Jeremia 20 - O Debleskro Lab 2024 (Sinte-Manouche)1 Ko rashay Pashour, koleskro dad o Immer his, his o pralstouno an o baro Debleskro kheer. Har yob shounas, hoy o Yeremia rakrell, 2 das lo les, oun pandas leskre herya an i kotar kasht pash o voudar, hoy kharell Benyamineskro Voudar, oun hi pash o baro Debleskro kheer. 3 Oun ap o vavar dives moukas o Pashour o Yeremiyes dran o kasht vin. Koy penas o Yeremia ap leste: O baro Devel dell tout gar bouder Pashour gole. Tou khareh kanna Traash ap hakeneste. 4 Kova penell o baro Devel: Tou aneh traash ap toute oun ap tire malende. Yon venn maredo o rhareha kolendar, kay kourenn pen lentsa. Oun tou dikess kova tire yakentsa. Oun me kamau i tsele menshen an o them Youda an o vast o baro rayestar dran o them Babilonia te dell. Kova anell i kotar lendar pandles an Babilonia oun dell i vavaren moulo o rhareha. 5 Ko tselo bravlepen an kava foro dau me kolen, kay len vin randenn. I tsele love, hoy i menshe an Yerusalem dran pengri boudi khetne anan oun lengro kouč koova oun o tsele bravlepen kol rayendar pral o them Youda lenn le pentsa oun anenn les an o them Babilonia. 6 Oun tou, Pashour, veh tapedo khetne kolentsa, kay pash toute an o kheer hi, oun pandles an Babilonia anlo. Kote hounte meress oun veh paskedo tire tsele malentsa, kay ginal lenge rhorhepen dren. O Yeremia dell gole ap o baro Debleste 7 Baro Devel, tou rakral yaake rah ap mande dren bis te krom, hoy tou kamal. Tou hal zorleder har me. Kanna vom lenge sapaske, oun hakeno sal man vin. 8 Hako kopo, te rakrau, hoy tou mange penal, hounte dap gole: Marepen oun doukepen! Doleske san le pral mande hako dives oun taprenn pen ap o shero. 9 Ava, te penau mange, me kamau o Debles te bistrell, oun rakrau bouder gar an leskro lab, palle rhačell leskro lab an mande har i yag. Me lau miri tseli zoor khetne, te rikrap kova vin. Oun kova djal gar. 10 Me shounau, har boud menshe čorrhanes rakrenna: “Yob krell menge či har traash. Anas doosh ap leste! Sikras les an!” Ninna mire mala lourenn koy pre, te perap. “Dikas, te anas les yaake dour, te penell yob čomone, hoy gar mishto hi. Palle dah les pale, hoy lo mentsa kras!” 11 O baro Devel hi pash mande oun dell ap mande garda har i zorelo morsh. Doleske perenn kolla, kay man palla lenn oun hounte tserdenn pen pale. Kova, hoy len glan hi, nay krenn yon gar. Oun vavar san pral lende. Hako tsiro hi kova lenge i ladj oun vell lenge gar bistedo. 12 Baro Devel, tou ray pral o bolepen oun i phoub, tou prindjreh lauteren, kay ap toute rikrenn. Tou dikeh, hoy an lende hi, prindjreh lengre djia. Mouk man te dikell, har tou kolen i phagi deh, kay man palla lan. Me dom miro koova an tire vasta. 13 Givenn o baro Debleske! Sharenn les, yob lell o čorveles dran i vasta i čilačendar. O Yeremia hi bibarhtelo 14 Bibarht ap ko dives, kay vom boldo! Kek te penell, kay anas ko dives barht, kay miri day man ap i phoub anas. 15 Bibarht ap ko morsheste, kay kras miro dades barhtelo, har penas lo leske: Touke vas i morsh čavo boldo. 16 Ko dives te vell har kol forya, kay o baro Devel paash kras, oun kolla les gar khaytan. Taysarlake mou shounell lo ropen oun mashkral o diveske o kourepaskri gole. 17 Doleske kay moukas yob man gar te merell an miri dakro per, yaake te vals miri dakro per har i moulengro kheer mange, oun yoy ačals hako tsiro an vavar koova. 18 Hoske vom dran miro dakro per vin, te dikap ropen oun douka, oun djivap hako dives an ladj? |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.