Jeremia 4 - O Debleskro Lab 2024 (Sinte-Manouche)

Avenn pale pash mande!

¹ O baro Devel penell: T'mer Israelitarya, te kamenn t'maro čilačo drom te moukell, palle avenn pash mande! Te lenn t'mer kol djoungele deblen glan mire yaka krik, hounte nashenn bouder gar yek rigyatar ap i vavar.

² Te denn t'men sovel oun penenn: Me dau man sovel pash o djido Debleste … oun t'mer rhorhenn gar koy pashel, oun rikrenn t'maro lab, palle poučenn mandar i menshe an i vavar themma, te čivap miri barht ap lende, oun yon sharenn pen, kay prindjrenn yon man.

³ Kova hi, hoy penell o baro Devel i menshenge an Youda oun an Yerusalem: Lenn i nevo kotar phoub oun phagenn i phoub pre! Ma vitsrenn o djob mank i soubyengro zenlepen!

⁴ Rikrenn t'men ap i laba, hoy t'mentsa vin krom! Oun krenn t'mare djia mange pre, t'mer menshe an Youda oun Yerusalem. Te krenn kova gar, vell miri rholi pral t'mende har yag, oun rhačella yaake, te nay krell kek koy yag vin.

⁵ Denn zoreles gole an Youda, kharenn vin an Yerusalem, oun penenn: Phourdenn koy phourdepaskri an o tselo them! Denn vin gole, te venn le an i zorele forya khetne!

⁶ Čivenn i sikepen pre ap o drom, hoy sikrell o drom an Sion! Nashenn oun ačenn gar tardo, me anau bari bibarht oun baro ropen, hoy vell kotar, kay norden hi.

⁷ I marepaskro, hoy marell i menshen an boud themma, stas pre. Har i levo, hoy vell dran o veesh, kras lo pes ap o drom, te dell yob t'maro them paash oun rhačrell t'mare forya yaake, kay nay djivell kek koy dren.

⁸ Doleske rivenn t'men an i gono! Rovenn oun denn gole! O baro Devel las peskri bari rholi gar mendar krik.

⁹ O baro Devel penell: Ko dives vella, kay trashenn o baro ray oun i pralstoune pral Israel. O Debleskre rakepangre oun leskre rashaya djinenn gar bouder, hoy te penenn le.

¹⁰ Koy penom me: Baro Devel, miro ray, tou rhorhral kol menshen an Yerusalem an, har tou penal, kay kek kourepen mashkral lende vell. O rharo hi koy oun kamell len moulo te dell.

¹¹ An ko tsiro vell kol menshenge an Yerusalem penlo: I zorelo tatepen vell dran kol berge dran o moulo tato them pash t'mende. Kova hi kek phourdepen, hoy phourdell o phouss oun o čik krik,

¹² na-a, ko phourdepen, hoy lenge bičrau, hi boud zorleder. Palle dau len lengri phagi.

¹³ Dik, har volke vell ko marepaskro. Leskre kourepangre vourdya hi sik har i phourdepen, oun leskre graya hi sikeder har i adlari. Havi bibarht! Mer ham nashedo!

¹⁴ Yerusalem, te kameh vin lino te vell, palle thob tiro čilačepen tiro djiyestar tele! Har rah kameh tou ko čilačepen an tiro shero te rikrell?

¹⁵ Shounenn, bičepangre venna dran o foro Dan oun dran i berge Efrayim, oun rakrenn pral ko čilačo koova, hoy vella.

¹⁶ Denn i menshen trad! Penenn kolenge an o foro Yerusalem: kourepangre venna dran dour themma, oun denn pengro kourepaskri gole vin, te lenn le i forya an o them Youda dren.

¹⁷ Yon čivenn pen trouyel o foro Yerusalem, har kol morsha, kay denn garda ap i kotar phoub. T'mer menshe an Yerusalem moukan t'menge či mandar te penell. Kova penell o baro Devel.

¹⁸ Hoy t'mer kran oun har djivan, anas t'menge kova dren. Kova vell dran t'maro čilačepen, te djal t'menge yaake djoungelo, oun djal t'menge an t'maro dji.

O Yeremia vell nasselo dran kova, hoy lo dikell

¹⁹ Har doukell man kova, havi daar hi an mande! Miro dji djal zoreles an miro beč, me nay ačau gar pokones; me shounau koy phourdepaskri, oun ko kourepaskri gole.

²⁰ Yek foro pal i vavar vell dino. O tselo them denn le paash. Ap yek kopo hi mire oun plarhtene khera khetne dino.

²¹ Har rah hounte dikap me kol kourepangro sikepen, oun shounap koy phourdepangri gole?

²² O baro Devel penell: Mire menshe hi divyo, oun patsenn man gar. Dinelo hi le, man prindjrenn le gar. Har dinele čave hi le, kay či hayvenn. Gosevo doha hi le, te krenn le čilačepen. Har yon lačepen krenna, djinenn le gar.

²³ Me dikom ap kay phoub. Koya his moulo. Kek djipen his koy. Me dikom an o bolepen. Kova his tamlo.

²⁴ Me dikom ap kol bare oun tikne berge. Kolla trissan.

²⁵ Me dikom pal i menshende. Oun kek his bouder koy. Ninna kol čirkle djan penge krik.

²⁶ Me dikom pal ko lačo them. Kova vas i moulo them. Oun i tsele forya his paash čiddo glan o baro Debleste oun leskri zoreli rholi.

²⁷ O baro Devel penas: Ninna te vell kay tseli phoub har i moulo them, kamau gar lauter paash te krell.

²⁸ I phoub rovella, oun o bolepen rivell pes an kalepen. Me, o baro Devel penom, hoy kamau te krell, oun kova khaytell man gar, oun moukau gar kolestar tele.

²⁹ Dran kol tsele forya nashenn le penge glan koy gole kol lourdendar, kay klissenn ap i graya, oun kolendar, kay denn karye, oun nashenn an pesse vesha oun khatrenn pen mashkral i barra. Hako foro vell mouklo čiddo. Kek djivell bouder koy dren.

³⁰ Yerusalem, tou hal dino! Hoy kreh tou? Tou riveh kouč lole koola ap toute, čiveh sonakay ap toute, oun makeh tire yaka an. Tou kreh tout shoukar čičeske! Tire pirne kamenn tout gar bouder, oun kamenn tout moulo te dell.

³¹ Me shounau i gole, har i djouvyatar, kay lell o ersto kopo i ternepen. Kaya hi koy gole o forestar Sion, kay taprell pal dourho, oun peskre vasta pre hadell, oun gole dell: Me hom nashedo! Kolla venna oun denn man moulo!