Jeremia 23 - O Debleskro Lab 2024 (Sinte-Manouche)

Čilače bakrengre oun i lačo baro ray

¹ Bibarht ap t'mende, t'mer pralstoune, kay hounte vans har bakrengre mire menshenge, oun moukenn len nashedo te djal, oun rikrenn len gar khetne.

² Doleske penell o baro Devel, ko Devel pral o Israel, ap i pralstunende, kay hounte dans garda ap leskre menshende: T'mer rikran mire menshen gar khetne. Yon hi har bakre, kay van kate te kote tradedo. T'mer dan gar garda ap lende. Kanna dau me garda, te lenn t'mer t'mari phagi ko čilačepaske, hoy kran.

³ Oun me lau khetne kolen, kay djido ačan mire menshendar dran i tsele themma, kay tradom len. Me anau len pale khere. Kote djal lenge mishto, oun yon venn pale boud menshe.

⁴ Oun me dau pralstunen pral lende, kay hi har lače bakrengre: Yon denn garda ap lende, te hounte darenn oun trashenn le bouder gar. Kek bakro djal bouder nashedo. Kova penell o baro Devel.

⁵ Ko dives vella, penell o baro Devel, kay moukau dran o Davideskri familya i morsh bares te vell. Kova hi an o čačepen tardo. Yob vell i lačo baro ray, oun rikrell pes ap o Debleskro čačepen, oun krell hoy mishto oun čačo hi an o them.

⁶ An leskro tsiro vell o Youda vin lino dran i čilače vasta, oun o Israel nay djivell kek daryah. Oun i menshe denn les o lab o baro Devel krell men čačo.

⁷ O dives vell, penell o baro Devel, kay vell gar bouder sovel dino kal labentsa: … pash o djido Debleste, kay las i Israelitaryen vin dran o them Egiptia.

⁸ Na-a, yon penenna: … pash o djido Debleste, kay las i Israelitaryen vin dran ko them, hoy kote čiddo hi, kay norden hi, ninna dran kol tsele vavar themma, kay yob len tradas. Palle djivenn yon pale an pengro them.

O Yeremia rakrell ap i rhorhene rakepangre

⁹ Kova penas o Yeremia ap kol rakepangre, kay hounte rakrans o Debleskre laba, oun krenn kova gar: Miro dji kamell te phagell an mande. Mire tsele kokale trissenn. O baro Devel rakras mantsa. Oun leskre laba, hoy lo penas, kran, te nay rikrau man bouder gar ap i herya. Me vom har mato har yek kay hi mato i molyatar.

¹⁰ O tselo them hi pherdo kolentsa, kay moukan o baro Debles. Doleske hi i praasepen ap o them čiddo: Kek brishin dell, oun o zenlepen merell tele. Či har čilačepen hi an lengro shero, oun an o rhorhepen hi le zorelo.

¹¹ O baro Devel penell: Mire rakepangre shounenn gar ap mande, vitar gar mire rashaya. Lengro čilačo koova hatsau ninna an miro kheer.

¹² Doleske vell ko drom, kay le djan har i sapeno drom an o tamlepen, kay venn le tradedo oun perenn. Me moukau bibarht pral lende te vell an ko tsiro, kay dau len i phagi. Kova penell o baro Devel.

¹³ Kova, hoy dikom pash mire rakepangre an Samaria, hi i djoungelo koova mange. Yon penan laba glan-vi, kolendar penan le, kay van le o deblestar Baal. Oun yaake anan le mire menshen Israel o čačo dromestar tele.

¹⁴ Ko djoungelo koova, hoy dikau pash mire rakepangre an Yerusalem, hi gomme bareder: I morsha rhorhenn pengre romyen, oun i djouvya pengre romen; yon rakrenn rhorhepen, oun krenn i čilačen zorelo. Yaake rikrenn le i menshen pale, te moukenn le pengro čilačo drom. Kal rakepangre hi yaake čilačo har i menshe an Sodom oun Gomorra his.

¹⁵ Doleske penell o baro Devel, ko ray pral o bolepen oun i phoub, pral lende: Kol rakepangre an Yerusalem kran, te kamenn i menshe an o tselo them či bouder mandar te djinell. Doleske dau me kal rakepangren rhapen te rhal oun pani te piyell, hoy krell len nasselo.

¹⁶ Kova penell o baro Devel, ko ray pral o bolepen oun i phoub: Ma shounenn ap i laba, hoy kol rakepangre penenn! Yon rhorhenn t'men, oun rakrenn pral dikepen, hoy vell dran lengre djia oun gar o baro Deblestar.

¹⁷ Kolenge, kay san pral o baro Debleskro lab, penenn le: T'menge djal mishto an ko tsiro, hoy vella! Oun kolenge, kay djan pal pengro shero, penenn le: Kek bibarht vell pral t'mende.

¹⁸ Kek kal morshendar his tardo glan o baro Debleste oun dikas oun shounas, hoy lo penas. Kek lendar das yak ap leskre laba oun hayvas len.

¹⁹ Shounenn: O baro Debleskri rholi vell yaake pral t'mende, har i baro dourho pral i phoub phourdell. I zorelo phourdepen djal tele ap i sherya i čilačendar.

²⁰ O baro Debleskri rholi moukell gar tele, bis te kras lo, hoy les glan his. I tsiro vell, kay hayvenn t'mer kova.

²¹ [O baro Devel penell:] Ninna te bičrom me kal rakepangren gar, nashenn le pash t'mende. Ninna te rakrom gar lentsa, penenn le laba glan-vi.

²² Te vans yon glan mande tardo an miro tsillo, rakrans yon mire laba mire menshenge, oun penans lenge, te moukenn le pengro čilačo drom oun pengro čilačo koova, hoy kran le.

²³ Me hom i Devel, kay ap i tseli phoub hi, oun gar ap yek platsa.

²⁴ Kek nay khatrell pes yaake čorrhanes, te dikau les gar, penell o baro Devel. Kek platsa hi an o bolepen oun ap i phoub, kay me gar hom. penell o baro Devel.

²⁵ Me shounom mishto, hoy kal rakepangre rakrenn, har penenn yon rhorhepen glan-vi oun penenn: Kova vell o baro Deblestar. Me dom les souni. An i souni penas o Devel kova mange.

²⁶ Har rah kamenn le savo koova te krell? Har rah penenn kal rakepangre rhorhepen glan-vi, hoy vell dran lengro dji oun gar mandar?

²⁷ Yek penell o vavareske peskri souni. Oun koleha krenn le, te bistrenn man mire menshe yaake, har bistran man lengre phoure, har mangan le o debles Baal an.

²⁸ Te dell i rakepaskro souni, mou penell lo peskri souni! Kova, kay lell i lab mandar, kova te penell ko lab mishto doureder! Me, o baro Devel penau t'menge: O phouss oun o djob hi gar o emligo koova. Yaake hi vitar gar emligo ko rakepen, hoy kol rhorhene rakepangre rakrenna, oun o rakepen, hoy mandar vella.

²⁹ Miro rakepen hi har i yag, oun har i depaskro saster, hoy barra phagell.

³⁰ Doleske, penell o baro Devel, djau me ap kol rakepangre pre, kay čorenn i lab yek o vavarestar, oun penenn: Kova vell o baro Deblestar.

³¹ Ava, me djau ap kolende pre, kay rakrenn, hoy dran lende vell, oun penenn: Kova penas o baro Devel.

³² Me kourau man kolentsa, kay rhorhene sounya rakrenna, oun anenn mire menshen o čačo dromestar tele lengro rhorhepah oun dinelo rakepah. Me bičrom len gar, oun dom len kek lab, te penenn le kova doureder. Yon molenn či mire menshenge, penell o baro Devel.

³³ O baro Devel penas ap o Yeremia: Te poučell toutar yek mire menshendar, i rakepaskro oder i rashay: Hoy penas o baro Devel touke, hoy phares ap toute čiddo hi? Palle peness: T'mer han phares ap mande čiddo. Kamau te vitsrap t'men krik mandar, penell o baro Devel.

³⁴ Te penell i rhorheno rakepaskro, i rashay oder i vavar: Man hi i lab o baro Deblestar, hoy hi phares ap mande čiddo, palle dau me i phagi koleste oun leskri familyate.

³⁵ Kova hi, hoy hounte poučenn t'mer yek o vavarestar: Hoy penas o baro Devel, har rakral leha? Havo lab hi les menge?

³⁶ Ma penenn bouder: Man hi i lab o baro Deblestar, hoy phares ap mande čiddo hi. Kova, hoy hi phares čiddo ap i mensheste, vell i menshendar oun gar o baro Deblestar. Ma krenn savo koova i labentsa o djido Deblestar! Yob hi o ray pral o bolepen oun i phoub, oun maro Devel.

³⁷ Poučenn kolestar, kay penell, te hi lo i Debleskro rakepaskro: Hoy penas o baro Devel touke, har rakral leha? Havo lab hi les menge?

³⁸ Te shounenn t'mer gar ap mande oun kharenn savo lab i pharo koova, hoy o baro Devel ap t'mende čivas,

³⁹ palle djinenn, me hadau t'men pre har i pharo koova, oun vitsrau t'men krik mandar, t'men oun t'maro foro, hoy dom t'mende oun t'mare phourende.

⁴⁰ Oun me anau ladj oun praasepen ap t'mende, hoy ačell hako tsiro ap t'mende, oun vell gar bistedo.