Jeremia 6 - O Debleskro Lab 2024 (Sinte-Manouche)

I lourde hi troul Yerusalem

¹ T'mer menshe dran o kheer Benyamin, nashenn dran Yerusalem! oun phourdenn koy phourdepaskri an Tekoa! Krenn i yag ap i berga Bet-Kerem, te vell o yagakro dourho i sikepen! Bari bibarht oun merepen vell kotar, kay norden hi.

² Tou, shoukar foro Yerusalem, ko tsiro hi koy, kay veh paash dino.

³ Bare raya pengre lourdentsa venna pral toute har bakrengre pengre bakrentsa. Kolla čivenn pengre plarhtene khera troul toute pre. Hakenes hi i platsa peskre lourdenge.

⁴ Yon penenna: Stas pre, te kouras men o foreha! Te djas pre yaake rah har mashkral o dives hi! – Na-a, i rati kamell te vell, oun sik vell tamlo.

⁵ Palle djas ap i rati, oun kras lengre rayle khera paash.

⁶ Kava penell o baro Devel, o ray pral o bolepen oun i phoub: Denn i rouka tele an o foro Yerusalem, oun krenn i drom, hoy djal pre ap o foreskri massouri o forestar Yerusalem! An kava foro hi či har čilačepen dren. Doleske lell lo peskri phagi.

⁷ Yaake har dran i brounna o pani vella, yaake vell dran o foro o čilačepen. I gole kolendar, kay venn zoryah tele rikedo oun doukedo, shounau. Menshe lenn glan mande dava oun venn maredo.

⁸ Yerusalem, mouk tout trad te dell! Te shouneh tou gar, krau me miro dji touke pandlo. Oun dran toute krau i nango them, kay kek nay djivell bouder.

⁹ O baro Devel, ko ray pral o bolepen oun i phoub, penas ap mande: Yaake har i harho douy, triin kope peskre drake tele činell, te lell lo ninna kolla tele, hoy pral ačan, yaake djas tou pale pash kolende, kay an Israel pral ačan, te aness len pash mande.

¹⁰ Koneha rakrap me? Koneske penap toutar? Koon shounella koy pre? Lengre kanda hi pandlo. Yon nay shounenn gar, hoy tou lenge kameh te penell, oun san pral tire laba, oun rhoyrenn pen pral lende.

¹¹ Tiri rholi pral lende rhačell ninna an mande. Me nay rikrau lat gar pale. Koy penas o baro Devel ap mande: Palle čore miri rholi pral lende vin: pral kol čavende ap o drom, oun pral kol terne morshende. Yon lauter, morsha oun djouvya, ninna kol phoure oun an-dikle, venn pandles krik anlo.

¹² Lengre khera lenn kol vavar, ninna lengre themma oun lengre djouvyen. Me hadau miro vast, te marap kolen, kay djivenn an kava them, penell o baro Devel.

¹³ Kol baren oun kol tiknen hi bok ap bravlepen, hoy gar lengro hi. Oun o Debleskre rakepangre oun i rashaya rhorhenn i menshen,

¹⁴ oun krenn yaake, har te vans kol douka mire menshendar gar yaake pharo. Yon penenna: Lauter hi mishto, lauter hi mishto, ninna te hi či mishto.

¹⁵ Yon hounte ladjans pen ko djoungelo koveha, hoy yon kran. Kova krenn le gar. Yon ladjenn gar. Yon djinenn gar, hoy ladj hi. Doleske venn yon maredo khetne kol vavarentsa. Te vau me, oun dau len i phagi, ačell kek lendar djido, penell o baro Devel.

¹⁶ O baro Devel penas lenge: Ačenn tardo ap ko drom, kay t'mer djan! Dikenn oun poučenn pal i phoure dromma! Hatsenn vin, havo drom anell t'menge lačepen! Oun djan kava drom! Palle vell shoukapen an t'mare djia. Yon penan: Kova kamah mer gar te krell.

¹⁷ Ninna dom t'men menshen, kay denn yak ap t'mende. Denn garda koy pre, te phourdenn le i phourdepaskri, hoy sikrella: Bibarht vella … Yon penan: Mer kamah len gar te shounell.

¹⁸ Doleske shounenn, t'mer menshe an i tsele themma: Denn garda, hoy kal menshentsa krau!

¹⁹ I menshe ap i tseli phoub hounte shounenn kova. Me kamau bibarht pral kal menshende te anell. Ap mire laba denn le kek garda, oun djan gar ap miro drom. Doleske lenn le pengri phagi.

²⁰ Me poučau či pal o soungepaskro koova dran o them Saba, oun pal ko goudlo soungepaskro djet, hoy vell dran i dour them. Kol firhe, hoy t'mer mange rhačrenna, kamau me gar. Oun ap kol firhe, hoy t'mer mange marenna, dikau gar lačes.

²¹ Doleske penell o baro Devel: Me kamau kal menshenge boud barra an o drom te čivell, te perenn i morsha oun lengre čave koy pral. Oun ninna kolla, kay djivenn pash lende, oun lengre mala venn maredo.

²² Kova penell o baro Devel: Denn garda: Boud menshe venna dran lengro them, hoy kote čiddo hi, kay norden hi. Ava, boud menshe krenn pen ap o drom an ko dour them, te djan le an o kourepen.

²³ Lengre lourde kourenn pen i bogentsa oun i rharentsa. Yon hi midjak oun len khaytell kek. Ap graya klissenn le i golyah, hoy yaake baro hi har i gole, hoy o baro pani krell. Yon venna, te kourenn le pen touha, tou foro Sion!

²⁴ Mer shounam lendar, oun mare moussya peran menge tele. Oun i bari traash vas ap mende. Men hi bare douka har i djouvel, kay i ternepen lella.

²⁵ Ma djan ap t'maro kotar them, kharell yek ap o vavareste! Ma nashenn ap i drom! I lourde venna haki rigyatar oun marenn hakenes pengre rharentsa.

²⁶ T'mer, mire menshe, t'menge penau: Rivenn gone ap t'mende! Čivenn t'men an i yagakri čik! Rovenn har te merals t'maro čavo, oun t'men kek vavar hi! Givenn i ropaskri gili! Kol marepangre perenn ap yek kopo pral mende.

²⁷ O baro Devel penas ap mande: Me kamau, te djas tou pash mire menshende, oun dikess, hoy yon krenna, oun har yon djivenna.

²⁸ Yon djan lauter penge krik mandar, oun rakrenn djoungeles yek pral o vavareste. Djia dran saster hi len. Yon lauter djivenn an o rhorhepen.

²⁹ Mire menshe hi har čiklo roup. O bob rhačas zoreles, kay o roup djoudjo kerdo hounte vals. Ko čik vas gar vin. Djoudjo roup ačas gar pral. Lauter his čičeske. Mire menshe hi yaake čilačo, te vell nay o čilačepen gar dran lende vin.

³⁰ Doleske venn le kharedo: Ko roup, hoy molell či. O baro Devel kamell bouder či lendar te djinell.