Jesaja 21 - O Debleskro Lab 2024 (Sinte-Manouche)O Debleskre laba pral foro Babilon 1 Kate sikrell o Devel, hoy pral o divyo them pash o baro pani vella. Har i zorelo dourho, hoy phourdell an o them Negev, venn i lourde dran i moulo tato them, oun dran i them, hoy traash pral i menshende anell. 2 Havo pharo koova vas mange siklo! O phoukepaskro phoukrella, oun o randepaskro randella. T'mer lourde dran i themma Elam oun Media, krenn t'men ap o drom, oun čivenn t'men pre troul lo foro Babilon. O baro Devel krell, te hounte rovell bouder kek pral kova, hoy i Babilonarya kran. 3 Hoy shounom, hi yaake djoungelo, kay phagau khetne. Hoy dikom, krell man bari traash. Mire kokale trissenna, douka tapran man har i djouvyat, kay lell i ternepen. 4 Me hom nasselo an o shero, i daar moukell man te trissell. Dikom ap i rati, te djal mange feteder. Har i rati vas, djas mange gomme djoungleder. 5 O rhapen hi ap i rhapaskri čiddo, oun i stakepangre hi ap i phoub čiddo, yon rhan oun piyenn. Koy dell yek gole: “Stenn pre, t'mer pralstoune! lenn t'mare shilte an o vast!” 6 O baro Devel, maro ray, penas mange: Dja koy oun čip i morshes tardo, te dell lo yak. Oun kova hoy lo dikell, hounte penell lo touke! 7 Te dikell lo boud vourdya, hakeno tserdedo douy grayendar, oun klissepangre ap bourike oun ap khamele, palle hounte dell lo mishto yak. 8 Koy das ko morsh gole, kay yak dell: Ray, me hom ap miri platsa tardo o tselo dives, oun dau yak haki rati. 9 Kanna dikom i morshes ap i vourdin douy grayentsa. Oun ko morsh das gole: O foro Babilon peras, peras. Oun i tsele rhorhene debla hi paash dino ap i phoub. 10 Mire menshe an Youda, t'mer van dino har djob ap i djobeskri platsa vin dino vell. Me penom t'menge, hoy shounom o baro Deblestar, ko rayestar pral o bolepen oun i phoub, kay ninna o Israeleskro Devel hi. O Debleskre laba pral i themma Edom oun Arabia 11 Kate sikrell o Devel, hoy pral o them Edom vella. Dran o them Seir denn le ap mande gole oun poučenn: “Tou, kay yak deh, har dour hi an i rat? Kaana hi i rat trouyel?” 12 Me penau: “Ninna te vell o dives sik, kanna hi gomme rat! Te kamenn i vavar kopo te poučell, palle avenn pale!” 13 Kate sikrell o Devel, hoy pral o them Arabia vella. T'mer morsha dran o foro Dedan, ačenn t'mare khamelentsa vin an o divyo them! Ačenn pral i rati mank i bourra! 14 T'mer, kay an o them Tema djivenn, djan pash kolende vin, kay ap o naashepen hi! Anenn kolenge, kay troushenna, pani te piyell, oun denn len maro te rhal! 15 Yon nashenn penge glan o rharo, ava, glan o vi-tserdedo rharo, oun glan ko bogo, hoy pral rikedo vas. Glan ko pharo zorelo marepen nashan le penge. 16 Yaake rakras o baro Devel, maro ray, ap mande: An yek bersh – kek dives sikeder oun kek dives palla – vell o tselo raylepen dran o them Kedar krik lino. 17 Oun kol morshendar dran Kedar, kay hayvenn mishto o bogeha karye te dell, ačenn gar boud pral. Kova penau me, o baro Devel, koon o Israeleskro Devel hi. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.