Jesaja 14 - O Debleskro Lab 2024 (Sinte-Manouche)

I Israelitarya venn pale an pengro them

¹ O baro Devel krell peskro dji peskre menshenge pre. Oun pale rodell lo peske i Israelitaryen vin, oun moukell len an pengro them te djivell. Oun vi-themarya venna oun djivenna khetne lentsa.

² Oun menshe dran vavar themma anenn i Israelitaryen an ko them pale, hoy o baro Devel len das. Oun kol vi-themarya, morsha oun djouvya, venn lengre boudepangre. Oun kolla, kay i Israelitaryen pandles krik lan, kolen lenn yon pandles, oun venn i raya pral kolende, kay rikran len tele.

O baro ray dran Babilonia hi moulo

³ Oun an ko tsiro lell o baro Devel i Israelitaryen vin dran lengre douka oun lengro ropen oun lengri phari boudi, hoy yon hounte kran.

⁴ Palle givenn le kay sapaskri gili pral o baro rayeste pral Babilon: Har nay djal kova? Tou, kay menge i pharo djipen kral, val dino. Kekes nay doukreh bouder.

⁵ O baro Devel phagas tiro kasht, tou čilačo, ava, o rayeskro kasht phagas lo an kotya.

⁶ Tou dal i menshen an boud themma, oun dal oun dal oun moukal gar tele. Divyi rholyah rikral tou len tele, oun lal len palla kek lačepah.

⁷ Kanna dell kova lauter bouder gar. Lačepen oun barht van pale ap i phoub. Hakeno givell i barhtyatar.

⁸ Ninna i cipresstikre rouka hi barhtele pral toute, oun kol cedertikre rouka ap o Libanon penenn: “Yaake rah har tou koy čiddo hal vell kek kay pre, oun dell men trouyel.”

⁹ O tselo moulengro them hi ap i herya oun djinell, te veh. I moulen moukenn le gar te sovell, tou te veh. Kolla, kay bare raya his ap i phoub, ava, i raya pral boud menshende, stenn pre foun pengre rayengre beshepangre.

¹⁰ Oun lauter penenn touke: Ninna an toute ačas kek zoor, touke djas har menge!

¹¹ Tiro raylepen, hoy troul toute his, vas vitsedo an o telstunepen, oun i bashepangre bashrenn bouder gar touke. I kirme hi kanna tiro čiben, oun kirmentsa čakreh tout.

¹² Tou shoukar bolepaskri momeli, har nay vas, kay peral tou tele? Tou, kay stakral i tsele themma tel toute, har djas, kay val ap i phoub tele dino?

¹³ Oun tou penal touke an tiro dji: “Me kamau pre te djal an o bolepen, pral i tsele bolepaskre momlia o Deblestar kamau me miri beshepaskri pre te čivell, oun man beshell kote ap i berga, kay i debla khetne venn, kote kay o kham gar diklo vell.

¹⁴ Me djau doureder pre har i volke hi, oun krau man yaake bares har o Devel, ko pralstouno, hi.”

¹⁵ Ava, tele pash i moulende djal tou, an o telstouno moulengro them!

¹⁶ Kolla, kay dikenn tout, krenn bare yaka, oun nay patsenn kova gar: “Hi kova ko morsh, glan koleste i tseli phoub trissas, oun i tsele rayengre themma bari daryah glan leste trissan?

¹⁷ Hi yob kova, kay dran i phoub i moulo them kras, oun i forya khetne phagas, oun leskre pandlen gar bouder khere moukas?”

¹⁸ I tsele themengre raya van shoukar paskedo, hakeno an peskro moulengro kheer.

¹⁹ Tou hal an i čik vitsedo, har i kotar kasht krik vitsedo hi. Tout hi kek mouleskro kheer, hal rido har kolla, kay van maredo o rhareha, hal vitsedo lentsa an i barrengri phoub oun khetne stakedo.

²⁰ Tou kral tiro them paash, oun maral i menshen an tiro them. Doleske veh tou gar paskedo har kol vavar raya, kay an barrengre khera paskedo van. Oun tiri čilači familya vell bistedo hako tsireske.

²¹ Tire morsh čave hounte merenn! Avenn oun denn len moulo! Yon hounte merenn ko čilačepaske, hoy lengre phoure kran, te nay hadenn le pen gar bouder, oun lenn i phoub penge dren oun krenn penge forya koy pre.

²² O baro Devel, ko ray pral o bolepen oun i phoub, penell: Me hadau man pre ap i menshende an o foro Babilon. Leskro lab vell bistedo. Oun kek lendar ačell djido, vitar gar lengre čave oun čavengre čave.

²³ Me krau dran o foro i sapeni platsa, kay i starhelengre djivenn. Oun khossau o tselo foro krik, har yek i besa lell oun o kheer vin khossell. Kova penau me, o baro Devel, ko ray pral o bolepen oun i phoub.

O Devel dell i Assiryen

²⁴ O baro Devel, o ray pral o bolepen oun i phoub, penas oun das pes sovel: Yaake har me les mange glan lom, yaake krau les ninna. Oun yaake har an miro dji hi te krap, yaake vell ninna.

²⁵ Me dau i Assiryen an miro them, ap mire berge stakrau len khetne, te nay rikrenn le bouder gar mire menshen tele, oun krenn lenge bouder gar i pharo djipen.

²⁶ Yaake his kova an o Debleskro dji te krell lo ap i phoub. Oun leskro vast hadas lo pre, te dell lo i menshen an hake themma pengri phagi.

²⁷ O baro Devel, ko ray pral o bolepen oun i phoub, las pes kova glan. Koon nay krell, te vell kova gar? Leskro vast hi hadedo. Koon nay lell leskro vast pale?

O Devel dell i Filistaryen

²⁸ Kava hi, hoy sikras o Devel o Yesayes an ko bersh, kay o baro ray Ahas meras.

²⁹ T'mer menshe an o them Filistia, ma avenn barhtelo, te vas o kasht, koleha dino van, kanna phagedo. Te merell i sap, vell i djoungleder sap pal leste. Oun lestar vell i vavar sap, hoy hi gomme djoungleder oun nay hadell pes har i čirklo.

³⁰ I čorvelen mire menshendar hi doha te rhal. Oun kolen, kay či hi, nay čivenn pen tele kek daryah. T'men, Filistarya, moukau i bokatar te merell. Oun hoy t'mendar pral ačell, dau moulo.

³¹ Denn zoreles gole, t'mer, kay han tardo pash o foreskre voudya! Rovenn bari golyah, t'mer, kay djivenn an o foro! Trissenn i daryatar an o tselo them Filistia! Foun kotar, kay norden hi, vell yagakro dourho oun boud boud lourde, oun kek kolendar ačell pale.

³² Hoy hounte penas kolenge, kay i Filistarendar bičedo van? Penenn lenge: O baro Devel čivas o foro Sion zoreles pre. Oun kate nay khatrenn pen peskre čorvele menshe kek daryah.