Jeremia 14 - O Debleskro Lab 2024 (Sinte-Manouche)

I bari bok, kourepen oun nasslepen venna

¹ O baro Devel penas ap o Yeremia pral ko them, kay i rah tsiro kek brishin das.

² O them Youda hi bibarhtelo koy čiddo. I menshe an i forya merenna i bokatar. Lenge hi ropaske oun yon beshenn pen ap i phoub. Oun an Yerusalem denn le i vasta pral o shero khetne.

³ Kol bravele bičrenn pengre boudepangren pal pani. Kolla djan pash i brounna, oun hatsenn kek pani. Lengre khore anenn le kek panyeha pale. Lenge hi ropaske, oun khatrenn pengro mouy i ladjatar.

⁴ I phoub hi trouk oun dell gole pal brishin. Doleske hi kol harhenge ropaske, oun khatrenn pengro mouy.

⁵ Ninna koy vesheskri groumni, kay las peskro ternepen, hatsell kek zenlepen, moukell peskro ternepen čiddo oun djal peske.

⁶ Kol divye bourike hi tardo ap nange berge, oun lenn pharo dourho, har divye djoukle, kay troushenna. Yon hatsenn kek zenlepen bouder, oun lengre yaka venn korelo.

⁷ Baro Devel, mari doosh hi glan mare yaka tardo. Boud kope djam toutar krik, oun shounam gar ap toute. Ab pale ap mari rig, te dikell hakeno, har kamlo hal!

⁸ Ap toute dikenn i Israelitarya, te vess ap lengri rig, oun leh len vin dran kay bibarht. Hoske kreh tou, har te vals i vi-themari an maro them, oun har yek, kay ačell yek rati oun djal palle doureder?

⁹ Hoske kreh tou, har te djinals gar, hoy te kress, har te vals i kourepaskro kek zoryah? Čačepah, baro Devel, tou hal pash mende. Mer ham tire menshe. Ma mouk men!

¹⁰ Yaake penas o baro Devel kal menshendar: Yon nashenn yek rigyatar ap i vavar, yaake har kamenn le. Doleske dikell o baro Devel gar lačes ap lende. Leske vell an o shero, havo čilačo koova yon kran. Oun lengri doshake dell yob len i phagi.

¹¹ Oun o baro Devel penas ap mande: Tou mangess gar kal menshenge, te vap lačes ap lende.

¹² Yon nay rikrenn pen pale o rhapastar, oun rovenn ap mande yaake boud har kamenn le, me shounau len gar. Ninna te rhačrenn yon mange firhen oun rhapen, dikau gar lačes ap lende. Me marau len an o kourepen, ninna i bok oun o nasslepen marenn le.

¹³ Koy penom me: Baro Devel, miro ray, tire rakepangre penan lenge: Kek kourepen oun kek bok vell pash t'mende. O baro Devel krell, te vell kek kourepen pash t'mende an kek tsiro.

¹⁴ O baro Devel penas ap mande: Kol rakepangre rakran rhorhepen an miro lab. Me bičrom len gar. Oun me penom lenge či, hoy te krenn le, oun rakrom lentsa vitar gar. Yon rakrenn pral kova, hoy dikan le, – kova vas gar mandar. Oun kova, hoy le glan-vi penan, hi rhorhepen oun dourkepen, oun hi či moldo oun vell dran lengre djia.

¹⁵ Kova hi, hoy me, o baro Devel, krau ap kol rakepangre, kay penenn, te rakrenn le an miro lab, ninna te bičrom len gar. Yon penenn ninna, te vell kek kourepen oun kek bok an kava them. Save rakepangre hounte merenn an o kourepen oun i bokatar.

¹⁶ Yaake djal ninna kol menshenge, kay shounenn ap lende. Yon hi moulo čiddo ap i dromma an Yerusalem. I bok oun o rharo maras len. Oun kek paskrell len, lengre romyen oun lengre čaven. Me anau čilačepen pral lende, yaake har yon čilačepen kran.

¹⁷ Oun tou peness lenge kal laba: Me rovau ap o dives oun ap i rati, oun nay moukau gar tele. Mire menshe, kolen kamau har miri čay, hi khetne dino, oun lengro doukepen vell gar bouder sasto.

¹⁸ Djau me vin ap o them, dikau me menshen, kay peran an o kourepen. Vau me an o foro, hi koy menshe čiddo, kay meran i bokatar. Ninna Debleskre rakepangre oun rashaya nashenn trouyel an o them, oun djinenn gar, hoy te krenn.

¹⁹ Dal tou kol menshen an Youda pre? Kameh tou o forestar Sion či bouder djinell? Hoske dal tou men yaake, kay nay krell men kek bouder sasto? Mer patsam, kay vell lauter mishto. Či vas mishto! Mer kamam, te vell i tsiro, kay kova, hoy an mende nasselo hi, sasto vals. Kova vas gar. I daar vas.

²⁰ Baro Devel, mer dikah dren, kay djivam gar touha, oun mare phoure čilačepen kran. Mer lam doosh ap mende glan toute.

²¹ Biče men gar toutar krik, te vell gar djoungeles rakedo pral toute! Mouk kek te sal pral Yerusalem, kay tiri rayli beshepaskri tardo hi! Ma biste, hoy tou mentsa vin kral, oun le tire laba gar pale!

²² Kek devel, koles i menshe an vavar themma an-mangenna, nay bičrell brishin! Vitar gar dell o bolepen dran peste brishin! Na-a, maro baro Devel, tou hal kova, kay krell savo koova. Doleske dikah ap toute.