Jesaja 2 - O Debleskro Lab 2024 (Sinte-Manouche)

I raylo tsiro vella

¹ Kava hi, hoy dikas o Yesaya, pral o them Youda oun o foro Yerusalem. Leskro dad hi o Amoz.

² Vell i tsiro, koy hi koy berga, kay o baro Debleskro kheer tardo hi, bareder har i tsele vavar berge, oun dikell tele ap i tsele tikne berge. Oun i menshe dran boud themma nashenn pash kay berga,

³ oun penenn: “Avenn, te djas pre ap i berga o baro Deblestar, pash o kheer o Yakobeskro Deblestar, te sikrell lo men peskre dromma, te djinas, hoy lo mendar kamell.” O baro Debleskre laba djan vin dran Sion. Dran o foro Yerusalem rakrell lo i menshentsa.

⁴ Oun yob vell o čačepaskro ray, kay krell o čačepen vin mashkral i menshende dran i vavar themma, oun penell lenge, te moukenn le pengro čingepen. Oun kolla lenn palle pengre rhare oun vitsepaskre čourya, oun krenn lendar harhetikre koola, kolentsa boudrenn le nay an i phoub oun činenn i drakengre kashta tele. Oun palle kourenn pen i menshe dran yek them bouder gar i menshentsa dran i vavar them. Oun kek sikrell i vavaren bouder, har te marenn le pen.

⁵ T'mer menshe, kay venn pal o Yakob, avenn, te djas o drom, kay o baro Debleskri momeli men sikrell, har te djivas.

O dives, kay o Devel peskri zoor sikrell

⁶ Baro Devel, tou moukal tire menshen. Yon krenn dravepangro koova, har kol menshe, kay venn kotar, kay o kham pre djala. Oun yon hi dourkepangre har i Filistarya. I menshentsa dran vavar themma krenn le čomone vin, oun denn pengro dadeskro vast pre.

⁷ O them Israel hi pherdo roup oun sonakay, oun leskro bravlepen hi yaake boud, te djinell kek, har boud kova hi. Oun o them hi pherde graya, oun lengre kourepangre vourdya nay ginell kek tele.

⁸ Ninna hi o them pherde rhorhene deblen, oun yon vitsrenn pen tele glan kolende, kolen yon pengre vastentsa kran.

⁹ Doleske vell hakeno tiknes kerdo, oun hakeno hounte ladjell pes. Ma biste koy doosh, hoy le ap pende anan!

¹⁰ Dja mank i bare barra, oun khate tout an i čik, i daryatar o baro Deblestar oun glan leskro raylo barepen.

¹¹ Hakeno, kay dikell tele ap o vavareste, hounte dikell tele glan peste i ladjatar. Oun i pre-phourde menshe venn phagedo. Ap ko dives hi kokres o baro Devel baro.

¹² Leskro dives vella, ko dives o baro Deblestar, ko rayestar pral o bolepen oun i phoub. Ap ko dives vell hako pre-phourdo tiknes kerdo, ninna hakeno, kay hadas pes, hakeno kay kras pes bares.

¹³ Ap ko dives venn lauter tiknes kerdo: kol bare cedertikre rouka ap o Libanon oun kol aichtikre rouka an o them Bashan,

¹⁴ ninna i bare berge, kay dour pre djan, oun i tikne berge, hoy pen hadan,

¹⁵ ninna hako baro turmo oun haki zoreli massouri,

¹⁶ i tsele bare shiffe an o baro pani, oun i tsele shoukar bere.

¹⁷ Palle vell lenge kova krik lino, koleha i menshe phourdan pen pre. Oun lengro sharepen ačell gar. Ap ko dives hi kokres o baro Devel o Devel pral halauter.

¹⁸ Oun kol tsele rhorhene deblentsa hi palle hako tsireske trouyel.

¹⁹ Ap ko dives, kay o baro Devel pre stell, te anell lo i traash pral i phoub, khatrenn pen i menshe an i grotte, mank i bare barra oun an i phoub, i daryatar o baro Debleskri rholyatar oun glan leskro raylo barepen.

²⁰ Oun kol roupene oun sonakangre figure, hoy i menshe pen kran, te mangenn le len an, kolen vitsrenn le i kermusenge oun i fledertikre kermusenge koy.

²¹ Oun yon khatrenn pen mank i bare barra oun an i barrengre grotte i daryatar o baro Deblestar oun leskro raylo barepen, te stell lo pre, te anell lo i traash pral i phoub.

²² Moukenn tele i menshendar! Lengro djipen hi yaake tikno har i dourho. Hoy hi le moldo?