Jeremia 43 - O Debleskro Lab 2024 (Sinte-Manouche)

O Yeremia vell an o them Egiptia anlo

¹ Har o Yeremia i tsele menshenge halauter penas, hoy lengro baro Devel leske penas, te penell lo lenge,

² rakran pre-phourde morsha leha – mank lende his o Asarya, koleskro dad o Hoshaya his, oun o Yohanan, koleskro dad o Karea his – oun penan ap leste: Tou rhorheh! Maro baro Devel bičras tout gar pash mende, te peness menge: “Ma djan an o them Egiptia, oun ma djivenn kote!”

³ O Barouk, koleskro dad o Neriya hi, kova rakras an toute dren, te penal savo koova. Yob kamell, te peras an o vast i lourdendar dran Babilonia, te marenn le men oder te anenn men pandles an o them Babilonia.

⁴ Oun o Yohanan, oun i tsele pralstoune lourde, oun i tsele vavar menshe dran o them Youda shounan gar ap kova, hoy o baro Devel lenge penas, te ačenn le an o them Youda.

⁵ O Yohanan oun i tsele pralstoune lourde lan halauteren khetne pash pende, kay pral ačan dran o them Youda, oun kolla kay nashan penge an vavar themma, oun palle khere van, te djivenn le an o them Youda.

⁶ Kolla his morsha, djouvya oun čave. Mank lende his ninna o baro rayeskre ča, oun kol vavar halauter, kay moukas o Nebouzaradan pale pash o Gedalya, koleskro dad o Ahikam his, koleskro dad o Shafan his. O Nebouzaradan his o pralstouno lourdo, kolendar kay dan yak ap o Neboukadnezar. Mank kolende, kay khetne lino van, his ninna o Debleskro rakepaskro, o Yeremia oun o Barouk, koleskro dad o Neriya his.

⁷ Oun yon djan an o them Egiptia. Oun yaake shounan le gar ap kova, hoy o baro Devel lenge penas. Oun yon van an o foro Tapanes.

O Yeremia dikell glan-vi, kay vell o Neboukadnezar peskre lourdentsa an o them Egiptia dren

⁸ Oun kote an o foro Tapanes, penas o baro Devel ap o Yeremia:

⁹ Le bare barra oun čip len an i phoub pash o voudar, kay djal an o Faraeskro kheer an o foro Tapanes! Kre kova yaake, te dikenn i morsha dran o them Youda, hoy tou kreh!

¹⁰ Oun pen ap lende: Kava penell o baro Devel, ko ray pral o bolepen oun i phoub, kay o Israeleskro Devel hi: Shounenn, me dau o Neboukadnezares kate gole. Yob, ko baro ray dran o them Babilonia, krell miri boudi. Pral ap kal barra, hoy moukom an i phoub te čivell, moukau leskro shoukar plarhteno kheer pre te čivell, kay lo beshdo hi oun sikrell, kay yob o baro ray hi.

¹¹ Yob peskre lourdentsa vell dren an o them Egiptia oun vell o zorleder. Palle merenn boud menshen, vavar venn pandles lino, oun vavar o rhareha maredo. Hakeno vell yaake tapedo har leske glan-vi diklo hi

¹² Oun me moukau kol khera te rhačrell, hoy i Egiptarya pengre deblenge kran. Oun lengre debla moukau pandles krik te anell. Oun yob krell o them Egiptia djoudjo i rhorhene deblendar yaake har i bakrengro i djouva vin lell dran peskri plaashka. Oun palle djal lo doureder oun kek rikrell les pre.

¹³ Oun yob phagell i bare barra pash o foro Bet-Shemesh an kotya. Oun i khera i deblentsa rhačrell lo tele an o them Egiptia.