Jeremia 29 - O Debleskro Lab 2024 (Sinte-Manouche)

O Yeremiyeskro liil ap i pandlende an o them Babilonia

¹ O Debleskro rakepaskro, o Yeremia, činas i liil ap i phourende, kay pral ačan kolendar, kay pandles krik anlo van, oun ap i rashayende oun o Debleskre rakepangre oun ap i tsele menshende, kolen o Neboukadnezar an Yerusalem pandles las oun an o them Babilonia anas.

² Yob činas kava liil pal kova, kay o baro ray Yekonya oun leskri day krik anlo van khetne kol pralstunentsa dran o baro rayeskro kheer oun i pralstunentsa dran o them Youda oun dran o foro Yerusalem. Ninna kol boudepangre an Yerusalem, kay hayvenn mishto te boudrell o kashteha oun o sasteha van lentsa krik anlo.

³ O Yeremia das peskro liil kol douy morshenge peha, o Elasa, koleskro dad o Shafan his, oun o Gemarya, koleskro dad o Hilkiya his. Kolen bičras o baro ray pral Youda, o Sedekya, an o them Babilonia pash o baro rayeste pral Babilonia, o Neboukadnezar. An ko liil his tardo:

⁴ O baro Devel, ko ray pral o bolepen oun i phoub, kay o Israeleskro Devel hi, penell ap i pandlende, kolen moukas yob an Yerusalem pandles te lell oun an o them Babilonia te anell:

⁵ Krenn t'menge khera, oun djivenn koy dren! Čivenn rouka oun zenlepen an i phoub, oun rhan hoy kote bares vell!

⁶ Romedinerenn oun lenn čaven! Lenn romyen t'mare morsh čavenge, oun rodenn t'mare čenge morshen, te romedinerenn le, oun anenn čaven oun čen ap i phoub! Avenn boud oun gar tikneder!

⁷ Rodenn koy pal, te djal mishto o foreske, kay moukom t'men te anell. Oun mangenn ko foreske mandar lačepen! Te djal o foreske mishto, djal t'menge ninna mishto.

⁸ O baro Devel, ko ray pral o bolepen oun i phoub, kay o Israeleskro Devel hi, kova penell: Ma moukenn t'men te rhorhell kolendar, kay penenn glan-vi, hoy vella: kol rakepangre, kay pash t'mende hi, oun kol dourkepangre. Ma shounenn ap lengre sounya!

⁹ Yon rakrenn rhorhepen an miro lab. Me bičrom len gar, penell o baro Devel.

¹⁰ Kova penell o baro Devel: Ap ko tsiro, kay hi i Babilonarya efta-deesh bersha i raya pral t'mende, dikau me pale ap t'mende, te rikrap miro lačo lab oun anau t'men pale khere.

¹¹ Djinau mishto, hoy man t'menge an o shero hi: lačo koova oun gar čilačo koova, te djal t'menge yaake har t'mer kamenna.

¹² Te denn t'mer man an-gole oun venn oun mangenn mandar, palle shounau me ap t'mende.

¹³ T'mer rodenn man oun hatsenn man. Te rodenn man t'maro tselo djiyeha,

¹⁴ palle moukau man t'mendar te hatsell, penell o baro Devel. Oun me lau t'men dran t'maro pandepen vin, oun anau t'men khetne dran i tsele menshende oun themma, kay tradom t'men, penell o baro Devel. Oun me anau t'men pale an kava them, kay moukom t'men krik te anell.

¹⁵ T'mer penenn, kay o baro Devel das t'men peskre rakepangre ninna an o them Babilonia. –

¹⁶ Shounenn, hoy o baro Devel penell pral o baro rayeste, kay ap o Davideskri beshepaskri beshdo hi, oun pral kol menshende an kava foro, kolla kay t'mare phrala hi, kay van gar t'mentsa pandles krik anlo.

¹⁷ O baro Devel, ko ray pral o bolepen oun i phoub penell: Me bičrau kourepen, bok oun nasslepen mank lende, oun krau lentsa, har te vans le djoungele fayge, hoy nay rhal kek.

¹⁸ O kourepen, i bok oun o nasslepen lenn len palla. Oun i menshe dran i tsele themma ap kay phoub denn i vasta khetne pral o shero, te dikenn le len. An hako them, kay tradau len, dikenn le ap lende har ap praasede menshende, kolendar darenn le. Oun yon denn shol pral lende oun praasenn len.

¹⁹ Kova vell pral lende doleske, kay shounan le gar ap kol laba, hoy mire rakepangre lenge pale te pale penan. Yon kaman gar te shounell, penell o baro Devel.

²⁰ Kanna shounenn, t'mer lauter dran o foro Yerusalem, kay pandles krik anlo han an o them Babilonia! Shounenn, hoy moukell o baro Devel t'menge te penell:

²¹ Kova penell o baro Devel, ko ray pral o bolepen oun i phoub, kay o Israeleskro Devel hi: O Ahab, koleskro dad o Kolaya his, oun o Sidkiya, koleskro dad o Maasseya his, kolla douy rakran rhorhepen ap t'mende an miro lab. Doleske dau len an i vasta o baro rayestar Neboukadnezar dran Babilonia. Kova moukell len moulo te dell glan t'mare yaka.

²² I tsiro vell, kay penenn i menshe dran o them Youda, kay krik anlo van an Babilonia, te kamenn yon yekes te praasell: Mou krell o baro Devel touha, har kras lo ap o Sidkiya oun ap o Ahab, kolen moukas o baro ray dran Babilonia djides te rhačrell.

²³ Koy phagi vas ap lende doleske, kay kran le i vi-ladjedo koova an Israel, oun lan penge romyen, kay romedino hi, oun penan an miro lab čomone glan-vi, hoy rhorhepen his, hoy me lenge gar an o mouy čivom. Me djinau, hoy le kran, me dikom les, penell o baro Devel.

O Yeremia oun o Shemaya

²⁴ Oun ap o Shemaya dran o foro Nehelam hounte peness:

²⁵ Kova penell o baro Devel, ko ray pral o bolepen oun i phoub, kay o Israeleskro Devel hi: Tou bičral an tiro lab lila ap i Israelitarya an o foro Yerusalem, oun kek penas touke, te kress kova. Kal lila bičral ap o rashayeste Sefanya, koleskro dad o Maasseya his, oun ap i tsele vavar rashayende. An kal lila penal o rashayeske Sefanya:

²⁶ O baro Devel rodas tout vin, te vess o rashay pal o rashayeste Yoyada. Tou vess o pralstouno an o baro Debleskro kheer, te čivess kol tsele narvelen pandles, kay venna oun penenn, te hi le Debleskre rakepangre, oun penenn čomone glan-vi. Tou čivess lengre pire an kashta oun sasterne shelle troul lengri meen.

²⁷ Kanna, de koy phagi o Yeremiyeste dran Anatot, kay pash t'mende glan-vi penell, hoy vella.

²⁸ Yob bičras menge i liil an o them Babilonia, oun moukas menge te penell: T'mer hounte ačenn i rah tsiro koy. Krenn t'menge khera oun djivenn koy dren! Čivenn rouka oun zenlepen an i phoub, oun rhan, hoy ap lende bares vella.

²⁹ Ko liil, hoy o Shemaya činas, draveras o rashay Sefanya glan o Debleskro rakepaskro, o Yeremia.

³⁰ Koy pal penas o baro Devel ap o Yeremia:

³¹ Biče i liil ap i tsele Israelitaryen, kay van anlo an o them Babilonia, oun mouk lenge te penell: Kova penell o baro Devel pral o Shemaya dran o foro Nehelam: O Shemaya das glan, te hi lo miro rakepaskro, oun me bičrom les gar. Yob kras, te patsan t'mer leskro rhorhepen.

³² Doleske dau me, o baro Devel, leste oun leskri familyate i phagi. Kek lendar ačell djido mank kal menshende. Oun yob dikell gar ko lačepen, hoy krau ap mire menshende. Peskro rakepah anas yob mire menshen mandar krik. Kova penell o baro Devel.