Jeremia 17 - O Debleskro Lab 2024 (Sinte-Manouche)

O baro Devel dell o themeske Youda peskri phagi

¹ T'mer menshe an o them Youda, t'maro čilačepen hi dren činlo an t'mare djia, oun ap kol shinga ap kol rhačepangre, kay t'mer firhen rhačrenn. Ko čilačepen hi yaake dren činlo, te nay krenn kova gar bouder krik, har te vas kova an o bar dren dino i sasteha, hoy les i diamantikro shero hi.

^2-3 Ninna lengre čave vitsrenn pen tele glan kol rhačepangren oun glan kol figuren, hoy sikrenn i debletsa Ashera, oun hoy le pre čivan tel kol zenele rouka, oun ap i tikne oun bare berge oun ap o them. Me dau t'maro tselo bravlepen oun kouč koova vavarende, te čorenn le kova t'mendar. Koya hi koy phagi ko čilačepaske, hoy t'mer an kava tselo them kran.

⁴ Oun t'mer hounte djan dran kava them, hoy dom t'men hako tsireske. Oun me krau, te venn t'mer boudepangre kolenge, kay rikrenn t'men tele an i them, kay prindjrenn gar. Miri rholi hi har i yag, hoy gar bouder vin djala.

⁵ O baro Devel penell: Praasedo vell ko morsh, kay moukell man, o baro Debles, oun rikrell pes ap i menshende, oun poučell lendar, te venn le ap leskri rig.

⁶ Yob hi har i soubyengri bour an o divyo trouk them, oun dikell kek lačepen an ko tsiro vella. Yob ačell an o moulo tato them, kay kek pani hi, oun či vavar bares vell, oun kek mensho djivell.

⁷ O Debleskri barht hi čiddo ap kol morsheste, kay rikrell pes ap o baro Debleste.

⁸ Kova hi har i rouk, kay pash o pani tardo hi, oun čivell peskre draba an o pani. Ninna te vell o baro tatepen, hi les kek traash. Leskre patria ačenn zenelo. Te vell i bersh, kay dell kek brishin, hounte vell les kek daar. Yob moukell gar tele, te hidjrell lo roukengre.

⁹ Koon nay prindjrell o mensheskro dji? Či hi yaake čilačo oun rhorheno har o mensheskro dji.

¹⁰ Me, o baro Devel prindjrau o mensheskro dji, oun dikau dour dren an kova, hoy an leste hi, oun dau hakeneste pal kova, hoy yob kras.

¹¹ Har i divyi karhni, kay beshell pes ap i yare, kay gar lakre hi, yaake djal koleske, kay lell peske bravlepen khetne rhorhepah. An o feteder tsiro nashrell lo peskro bravlepen, oun hi koy tardo har i narvelo.

¹² Maro Debleskro kheer hi har i rayeskri beshepaskri, pherdo o Debleskro raylepen, oun tardo ap i bari berga, yaake rah har lo koy hi.

¹³ Tou, baro Devel, hal kova, ap koleste i Israelitarya dikenn. Pral halauterende, kay moukan tout, vell ladj. Oun kolla, kay djan toutar krik, kolengre laba venn bistedo har te vans le činlo an i čik. Yon moukan tout, o baro Debles, kova, kay hi har i kvella, dran kolate djido pani vell.

O Yeremia dell gole

¹⁴ Kre man sasto, baro Devel, Te kreh man sasto, palle hom sasto. Le man vin dran i bibarht! Palle nay krell man kek či. Tou hal kova, kones sharau.

¹⁵ Yon penenn ap mande: Kay ačell kova, kolestar o baro Devel rakras? Mou vell kova pral mende!

¹⁶ Tou djineh, me homs lenge har i bakrengro, oun krom hoy mange penal. Me kamom gar, te vell bibarht pral lende. Lauter, hoy lenge penom, djineh tou.

¹⁷ Kameh tou man traashnes te krell? Pash toute vau me oun khatrau man ap o čilačo dives.

¹⁸ Mouk ladj pral kolende te vell, kay man palla lenn, oun gar pral mande! Yon hounte trashenn pen, oun gar me! Mouk ko dives te vell, kay vell koy bibarht ap lende! Oun phage len an kotya!

Rikrenn o Debleskro dives!

¹⁹ O baro Devel penas ap mande: Dja pash ko baro voudar o forestar, kay djan i bare raya pral Youda dren oun vin, oun ninna pash kol tsele vavar voudya o forestar Yerusalem,

²⁰ oun pen i menshenge: Shounenn, hoy o baro Devel penella, t'mer bare raya an Youda, oun t'mer lauter an Youda oun Yerusalem, kay djan an kal voudya dren oun vin!

²¹ O baro Devel penell: Denn t'men yak, te hidjrenn či ap o Debleskro dives dren an kol voudya o forestar Yerusalem.

²² Oun hidjrenn či ap o Debleskro dives dran t'mare khera. Oun boudrenn gar! Ko dives hi o Debleske. Rikrenn les yaake dren, har me kova t'mare phourenge penom.

²³ Yon shounan gar ap mande, oun dan gar yak ap mire laba, djan pal pengro shero, oun rikrenn pen gar ap kova, hoy lenge penom.

²⁴ Te shounenn t'mer kanna ap mande, penell o baro Devel, oun hidjrenn ap o Debleskro dives či dren an voudya kava forestar, oun rikrenn ko dives dren oun boudrenn gar ap ko dives,

²⁵ palle nay djan ninna bare raya dran o Davideskri familya dren an kava foreskre voudya, kay beshenn ap graya oun vourdya, yon oun vavar pralstoune, oun lauter, kay an Youda oun Yerusalem djivenna. Oun an kava foro djivenn hako tsiro menshe.

²⁶ Oun menshe venna dran kol forya o themestar Youda, oun dran i gaba troul Yerusalem, oun dran o them Benyamin oun dran kol tikne oun bare berge oun dran o them Negev. Oun yon anenn an o baro Debleskro kheer firhen rhačepaske oun rhapaske, djob oun kouč soungepaskro koova, oun vavar koova, koleha parkrenn le pen pash o baro Debleste.

²⁷ Te shounenn t'mer gar ap mande, oun djivenn ap o Debleskro dives har ap hako vavar dives, oun hidjrenn t'maro koova ap o Debleskro dives dren an kol voudya o forestar Yerusalem, palle čivau me yag an kol voudya, te rhačrenn i zorele khera pre an Yerusalem. Oun kek nay krell koy yag vin.