Jesaja 13 - O Debleskro Lab 2024 (Sinte-Manouche)

O Debleskri rholi vell pral o foro Babilon

¹ Kava hi, hoy sikras o Devel o Yesayes pral o foro Babilon. O Yesaya hi o čavo o morshestar Amoz.

² Ap i bari nangi berga čivenn i sikepen pre! Denn zoreles i lourden khetne gole! Sikrenn len i vastentsa, te djan le dren an o foreskre voudya, kay i raya djivenn.

³ Me, o baro Devel, dom mire zorele kourepangren khetne gole. Kolla, kay hadenn man barhteli golyah, čivom mange ap i rig, te anenn le miri rholi pral lende.

⁴ Shounenn i bari gole ap i berge har boud boud menshendar! Shounenn koy bari gole, hoy denn i menshe dran boud themma, kay kate khetne van. O baro Devel, ko ray pral o bolepen oun i phoub, anell peskre lourden o marepaske khetne.

⁵ Dran dour themma venn le koy, i palstouni rigyatar i phoubyatar. O baro Devel vell kolentsa, kay leskri rholi pral o tselo them anenna, te krenn le halauter paash.

⁶ Rovenn, o dives, kay o baro Debleskri rholi vell, hi bouder gar dour. Ap ko dives anell o zorelo Devel bari bibarht pral t'mende.

⁷ Doleske hi i menshen bouder kek zoor, te krenn le čomone, oun daar peras ap lende.

⁸ Oun yon perenn an pende khetne, tserdenn pen khetne i doukatar har i djouvel, te lell li i ternepen. Yek dikell darenes ap o vavareste, oun lengre mouya hi lolo har yag.

⁹ Kanna vell lo, ko dives, kay o baro Debleskri rholi vell! Djungeles hi ko dives, pherdi rholyah. An leskri bari rholi krell o baro Devel i phoub paash, oun tradell i čilačen latar vin.

¹⁰ I bolepangre momlia rhačenn bouder gar. Hi save koy, kay dikeh bouder gar. O kham vell kalo, sik pal kova kay lo pre djas. Oun o čon hi bouder gar djelto.

¹¹ O baro Devel penell: Me anau bibarht ap i phoub, oun moukau o tselo čilačepen, hoy i čilače kran, ap lende pale te vell. I pre-phourden hi bouder či, koleha nay sharenn le pen. Oun me krau kol pre-phourden tikno, kay rikran pengri zoryah kolen tele, kay len kek zoor hi.

¹² Me krau, te ačenn gar boud menshe djido. Tou hounte rodess boudeder, te hatsess yek menshes, har te rodeh pal lačo sonakay. Ava, hi phareder te hatsess menshen har te hatsess o sonakay dran Ofir.

¹³ Me moukau o bolepen te trissell. Oun i phoub ačell bouder gar kote tardo, kay li kanna hi, ap ko dives, kay me, o baro Devel, o ray pral o bolepen oun i phoub, anau miri rholi pral i phoub.

¹⁴ Oun kol vi-themarya, kay djivenn an o foro Babilon, kolla nashenn pash pengre menshende, hakeno an peskro them. Yon hi har vesheskre bouzya, kay tradede hi, oun har bakre, kolen kek bakrengro hi.

¹⁵ Koon an o foro Babilon hatslo vell, vell tele čourye dino. Oun koon tapedo vell, vell o rhareha moulo dino.

¹⁶ Lengre tikne čave venn glan lengre yaka ap bare barra moules vitsedo, oun lengre khera venn vin čoredo, oun lengre romyen taprenn le zoryah an.

¹⁷ Me, o baro Devel, dau i menshenge an o them Media an o dji, te djan le ap kolende pre an o them Babilonia. Kolla denn či ap roup, oun poučenn gar pal o sonakay.

¹⁸ I terne morshen denn le karye moulo pengre bogentsa. Oun len hi kek dji i tikne čavenge; i čave khaytenn len gar.

¹⁹ O Babilon his i shoukester foro mank i rayengre themma. Koleha sharenn pen i Kaldearya. O Devel krell kava foro paash, yaake har lo i forya Sodom oun Gomorra paash kras.

²⁰ Kek djivell bouder an ko foro kek tsireske, oun kek moukell pes bouder kote tele. Kek Arabari čivell kote peskro plarhteno kheer pre. Oun kolla, kay denn yak ap i bakre, moukenn kolen gar kote te rhal.

²¹ Divye firhe dran o moulo them djivenn koy. I khera venn pherde ratsyakre čirkle. Bare divye čirkle djivenn koy, oun divye bouzya khelenn koy.

²² Divye djoukle rovenna an i rayengre khera, kay his yaake shoukar oun raylo. I tsiro o foreske Babilon vas, te lell li peskri phagi. Oun leskre divessa hi trouyel.