Jesaja 22 - O Debleskro Lab 2024 (Sinte-Manouche)

O Debleskre laba pral o foro Yerusalem

¹ Kate sikrell o Devel, hoy pral i dikepaskri tala vella. Hoy djas touha, Yerusalem? Hoske djan t'mer lauter pral ap i khera?

² O foro hi pherdi gole oun pherde barhtele menshe, kay divyes trouyel nashenn. Kek t'mare lourdendar, kay moules ap o drom čiddo hi, vas moulo dino o rhareha. Yon meran gar an o kourepen.

³ T'mare pralstoune lourde nashan khetne penge. Kek faylo vas karye dino, har van le tapedo. Lauter van tapedo oun pandlo fothe dour yon ninna nashan.

⁴ Doleske penau t'menge: Ma dikenn ap mande! Moukenn man te rovell. Miro dji hi yaake pharo. Ma rakrenn lačes ap mande, kamau gar te bistrap koy bibarht, hoy ap mire menshende vas.

⁵ O baro Devel, o ray pral o bolepen oun i phoub, rodas i dives vin, kay an i dikepaskri tala boud menshe bares gole denn, kay lourde lauter khetne stakrenn, oun i menshe narvelo i daryatar venn. I massourya venn tele phagedo. Oun i gole djal pre ap i berga.

⁶ I lourde dran o them Elam hidjrenn pengre gone i faylentsa, oun venn ap vourdya i grayentsa. Lourde dran o them Kir rikrenn pengre shilte an i vasta.

⁷ Oun maro shoukar telstouno them vell pherde vourdya; oun morsha, kay ap pengre graya klissenn, hi glan o foreskre voudya pre tardo.

⁸ Oun o baro Devel rikrell peskre vasta bouder gar pral o Youda. Har kova djas, lan t'menge i rhare vin dran o vesheskro kheer.

^9-10 Oun t'mer dikan pal, kay boud kotya an o foreskri massouri paash hi, oun činan an i liil, kitse khera an Yerusalem hi, oun phagan lendar tele, te lenn i barra, te krenn o foreskri massouri tseles. Oun t'mer lan o pani dran o telstouno pani khetne pre.

¹¹ Oun mashkral kol douy massourya kran t'mer i panyeskro kheer o panyeske dran o Phouro Pani. Ap o Debleste, kay kova lauter kras, dikan t'mer gar, oun ap koleste, koles kova glan i rah tsiro an peskro dji his, rikran t'men gar.

¹² Oun ap ko dives das o baro Devel, ko ray pral o bolepen oun i phoub gole: “Rovenn oun denn gole, činenn t'menge i balla tele, oun rivenn t'men an ripya dran gone, te sikrenn, kay khaytell t'men t'mari doosh!”

¹³ Oun hoy krenn t'mer? T'mer sanenn oun khelenn, marenn groumyen oun bakren, rhan mass oun piyenn mool. T'mer penenn: “Moukenn men te rhal oun te piyell, taysar merah mer!”

¹⁴ Ap mande penas o baro Devel, ko ray pral o bolepen oun i phoub: “Kaya doosh vell lendar gar krik lino yaake rah har djivenn le.”

O Debleskre laba ap i morshende Shebna oun Elyakim

¹⁵ Yaake rakras o baro Devel, o ray pral o bolepen oun i phoub, ap mande: Dja pash ko pralstouno boudepaskro pral o baro rayeskro kheer, pash o Shebna, oun pen ap leste:

¹⁶ Koneske rikreh tout? Oun koon dell tout o čačepen, te moukeh tou touke kate i moulengro kheer te krell, oun moukell les an i baro bar vin te dell, yek kheer, hoy baro hi oun dour an i bar djal.

¹⁷ Tou patseh, te hal i zorelo morsh! Shoun, o baro Devel lell tout oun vitsrell tout dour krik! Yob taprell tout,

¹⁸ oun pandell tout khetne har te pandals lo i shereskro pandepen oun palle vitsrell yob tout i zoryah an i bourhlo them. Kote mereh tou. Oun kote ačenn tire kouč vourdya. Tou hal i ladj ko khereske tiro rayestar.

¹⁹ Oun me tradau tout dran tiri boudi, oun tserdau tout tele dran tiri pralstouni platsa.

²⁰ An ko tsiro dau miro boudepaskres, o Elyakimes gole, koleskro dad o Hilkiya hi.

²¹ Oun rivau les an tiri kouč baya, oun tiro pereskro pandepen čivau leske trouyel. Oun lauter, pral kova tou ray hals, dau an leskro vast, te vell lo har i dad kolenge, kay an Yerusalem djivenn oun o tselo khereske Youda.

²² Oun me dau les o klido o voudareske an o Davideskro kheer. Hoy krell yob pre, nay pandell kek tele. Hoy pandell yob tele, nay krell kek pre.

²³ Oun me krau les zoreles an peskri boudi yaake har i saster zoreles dren dino vell. Oun yob anell sharepen ap leskro dadeskro kheer.

²⁴ Peskre tsele menshe hi ap leskri meen, peskre čaventsa oun čavengre čaventsa. Palle djal leske har o saster, ap koleste pirya, čare oun khore pre bladedo hi.

²⁵ Ko saster phagell vin oun perell tele. Oun ko tselo koova, hoy o saster hidjras, phagell khetne. Kova penell o baro Devel.