Jesaja 25 - O Debleskro Lab 2024 (Sinte-Manouche)I sharepaskri gili 1 Baro Devel, tou hal miro Devel. Tout sharau, oun touke givau. Tou kral baro koova, hoy kek vavar nay krella. Hoy tou penal i glan rah tsiro, ap kova rikral tout oun kral kova. 2 Tou kral o zorelo foro paash. Lestar ačas či pral har barra. Ko foro, kay i zoreli massouri troul leste his, hi čiddo an kotya. Kote, kay rayen dran vavar themma pengre shoukar khera his, hi kek foro bouder. Oun kek nay čivell len pale pre. 3 Doleske sharenn tout i menshe an zorele themma. Oun i menshe an forya, kay lengre pralstoune i zoryah ap lende djan, mangenn tout an. 4 Čačepah, tou val o čorveleske har i zorelo kheer, kay yob pes nay khatrell. Te krenn le leske o djipen phares, nay vell lo pash toute. Tou hal har i kheer, kay nay khatrell yek pes, te dell baro brishin, oun te rhačell o kham tele. Kol pralstoune, kay zoryah ap mende djan, hi har i baro phourdepen, hoy phourdell an o vend, 5 oun har o kham an o tato tsiro, hoy lauter rhačrell. Tou kral, te hounte moukan le mendar tele, kolla, kay van dran vavar themma, oun djan divyes ap mende pre. Yaake har djal o tatepen krik, te venn volke glan o kham, yaake lal lendar lengro gipen krik, hoy givan le pral ko baro koova, hoy le kran. O baro barhtyakro rhapen 6 Kate ap i berga Sion moukell o baro Devel, ko ray pral o bolepen oun i phoub, i menshenge an i tsele themma i lačo rhapen glan te čivell; i rhapen thoullo masseha oun lači phouri mool, ava, vi-rodedo lačo mass oun vi-rodedi phouri mool. 7 Kate ap kay berga lell lo palle ko diklo krik, hoy čakrell i sherya i tsele menshendar, koy merepaskri plarhta, hoy hi čiddo pral i menshende an i tsele themma. 8 O merepen lell lo krik hako tsireske. O baro Devel, maro ray, khossell palle hakeneske i sva tele. Oun koy ladj, hoy ap peskre menshende čiddo hi an hake themma, lell lo lendar krik. Kova penas o baro Devel. 9 Ap ko dives penell hakeno: Dik, kova hi maro Devel! Ap koleste rikram men, te vell lo ap mari rig. Yob hi maro baro Devel, ap koleste men rikram! Givas i barhtyatar: Yob las men vin dran o merepen. O Devel dell o themes Moab peskri phagi 10 O baro Devel rikrell peskro vast pral kay berga. I menshen an o them Moab stakrell lo tel peskre herya khetne, yaake har phouss khetne stakedo vell, hoy an i čik čiddo hi. 11 Ninna te hadenn le pengre vasta oun krenn len bourhles har i shvimari, djan le tele, oun ninna kova, hoy le pengre vastentsa kran. Yaake krell o baro Devel len tiknes. 12 Oun kol zorele bare khera an o them Moab phagell o Devel tele, oun dell len khetne, te perenn le tele an i čik. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.