Jeremia 34 - O Debleskro Lab 2024 (Sinte-Manouche)

O Sedekya vell pandlo oun leskro merepen vell glan-vi penlo

¹ Kava hi ko lab, hoy o baro Devel ap o Yeremia penas, an ko tsiro har o Neboukadnezar, ko ray dran o them Babilonia, peskre tsele lourdentsa troul o foro Yerusalem tardo his. Ninna troul i vavar forya an o them Youda his le tardo. Oun gar kokres dran o them Babilonia his le, na-a ninna dran kol tsele vavar themma, pral kolende o Neboukadnezar o ray his.

² Koy penas o baro Devel, kay o Israeleskro Devel hi, ap o Yeremia: Dja pash o Sedekya, ko rayeste pral o them Youda, oun pen leske: Kova penell o baro Devel: Me dau kava foro an o vast o baro rayestar dran o them Babilonia, oun yob rhačrell les tele.

³ Oun ninna tou nay nasheh gar glan leskro vast krik. Na-a tou veh tapedo oun an leskro vast dino. Tou dikeh les tire yakentsa oun rakreh leha mouy ap mouy. Oun palle veh an o them Babilonia anlo.

⁴ Sedekya, tou kay hal ray pral o them Youda, shoun ap o baro Debleskro lab! Kava penell o baro Devel pral toute: Tou te meress gar o rhareha,

⁵ na-a, tou mereh an o lačepen. Oun yaake har kran i menshe tire phourenge, kay glan toute bare raya his, yaake krenn le ninna touke: Yon krenn i yag oun rhačrenn soungepaskro koova, te sharenn le tout. Oun denn gole o ropah: “Maro ray meras!” Me, o baro Devel, penau kova.

⁶ Oun o Debleskro rakepaskro, o Yeremia, penas kol tsele laba ap o Sedekya, ko rayeste pral o them Youda, an o foro Yerusalem.

⁷ An ko tsiro his i lourde o rayestar dran o them Babilonia tardo troul o foro Yerusalem oun troul i forya Lakish oun Aseka; kokres kal forya Lakish oun Aseka his gomme gar dren lino kol tsele zorele foryendar an o them Youda.

I phagi kolenge, kay moukan gar lengre boudepangre te djal

⁸ Kava hi ko lab, hoy o baro Devel ap o Yeremia penas, pal ko tsiro, kay o baro ray Sedekya i menshentsa an o foro Yerusalem vin kras, te moukenn le i tsele ginle boudepangre vin,

⁹ kolla, kay Hebrearya hi, morsha oun djouvya, yaake te hounte boudrell kek yekeske peskre menshendar.

¹⁰ Oun i pralstoune oun i tsele vavar menshe, kay penan ava ap kova, kran ninna yaake, oun moukan pengre boudepangren te djal.

¹¹ I tsiro koy pal, kaman le pengre boudepangren pale pale, kolen kay moukan yon te djal. Oun yon lan len zoryah pale pale, te venn le pale boudepangre pash lende.

¹² Kote penas o baro Devel ap o Yeremia:

¹³ Kava penell o baro Devel, kay o Israeleskro Devel hi: Me krom t'mare phourentsa vin, har anom len dran o them Egiptia vin, kay yon pandle boudepangre his,

¹⁴ te moukell hakeno peskro ginlo boudepaskres te djal, kova, kay i vavar Israelitari hi, oun kay bikras pes leske, oun boudras leske shob bersha. An o eftato bersh hounte moukas lo les te djal. T'mare phoure shounan gar ap mande, oun rikran pen gar ap mire laba.

¹⁵ T'mer van pale ap miro drom, oun kran, hoy glan mire yaka mishto hi, oun moukan vin gole te dell, te venn kol boudepangre vin mouklo, kay hi Israelitarya. Oun t'mer dan t'men sovel, glan mande an ko kheer, kay mange kerdo vas, te krenn kova yaake.

¹⁶ Oun kanna rikran gar, hoy t'men sovel dan, oun kran, har te vals miro lab či moldo! Hakeno t'mendar kamell kol morshen oun djouvyen pale, kay leskre boudepangre his, oun kolen yob moukas te djal, te nay djan le penge kote, kay le kaman. Kanna lell lo len zoryah pale pale, te venn le pale leskre pandle boudepangre.

¹⁷ Doleske penell o baro Devel: T'mer shounan gar ap mande oun moukan t'mare phralen oun phenyen gar vin te djal, kay ninna Israelitarya hi har t'mer, doleske moukau me, o baro Devel t'men te djal, te venn maredo o rhareha, merenn ap o djoungelo nasslepen oun i bokatar. Te dikenn i menshe an tsele themma ap i phoub, hoy t'mentsa djal, denn le i vasta pral o shero khetne.

^18-19 Kol pralstoune pral o them Youda oun pral Yerusalem oun pral o rayeskro kheer, ninna i rashaya oun kol tsele vavar, yon his koy pashel, har o terno gouroum an douy kotya činlo vas. Oun yon djan mashkral kol douy kotya vergel, te sikrenn le, te kamenn le kova te rikrell, hoy lentsa vin krom. Oun yon rikran pen gar ap kova, oun rikran kol laba gar dren, hoy yon pen glan mande sovel dan. Doleske kamau ap lende yaake te krell, har ap ko terno gouroum kerdo vas.

²⁰ Oun me dau len an i vasta kolendar, kay kamenn len te marell, oun lenge ap o djipen djan. Oun lengro moulo mass vell o rhapen i čirklenge oun i divye firhenge.

²¹ Ninna o Sedekya, ko ray pral o them Youda, oun leskre pralstoune, kolen dau an i vasta kolendar, kay kamenn len te marell. Kol lourde o baro rayestar dran Babilonia, kay t'mendar krik djan, an kolengre vasta dau len.

²² Ava, me kharau len pale kay, oun anau len pale glan kava foro, penell o baro Devel. Yon venn troul kava foro tardo, oun lenn kava fores penge dren, oun rhačrenn les tele. Oun kol forya an o them Youda moukau yaake khetne te dell, te venn le har i moulo them, kay nay djivell bouder kek dren.