Jeremia 9 - O Debleskro Lab 2024 (Sinte-Manouche)

O Yeremia krell i ropaskri gili pral peskre menshende

¹ Te vals man an o moulo tato them i kheer, kay nay ačau, moukoms me mire menshen, oun djoms mange. Yon lauter hi har romma, kay moukan pengre romyen beshdo. Yaake moukan kal phoukepangre o baro Debles.

² Lengri čip hi har i čouri. Lengro rhorhepah van le zoreles an o them. O čačepen rakrenn le gar. Yek čilačo koova pal o vavar krenn le. Man prindjrenn yon gar, penell o baro Devel.

³ Hakeno mou dell pes garda peskro malestar, oun ninna peskro phralestar! Yek phraal dell kol vavar phrales pral i kanda. Oun i maal rakrell djoungeles pral o vavareste.

⁴ Yon lauter rhorhenn pengre malen. Oun kek rakrell laba, hoy čačo hi. Yon penan pengre čipya, te rakrenn le rhorhepen. Pale te pale krenn le čilačepen ap i vavarende,

⁵ Oun moukenn gar tele, te rikrenn le i vavaren tele, oun te rhorhenn le len. Man kamenn le gar te prindjrell, penell o baro Devel.

⁶ Doleske penell o baro Devel, ko ray pral o bolepen oun i phoub: Har o roup an i yag djoudjes kerdo vell, yaake kamau mire menshen doukentsa djoudjes te krell. Dell či vavares, hoy krap me nay mire menshenge.

⁷ Lengro rakepen hi har fayle, hoy anenn o merepen. Peskro mouyeha rakrell hakeno kamles, an o dji lourell yob, har te taprell lo o vavares.

⁸ Dap me save menshen kek phagi, penell o baro Devel. Moukap me kal menshen yaake te djal, oun krap lenge či?

I ropaskri gili pral Youda oun Yerusalem

⁹ Me kamau pral kava them an i berge rovell, oun pral ko zenelo pralstouno them i ropaskri gili te givell. Lauter hi pre-rhačedo. Kek mensho djal koy trouyel. Kek groumya oun bakre denn kote gole. Ninna kol čirkle oun i divye firhe nashan penge, oun moukenn pen bouder gar te dikell.

¹⁰ O baro Devel penell: Me kamau Yerusalem tele te phagell, yaake te ačenn kokres barra pral, oun kay divye djoukle dren djivenna. Oun dran kol forya an Youda krau i moulo them, kay nay djivell kek bouder dren.

¹¹ Me poučom: Baro Devel, hoske rhačell ko them oun vell moulo, yaake kay nay djal kek bouder koy trouyel? Koon hi gosevo oun hayvell kova? Ap koneste penal tou kova, yaake te penell yob kova i vavarenge?

¹² O baro Devel penell koy pre: Me sikrom len miro drom, oun yon moukan les, oun shounan gar ap mire laba, oun djivan gar koy pal.

¹³ Yon kran, hoy lengre čilače djia lenge penan, oun djan o debleske Baal palla, yaake har lengre phoure lende sikran.

¹⁴ Doleske penell o baro Devel, ko ray pral o bolepen oun i phoub, kay o Israeleskro Devel hi: Me dau kal menshen shoutlo zenlepen rhapaske, oun pani, kolestar merenn le.

¹⁵ Me tradau len krik pash menshende, kay prindjrenn yon gar, vitar gar lengre phoure, oun kamau o rharo pal lende bičrell, bis te yon lauter moulo hi.

¹⁶ O baro Devel, ko ray pral o bolepen oun i phoub, penell: Denn garda ap kova, hoy vella! Denn kol djouvyen gole, kay i baro ropen krenna! Bičrenn pal kolende, kay hayvenn ropaskre gilya te givenn!

¹⁷ Pen lenge, te venn yon sik, oun givenn i ropaskri gili pral mende, te nashenn i sva dran mare yaka, oun mare yaka sapeno hi i ropastar.

¹⁸ Shounenn, o ropen vell shounlo an o foro Sion: Ah, har djan yon zoryah ap mende! I ladj vas ap mende! Mer hounte djas dran kava them. Mare khera rhačran yon tele.

¹⁹ Shounenn, t'mer djouvya, o baro Debleskro rakepen! Denn garda ap leskre laba! Sikrenn t'mare čende, har te givenn le koy ropaskri gili; yek te anell i vavarat kay gili pashel:

²⁰ An mare khera vas o merepen, an i vorhya djas lo dren. I čave ap i dromma meran, oun i terne morsha hi moulo čiddo ap i platse.

²¹ O baro Devel penell: Kol moule menshe ačenn čiddo har foul ap i harhetikri phoub, har o djob, hoy činlo vas, oun čiddo ačas pal o činepaskro, oun kek las les khetne.

Har te sharess tout

²² I gosevo te sharell pes gar, kay yob gosevo hi. I zorelo te sharell pes gar, kay yob zorelo hi. I bravelo te sharell pes gar, kay yob bravelo hi.

²³ Koon kamell pes te sharell, kova te sharell pes, kay yob prindjrell man, oun te hayvell yob, kay me o baro Devel hom. Me krau miro dji pre i menshenge, oun krau, hoy čačo oun mishto hi ap i phoub. Savo koova hi mishto glan mire yaka. Kova penau me, o baro Devel.

I Israelitarya djivenn, har te vans le gar o Debleskre menshe

²⁴ Shounenn, penell o baro Devel, ko tsiro vell, kay dau hakenes i phagi, kay činlo hi ap peskro mass, oun djivell, har te vals lo gar činlo:

²⁵ kol menshe an i themma Egiptia, Youda, Edom, Ammon oun Moab, oun lauter kolla, kay činenn pengre balla trouyel tele, oun djivenn an o moulo tato them. Ninna te hi yon oun i tsele Israelitarya činlo ap pengro mass, djivenn le, har te vans le gar činlo.