Jeremia 47 - O Debleskro Lab 2024 (Sinte-Manouche)Laba pral i Filistarende 1 Glan ko tsiro, kay o Farao ko foro Gaza khetne das, rakras o baro Devel ap peskro rakepaskro, o Yeremia, pral i Filistarende. 2 Kava penell o baro Devel: Dik, panya venna koy rigyatar, kay norden hi. Oun kolla venna i divyo zorelo lengsto pani, hoy čakrell kava tselo them tel peste, oun halauter hoy koy dren hi, i forya oun kol menshen, kay kote djivenna. Oun i menshe an kava them denn gole oun rovenna. 3 Yon shounenn, har i herya kol zorele grayendar kote pre stakrenna, oun koy bari gole, hoy i rade lengre kourepangre vourdyendar krenn. Koy lenn le yaake daar, te dikenn pen i dada gar trouyel pal pengre čavende. 4 Ko dives vas, kay nashrenn i tsele Filistarya pengro djipen. Kek ačell djido, kay nay vals kol foryenge Tirus oun Sidon ap i rig. O baro Devel marell kol Filistaryen, kolla kay ačan kolendar pral, kay van dran ko panyeskro them Kreta. 5 Pral o foro Gaza vell o ropen, oun o foro Ashkelon vell khetne dino. T'mer, kay ačan pral o menshendar Anak, har rah kamenn t'men an o mass te činell? 6 Tou, o baro Debleskro rharo, kaana kameh tou pre te herell? Mouk tele oun dja pale an tiri possita, oun ač pokones! 7 Har nay moukell o rharo tele? O baro Devel hi kova, kay penas leske, te vell lo pral o foro Ashkelon, oun kay bičras les pash kolende, kay djivenn pash o baro pani. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.