Jeremia 19 - O Debleskro Lab 2024 (Sinte-Manouche)

O paash-dino khoro

¹ O baro Devel penell: Dja pash ko morsheste, kay krell pirya, oun gin touke i khoro! Oun le touha pralstunen oun phoureder rashayen.

² Oun dja vin an koy tala Ben-Hinnom, kay glan ko foreskro voudar hi, kay i paash-dine pirya čiddo hi. Oun pen i menshenge kol laba, hoy me touke penau.

³ Oun pen: Shounenn o baro Debleskro lab, t'mer bare raya pral o them Youda oun menshe an Yerusalem. Yaake penell o baro Devel, ko ray pral o bolepen oun i phoub, kay o Israeleskro Devel hi: Shounenn, me kamau bari bibarht pral kava foro te anell, kay hakeno, kay shounell kova, leskre kanda doukenna.

⁴ Mire menshe moukan man oun kran kava kotar them pale-čiddo, har rhačran le soungepaskro koova vavar deblenge, kolen prindjrenn yon gar oun vitar gar lengre phoure. Ninna kol bare raya pral o them Youda prindjran len gar. An kava foro maran le menshen, kay kek čilačepen kran.

⁵ Oun ko rhorheno debleske, hoy kharell Baal, kran le rhačepaskre platse, te rhačrenn le pengre čaven leske. Kova penom me lenge gar. Savo koova vas kek tsiro an miro shero, te penoms ap lende: Krenn kova.

⁶ Doleske vell i tsiro, kay penenn yon ap kay platsa gar bouder Tofet oun tala Hinnom. Yon penenn koy pre marepaskri platsa.

⁷ Hoy kol menshe an o them Youda oun an Yerusalem penge glan lenn, moukau me gar te vell. Me moukau kolen pral lende te vell, kay kamenn len te marell, oun krau, te venn le moulo dino o rhareha. Oun kol moulen dau i čirklende oun i divye firhende rhapaske.

⁸ Me kamau savi bari bibarht pral kava foro te anell, kay hakeneske, kay dikell kova, o rakepen krik ačella oun yob pral leste sala.

⁹ Kol lourde, kay kamenn len te marell, čivenn pen troul o foro oun pandenn les dren. Koy vell savo čilačo tsiro, kay kol menshe an ko foro yek i vavares pre rhan, ninna pengre čaven rhan yon pre.

¹⁰ Tou dess ko khoro paash glan kol morshengre yaka, kay touha djan.

¹¹ Pen ap lende: Kova penell o baro Devel, ko ray pral o bolepen oun i phoub: Me dau paash kal menshen oun kava foro, har deh zoryah i khoro yaake paash, kay nay kreh kova gar bouder tselo. Oun i menshe paskrenn i moulen ap i platsa Tofet, – kek vavar platsa hi lenge koy.

¹² Yaake krau me kava foreha oun kol menshentsa, kay djivenn koy, te vell kava foro har koy platsa Tofet. Kova penell o baro Devel

¹³ Oun kol khera an Yerusalem oun kol khera kol bare rayendar an o them Youda, kolla venn ninna pale-čiddo har koy platsa Tofet, – i tsele khera, kay yon pral pre i tsele bolepangre momelenge soungepaskro koova rhačran oun i vavar rhorhene deblenge mool vin čoran.

O Yeremia vell dino oun stildo

¹⁴ Oun o Yeremia djas pale dran Tofet, kay bičras les o baro Devel koy, te penell yob o Debleskre laba. Oun djas ap koy glanstouni platsa glan o baro Debleskro kheer, oun penas ap i tsele menshende:

¹⁵ O baro Devel, o ray pral o bolepen oun i phoub, kay o Israeleskro Devel hi, penell: I menshe an Yerusalem oun an i gaba oun forya trouyel pandan pengre djia, oun kamenn mire laba gar te shounell. Doleske anau pral lende koy tseli bibarht, hoy lenge glan-vi penom.