Jesaja 18 - O Debleskro Lab 2024 (Sinte-Manouche)

O Debleskre laba pral o them Etiopia

¹ Djungeles djal o themeske Etiopia, ko themeske pash i bare lengste panya, kay yaake boud stepangre hi.

² Kava them bičrell peskre bičepangren pral o baro pani. An tikne shiffe oulerenn le pral i panya. T'mer sik bičepangre, djan pash kol menshende, kay hi baro oun djeteha dren maklo, pash koy natsyona, kolendar i menshe darenna an hake themma, pash kolende, kay bari zoryah i vavarende khetne stakrenn, an kolengro them bare lengste panya nashenna.

³ Denn yak, t'mer menshe, kay ap i phoub djivenn, te rikrell yek o themeskri plarhta pre pral ap i berge, palle denn yak! Oun te phourdell yek an i phourdepaskri, palle shounenn koy!

⁴ O baro Devel penas ap mande: Foun pral dran miro kheer lau an i yak, hoy djala ap i phoub, oun ačau pokones har o tatepen mashkral o dives, oun har i sapeni folka an o tato tsiro, kay o djob dren anlo vell.

⁵ Ap ko tsiro, kay i drake bares venn, glan kova kay le dren lino venn, činell o baro Devel peskro čouryeha i neve kashta tele. Ninna kolla, kay lengsto oun sano hi, dell lo tele.

⁶ Oun kolla lauter moukell lo čiddo i čirklenge, kay mass rhan ap i berge, oun i divye firhenge ap i phoub. Oun kol čirkle rhan kolendar o tselo niyal oun kol divye firhe o tselo vend.

⁷ An ko tsiro venna kol morsha, kay yaake baro oun djeteha dren maklo hi, dran koy natsyona, kolendar i menshe darenna an hake themma, kolla, kay bari zoryah i vavarende khetne stakrenn, oun an kolengro them bare lengste panya nashenna. Yon venna oun anenn kouč koova o baro Debleske, ko rayeske pral o bolepen oun i phoub. Kova anenn le pash i berga Sion, kote kay yob khere hi.