Jesaja 16 - O Debleskro Lab 2024 (Sinte-Manouche)

O them Moab mangell o them Youda, te vell lo lenge ap i rig

¹ Bičrenn bakre dran Sela an o moulo tato them pash o rayeste an o them Youda ap i berga Sion!

² I bičepangre te penenn leske: “I djouvya an Moab hi har čirkle, kay krik tradedo van dran lengro kheer. Pash o lengsto pani Arnon nashenn le kate te kote.

³ Pen menge, hoy hounte kras? Kre čomone! Khate kolen, kay palla lino venn! Rike tire moussya pral lende, yaake har i bourhlo rouk, te vell o dives lenge har i rat, kay venn le gar diklo. Ma phouke ap kolende, kay ap o naashepen hi!

⁴ Mouk kolen, kay dran o them Moab tradedo van, pash toute te djivell. Khate len glan lende, kay len palla lenn.” Ko tsiro vell, kay kek bouder tele rikedo vell, kay o them bouder gar paash dino vell, oun kolla, kay o them khetne stakran, gar bouder hatslo venn.

⁵ Palle vell i rayeskri beshepaskri pre tardo. Oun yek o Davideskre menshendar hi koy pre beshdo, oun hi i lačo ray. Les hi i dji peskre menshenge. Oun hi i čačepaskro ray, kay krell, hoy čačo hi, oun dell hakenes peskro čačepen.

⁶ Mer shounam, hoy pral i Moabarya rakedo vas, kay hi le yaake pre-phourdo, oun dikenn tele ap i vavarende, oun krenn pen kokres bares. Oun len hi i baro mouy.

⁷ O dives vell, kay rovenn le an o them Moab. Halauter rovenna. Lenge hi phares an o dji, te hi len bouder kek drakengre merklia, hoy van kerdo an o foro Kir-Heres. Dino an o dji denn yon gole i doukatar.

⁸ Ap ko harhetikri phoub troul o foro Heshbon vell bouder kek lačo djob bares. Moulo hi kol drakengre rouka pash o foro Sibma. I themengre raya dan i feteder drakengre kashta tele, hoy djan bis pash o foro Yaser. Oun ap yek rig djan i neve kashta bis an o moulo tato them, ap i vavar rig bis pash o Moulo Baro Pani.

⁹ Doleske rovau me khetne kolentsa, kay an o foro Yaser djivenn, rovau pral i drakengre rouka pash o foro Sibma. Boud hi mire sva, hoy rovau pral toute, Heshbon, oun pral toute, Elale. Pral t'mare roukengre oun pral t'mari djob denn kolla gole i barhtyatar, kay kouran pen t'mentsa.

¹⁰ O gipen oun o sapen vell bouder gar shounlo tel i rouka an i baar. An o drakengro them dell bouder kek gole i barhtyatar. Kek mool vell kerdo. Kek gipen vell shounlo.

¹¹ Doleske rovell miro dji pral i menshende an o them Moab. Lauter an mande trissell o foreske Kir-Heres.

¹² Oun ninna te djans i Moabarya pash pengre pre-čidde barra, oun rhačrans firhen pengro debleske, oun marans pen tele leske, oun mangans les an, vals kova čičeske.

¹³ Kalla hi kol laba, hoy o baro Devel glan tsirya pral o them Moab rakras.

¹⁴ Kanna penell yob: An triin bersha – kek dives sikeder oun kek dives palla – vell o Moabeskro bravlepen oun sharepen krik lino. Kol boud menshendar ačenn gar boudeder djido har i vast pherdo. Oun kolla hi gar zorelo.