Jeremia 37 - O Debleskro Lab 2024 (Sinte-Manouche)

O Sedekya moukell o Yeremiyes te kharell

¹ O Sedekya, koleskro dad o Yosia his, vas o baro ray pral o them Youda. Koles čivas o baro ray dran Babilonia, o Neboukadnezar, dren, te vell lo baro ray pal o Konya. Kova his o čavo o Yoyakimestar.

² O Sedekya oun i pralstoune troul leste oun kol vavar menshe an o them shounan gar ap i laba, hoy o baro Devel ap peskro rakepaskro, o Yeremia, penas, te penell lo len lenge doureder.

³ Oun o baro ray Sedekya bičras o Youkal, koleskro dad o Shelemya his, ninna o rashayes Sefanya, koleskro dad o Maasseya his, pash o Yeremia oun moukas leske te penell: Mange maro baro Debles menge, i Israelitarya!

⁴ O Yeremia djas an ko tsiro pash i menshende dren oun vin, oun vas gomme gar an o stilepen vitsedo.

⁵ An ko tsiro djan i lourde o Faraestar dran o them Egiptia vin. Har o Babilonarya, kay glan o foro Yerusalem pre tardo his, kova shounan, tserdan le pen pale dran o foro Yerusalem.

⁶ Oun kote penas o baro Devel ap peskro rakepaskro, o Yeremia:

⁷ Kova penell o baro Devel, kay o Israeleskro Devel hi: Pen o baro rayeske dran o them Youda, kova kay bičras t'men pash mande, te poučenn man: Kol lourde o Faraestar, kay djan vin dran pengro them, te venn le ap t'mari rig, kolla djan pale khere an o them Egiptia.

⁸ Oun i Babilonarya venn kate pale oun rikrenn kava foro an pengro vast, oun lenn kava foro penge dren, oun rhačrenn kava fores tele.

⁹ Doleske penell o baro Devel: Rhorhenn t'men gar oun penenn t'menge gar: “I Babilonarya venn gar pale kay.” Yon venna pale kay.

¹⁰ Te nay marans t'mer ninna i tsele lourden dran o them Babilonia khetne, kolla kay kourenn pen t'mentsa, oun te ačans lendar kokres i vast pherdo pral, kay doukedo hi, palle stakrans le dran pengre plarhtene khera pre, oun rhačrans kava fores tele.

O Yeremia vell stildo

¹¹ Har i egiptikre lourde pash Yerusalem van, moukan i Babilonarya o foro Yerusalem.

¹² Koy kamas o Yeremia dran o foro Yerusalem vin te djal an o them Benyamin, te rakrell lo peskre menshentsa pral kova, hoy yek, kay meras, lenge palla moukas, oun hoy hakeno lella.

¹³ Har yob pash o Benyamineskro Voudar vas, his kote i lourdo, kay das garda, koon dren te vin nashella. Kova kharas Iria, leskro dad his o Shelemya, koleskro dad his o Hananya; o Iria das garda ap ko voudar, oun rikras o Yeremiyes peske vastentsa pre, oun penas: Tou kameh pash i Babilonarya vergel te nashell.

¹⁴ Kote penas o Yeremia: Kova hi gar čačo, me kamau gar pash i Babilonarya vergel te nashell. O Iria kamas gar ap o Yeremia te shounell, oun tapras les oun anas les pash i pralstoune morshende.

¹⁵ I pralstoune van rhoyedo ap o Yeremia, oun moukan les dava te dell, oun vitsran les an o stilepen an o kheer o morshestar Yonatan. Kova his i morsh, kay hayvas lila te činell; dran koleskro kheer kran le i stilepen.

¹⁶ Yaake vas o Yeremia stildo an i isema dour tele an kava kheer. Kote ačas lo boud divessa.

O Sedekya poučell čorrhanes o Yeremiyes

¹⁷ I dives vas, kay moukas o baro ray Sedekya les čorrhanes pash peste te anell, oun poučas lestar: Hi tout i lab o baro Deblestar? Oun o Yeremia penas: Ava, man hi i lab touke: Tou veh an o vast o baro rayestar dran o them Babilonia dino.

¹⁸ Palle poučas o Yeremia o baro rayestar Sedekya: Hoy krom me touke oun tire pralstunenge, oun havo čilačepen krom ap kal menshende kate, kay vitsran le man an o stilepen?

¹⁹ Kay hi kanna t'mare dikepangre, kay penan t'menge glan-vi, te vell o baro ray dran o them Babilonia gar pral t'mende, oun vitar gar pral kava tselo them?

²⁰ Miro pralstouno oun ray, mouk miro mangepen glan toute te vell! Oun shoun, hoy toutar mangau! Ma mouk man pale te anell an o kheer o Yonatanestar, kova kay činell i lila. Kova vals miro merepen!

²¹ Kote moukas o baro ray Sedekya te penell, te rikrenn le o Yeremia ap koy platsa stildo, kay rikran pen i lourde pre. Oun yob moukas leske hako dives i maro te anell, kotar kay o maro peklo vas, yaake rah bis te his bouder kek maro an o foro. Yaake ačas o Yeremia ap koy platsa stildo.