Jeremia 2 - O Debleskro Lab 2024 (Sinte-Manouche)

O Israel moukas o baro Debles

¹ O baro Devel penas ap mande:

² Dja koy, oun rake glan i tsele menshende an o foro Yerusalem, oun pen: Kova penell o baro Devel: Israel, me djinau, har ap mande rikral har terno hals, oun har kamal man har i pirni peskro pirnes, oun har tou mantsa djal an o moulo tato them, an ko them, kay či bares vell an i phoub.

³ An ko tsiro hals mange kokres koy, yaake har o nevo djob mange hi. Koon tout an-tapras, anas doosh ap peste, oun i bibarht vas pral leste. Kova penell o baro Devel.

⁴ Shounenn o baro Debleskro lab, t'mer Israelitarya, t'mer, o Yakobeskre menshe!

⁵ Kova penell o baro Devel: Havo djoungelo koova hatsan t'mare phoure ap mande, kay djan yon mandar krik, oun mangan figuren an, kay kek devel hi. Oun yaake djan le tele.

⁶ Oun poučan pen gar: Kay hi o baro Devel, kay anas men dran o them Egiptia vin, oun djas glan mende an o moulo tato them, an ko divyo oun trouk them, kay či har santa oun barra hi, kay kek drom hi, oun kek mensho djivell?

⁷ Oun me anom t'men an i lačo them, kay boud rhapen hi, te rhan ko tselo lačo koova, hoy kote baro vella. Oun har t'mer an ko them djan, kran les t'mer pale-čiddo. Oun miro them vas djoungeles glan mire yaka.

⁸ T'mare rashaya poučan gar: Kay hi o baro Devel? Har penan le i menshenge, hoy te krenn le, rikran le pen gar ap mire laba. Oun kol pralstoune pral mire menshende hadan pen pral mande, oun shounan bouder gar ap mande. Oun mire rakepangre, kay hounte penans mire laba doureder, rakran an o lab ko rhorheno deblestar Baal, oun mangan figuren an, kay kek devel hi.

⁹ Doleske hounte anap t'mari doosh ap t'mende, oun ap t'mare čavende oun kolengre čavende.

¹⁰ Djan pral o baro pani pash i panyeskre themma, kay kol Kitarya djivenn, oun dikenn t'men trouyel! Bičrenn morshen an o them Kedar oun lenn i menshen kote ninna an o yak! Krenn yon savo koova har t'mer kran?

¹¹ Ninna te hi lengre debla kek čače debla, lenn yon kek vavar deblen an! Mire menshe, kay miro raylepen dikan, yon paran man dren yekeha, kay kek devel hi, oun koles kek zoor hi.

¹² Dare tou, bolepen, oun tout vell traash pral kava koova, penell o baro Devel.

¹³ Mire menshe kran čomone, hoy douy kope čilačo hi: Man, ko djido pani moukan yon, oun hadan penge panyeskre rhebya vin, kay paash hi, oun nay rikrenn kek pani.

¹⁴ Hi o Israel i ginlo boudepaskro? Hi lo i boudepaskro, kay pandles boldo vas, kay nay hakeno krell leha, hoy kamella?

¹⁵ O levo dell gole pral leste, dell zorelo gole oun krell leskro them paash. Oun leskre forya venn pre rhačedo yaake, kay nay djivenn kek koy dren.

¹⁶ Ninna činenn kol menshe dran Memfis oun Tapanes touke i tsele balla tiro sherestar tele.

¹⁷ Kova lauter hi tiri doosh! Boud kope kamas o baro Devel, tiro ray, tout ap o čačo drom te anell. Oun tou moukal les!

¹⁸ Hoy hi tout kolestar, te djah an o them Egiptia, oun kameh koy dran o pani Nil te piyell? Oun hoy hi tout kolestar, te djah tou an o them Assour oun kameh dran o pani Eufrat te piyell?

¹⁹ Dran tiro čilačepen vell kova ap toute. Tou shounal gar. Doleske leh tou savi phagi. Tou hounte djiness oun hayvess, havo pharo koova oun douka ap koleste venna, kay djal peskro baro Deblestar krik, oun kamell lestar bouder či te djinell. Kova penell o baro Devel, ko ray pral o bolepen oun i phoub.

²⁰ O baro Devel penell: Hako tsiro hadal tout pral mande, oun kamal mange gar palla te djal. Tou penal: Me kamau kek ray pral mande. Oun čival tout koy har i loubni ap i berga tel hako zenelo rouk.

²¹ Me čivom tout dren har i vi-rodedo drakengro rouk, i lačo shoukar rouk. Oun hoy vas kanna dran toute? I divyo djoungelo rouk!

²² Tou nay thoveh tout yaake boud har kameh, oun leh ko zorlester sapouni! Ko čilačepen, koleha tout pale-čiddo kral, ačell glan mire yaka, penell o baro Devel, maro ray.

²³ Har nay peneh tou: Me krom man gar pale-čiddo? Me nashom gar kol deblenge palla, hoy kharenn Baal. Dik ap toute, hoy tou kreh an i tala! Ma biste, har djival! Har i khamela, kay hi bipandlo, nasheh tou trouyel,

²⁴ har i divyi bourika an o moulo them, te dell yoy gole oun nashell trouyel an lakro bipandlo tsiro, oun kek nay rikrella pre. Koon lat kamell, hounte rodell gar dour. Yoy moukell pes sik te hatsell an ko tsiro.

²⁵ Israel, de garda ap tire herya, te nashess len gar doukenes, oun ap tiro mouy, te vell lo gar trouk! Tou peneh: Rike man gar pre! Me kamau kol menshen dran vavar themma, oun hounte nashap lenge palla.

²⁶ Har i čorepaskro hounte ladjell peske, te vell yob tapedo, yaake hounte ladjenn penge kol menshe an o them Israel, ninna kol bare raya, oun pralstoune oun rashaya oun Debleskre rakepangre,

²⁷ kolla, kay ap i debla penenna: “Tou hal miro dad!” oun ap i barrengre debla: “Tou anal man ap i phoub.” Mange sikran le pengro doumo oun gar pengro mouy. Te vell kanna i bibarht pral lende, denn le gole: “Ray! Ab ap mari rig!”

²⁸ Kay hi t'mare debla, kay t'menge kran? Mou stenn yon pre, oun lenn t'men vin dran t'mari bibarht! T'mer menshe an o them Youda, t'men hi yaake boud debla har forya!

²⁹ T'mer kamenn man i doosh te dell. T'mer han kolla, kay peran lauter mandar tele, penell o baro Devel.

³⁰ Koy tseli phagi, hoy dom t'men, his čičeske. T'mer moukan t'men gar te tserdell. Mire rakepangren, kay pash t'mende bičrom, maran t'mer. T'maro rharo rhas len har i rhoyedo levo.

³¹ O baro Devel penell: T'mer čilače menshe! Denn garda ap kova, hoy me t'menge penau! Hom me i Israelenge i moulo them, i them, kay kek pani hi? Hoske penenn mire menshe: Mer nay djah, kay kamah, oun hounte nashas touke gar bouder gar pal.

³² Nay bistrell i terni čay peskro sonakay, i terni djouvel, kay kamell romedinerell, peskro biyabeskro ripen? Na-a! Mire menshe bistrenn man pale te pale.

³³ Har sik hatseh tou i drom, te less touke i vavar pirnes! Oun yaake djas tou pale te pale ap čilače dromma.

³⁴ Ninna hatsan le ap tire koola o rat i čorvelendar, kay kran kek čilačepen, oun kay tou gar koy pashel tapral, kay phagan le an tiro kheer dren. Ninna te kral tou kova lauter,

³⁵ peneh tou: Me krom či. O baro Devel hi bouder gar rhoyedo ap mande. Djiness, me dau tout i phagi koleske, kay tou penal: Me krom kek čilačepen.

³⁶ Har sik djal tou kay te koy, te rodess touke menshen, kay krenn pen touha khetne? O them Egiptia nay vell tout gar feteder ap i rig har o them Assour.

³⁷ O tsiro vella, kay djah tou kotar krik, oun deh tire vasta pral o shero khetne i ladjatar; o baro Devel kamell či lendar te djinell, ap konende tiro dji čival, oun lentsa hi tout kek barht.