Kal menshe hayvan či. Doleske vell koles, kay len kras, kek dji lenge, oun hi lenge gar lačo.

I Israelitarya venn pale pale anlo an pengro them

¹² I tsiro vella, kay lell o baro Devel peskre menshen khetne dran o tselo them mank o pani Eufrat oun o them Egiptia. Yob rodell len vin har yek o tikno djob vin rodell dran o phouss, yek pal o vavar.

¹³ Oun ap ko dives vell an i bari phourdepaskri phourdedo. Oun i Israelitarya, kay his nashedo an o them Assour, oun kay his vin tradedo an o them Egiptia, kolla lauter venna oun mangenn o baro Debles an ap o Debleskri berga an o foro Yerusalem.