Jeremia 7 - O Debleskro Lab 2024 (Sinte-Manouche)

O rakepen o Yeremiyestar an o Debleskro kheer

¹ O baro Devel rakras ap o Yeremia oun penas:

² Dja oun čip tout an ko voudar o baro Debleskro kherestar, oun pen i menshenge kal laba: T'mer lauter dran o them Youda, kay djan kate dren, te mangenn o baro Debles an, shounenn o baro Debleskro lab!

³ Kova penell o baro Devel, ko ray pral o bolepen oun i phoub, – yob hi o Israeleskro Devel: Moukenn t'maro phouro drom oun t'maro phouro djipen, palle moukau t'men an kava them te djivell.

⁴ Ma patsenn kol rhorhene laba, te penenn yon: Kate hi o baro Debleskro kheer, kay djivell lo. Ava, kate hi o baro Debleskro kheer!

⁵ Moukenn t'maro phouro drom oun t'maro phouro djipen, oun avenn lačo ap hakeneste!

⁶ Ma rikrenn kolen tele, kay hi dran i vavar them, vitar gar kol čaven, kay len kek dad bouder hi, oun kol romyen, kay len kek rom bouder hi! Ma denn kol menshen ratles, kay kek čilačepen kran! Ma nashenn vavar deblenge palla. Yon anenn t'men an i bibarht.

⁷ Palle kamau me hako tsiro pash t'mende djivell ap kay platsa, an kava them, hoy me t'mare phourende dom.

⁸ T'mer patsenn rhorhene laba. Kova hi čičeske.

⁹ T'mer han čorepangre oun marepangre, kay denn vavaren moulo, t'mer morsha rhorhenn t'mare romyen vavar djouvyentsa, t'mer djouvya, rhorhenn t'mare romen, vavar morshentsa, t'mer denn t'men sovel oun rikrenn koya gar dren, t'mer rhačrenn firhen o rhorheno debleske Baal oun nashenn pal vavar deblende.

¹⁰ Oun palle venn t'mer glan mande an kava kheer, hoy mange kerdo vas, oun penenn: Menge nay djal či. Oun krenn savo koova doureder, hoy rhoyran man.

¹¹ Kava kheer, hoy mange kerdo vas, hi kava t'menge i kheer, kay i čorepangre pengro čoredo koova khatrenn? Mishto, palle dikau me kova ninna yaake, penell o baro Devel.

¹² Djan pash ko foro Shilo, kay glan rah tsiro miro kheer tardo his. Oun dikenn, hoy me kote krom doleske, kay mire menshe Israel čilačepen kran.

¹³ T'mer kran ninna lauter savo koova, penell o baro Devel. Oun me rakrom pale te pale t'mentsa, oun t'mer kaman gar te shounell. Oun me dom t'men gole, oun t'mer penan koy pre či.

¹⁴ Doleske krau me kava khereha, har me ko foreha Shilo krom, ninna te vas kava kheer mange kerdo, oun t'mer patsenn, kote nay djal t'menge či. Me krau koy platsa paash, hoy dom t'men oun t'mare phouren.

¹⁵ Oun me tradau t'men mandar krik, har me t'mare phralen krik tradom, oun kol tsele menshen dran Efrayim.

O Devel kamell gar shounell, hoy mangell o Yeremia i menshenge Israel

¹⁶ Tou, Yeremia, mangess gar oun rovess gar glan mande kal menshenge, vitar gar peness mange, hoy len ap o dji hi, oun hoy len hounte vell, oun stakress lenge pash mande vitar gar dren. Me kamau t'men gar an-shounell.

¹⁷ Dikeh tou gar, hoy yon krenna an kol forya an Youda oun ap kol dromma an Yerusalem?

¹⁸ Kol čave rodenn kasht, kol dada krenn yag, i djouvya krenn merklia koy bolepaskri rayetsake. Oun kol vavar deblenge anenn yon pipaske, te rhoyrap me man koy pral.

¹⁹ Mange krenn yon koveha kek douka, penell o baro Devel. Ap pende kokres anenn le ladj.

²⁰ Doleske penell o baro Devel, maro ray: Miri bari rholi vell pral kava foro, pral i menshende oun pral i firhende, pral kol rouka an o veesh oun pral ko djob an kava them. Miri rholi hi har i yag, hoy kek nay krell vin.

O Devel kamell i menshendar, te shounenn le ap leste, oun gar te rhačrenn le leske firhen

²¹ Kova penell o baro Devel, ko ray pral o bolepen oun i phoub, kay hi o Israeleskro Devel: Hoske rhačrenn t'mer firhen mange? Čivenn len pash kol vavarende, hoy rhan t'mer khetne glan mande! Rhan ko tselo mass!

²² Ap ko dives, har anom t'mare phouren dran o them Egiptia, penom lenge gar, te anenn yon mange firhen rhačepaske, vitar kek, hoy hounte rhan le glan mande.

²³ Me penom lenge: Shounenn ap miro lab, palle kamau me t'maro Devel te vell, oun t'mer han mire menshe. Djan ap ko drom, kay me t'menge penom, palle djal t'menge mishto.

²⁴ Yon shounan gar ap mande, oun lengre kanda pandan le, oun djivan pal lengro shero, oun kran hoy lengro čilačo dji penella, oun sikran mande pengro doumo, oun gar pengro mouy.

²⁵ Foun ko dives, har me t'mare phouren dran Egiptia anom bis kay dives, bičrom pale te pale mire boudepangren pash t'mende, kol rakepangren, kay mire laba doureder penan.

²⁶ T'mer shounan gar ap mande, oun dan kek garda ap mire laba. T'mer djan pal t'maro shero, oun kran boudeder čilačepen har t'mare phoure.

²⁷ Te peneh tou, Yeremia, lenge kova lauter, shounenn yon gar ap toute. Te deh tou len gole, penenn yon či koy pre.

²⁸ Doleske pen ap lende: t'mer han kal menshe, kay shounan gar ap lengro baro Debleste. Oun t'mer moukenn t'men či te penell. O čačepen hi moulo. Kek rakrell bouder pral o čačepen.

I menshe krenn baro čilačo koova an i tala Hinnom

²⁹ Čin tire lengste balla tele, oun vitse len toutar krik! Gib i ropaskri gili ap i berge! O baro Devel hi rhoyedo pral kal menshende, oun tradell len pendar krik, oun kamell lendar či te djinell.

³⁰ Kol menshe an o them Youda krenn, hoy mange djoungeles hi, penell o baro Devel. Yon čivan kol djoungele deblen an kava kheer, hoy mange kerdo vas, oun kran les pale-čiddo.

³¹ Oun kran an koy tala Ben Hinnom i rhačepaskri, hoy kharell Tofet, te rhačrenn yon pengre čaven oun čen. Savo koova penom me lenge gar. Oun kova vas mange gar an o shero.

³² “Doleske vell ko tsiro”, penell o baro Devel, “kay penenn le gar bouder Tofet oun Ben Hinnom ap koy tala. Palle kharell koy tala tala, kay van le maredo. Kote paskrenn le pengre moulen, kek vavar platsa hi bouder koy.

³³ Čirkle oun divye firhe rhan kol moule menshen pre, oun kek tradell len krik.

³⁴ Oun o them Youda vell i moulo them. An lengre forya oun ap kol dromma an Yerusalem givell oun sal kek bouder i barhtyatar. Oun koy barhteli gole o pirnestar oun i pirnyatar shounah mer bouder gar.”