Jeremia 11 - O Debleskro Lab 2024 (Sinte-Manouche)

I menshe an Youda rikran gar dren, hoy lengre phoure o Debleske sovel dan

¹ O baro Devel rakras ap o Yeremia oun penas:

² Rake kol menshentsa dran Youda oun kol menshentsa dran Yerusalem, oun pen lenge: Rikrenn, hoy t'mentsa vin krom!

³ Pen lenge: O baro Devel, kay hi o Israeleskro Devel, penell: Bibarht vell pral hakeneste t'mendar, kay rikrell gar kol laba, hoy me t'mentsa vin krom.

⁴ Har me t'mare phouren dran o them Egiptia lom, har dran i sasterno yagakro bob, krom me lentsa vin, te shounenn le ap mande, oun krenn har lenge penom, palle hi yon mire menshe, oun me hom lengro Devel.

⁵ Palle rikrap nay koy sovel dren, hoy dom len, oun dap len ko them, kay thoud oun gvin nashenna, yaake har kova kay dives hi. Me penom: Ava, baro Devel, yaake hi kova.

⁶ Oun o baro Devel penas ap mande: Dja an kol forya an o them Youda, oun ap kol dromma an o foro Yerusalem, oun pen: Shounenn kol laba, hoy me t'mentsa vi-krom, oun krenn kova ninna!

⁷ Me dom t'mare phouren trad ap ko dives, har anom len dran Egiptia vin, bis ap kava dives, oun penom lenge pale te pale: Shounenn ap miro rakepen!

⁸ Yon shounan gar ap mande, oun dan gar yak ap mire laba. Hakeno djas pal peskro shero, oun kras kova, hoy leskro midjak dji leske penas. Me penom lenge, te hounte rikrenn le dren, hoy lentsa vin krom. Kova kran le gar. Doleske moukom pral lende koy tseli bibarht te vell.

⁹ Oun o baro Devel penas ap mande: Me djinau, kay hadan pen kol menshe an o them Youda oun an o foro Yerusalem pral mande.

¹⁰ Yon krenn savo čilačo koova har lengre phoure kran, kay glan lende his, oun kaman ap mire laba vitar gar te shounell, oun nashan kol vavar deblen palla oun mangan len an. Yaake rikran kol menshe dran o kheer Israel oun dran o kheer Youda kol laba gar dren, hoy krom lengre phourentsa vin.

¹¹ Doleske penell o baro Devel: Me anau bibarht pral lende, kolatar nay nashenn le gar krik. Yon denn pal mande gole, oun me kamau len gar te shounell.

¹² Palle denn kol menshe an o them Youda oun an Yerusalem gole pal kol deblende, kay rhačran yon lenge soungepaskro koova. Kal debla nay hayvenn len gar dran lengri bibarht vin te anell.

¹³ Yaake boud forya t'men hi, yaake boud deblen hi t'men, t'mer menshe an Youda. Oun yaake boud dromma an Yerusalem hi, yaake boud rhačepangre kran t'mer, kay rhačrenn firhen o djoungelo debleske Baal.

¹⁴ Tou Yeremia, mangess gar kal menshenge, oun rovess gar kolenge glan mande! Te denn yon gole pal mande an koy pharo tsiro, kamau me len gar te shounell.

¹⁵ Kal menshe, kay len kamau, hoy krenn le an miro kheer? Yon krenn čilačepen oun penenna: Koy doosh, hoy ap mende anam, vell mendar krik lino, te dah mer sovel, te anah o Debleske firhen. Oun te krenn yon djoungelo koova, hi le barhtelo koy pral.

¹⁶ His i tsiro, kay penas o baro Devel t'mendar: Yon hi har i shoukar zenelo djeteskro rouk, kay boud djeteskre drake baro venna. Kanna čivas yob ap leste i yag, hoy bari golyah leskre patria rhačrell oun leskre kashta phagell.

¹⁷ Me, o baro Devel, ko ray pral o bolepen oun i phoub, krom dran o kheer Israel oun dran o kheer Youda i natsyona. Oun yon kran čilačo koova oun rhoyran man, har rhačran le firhen o debleske Baal. Doleske dau len trad, te vell bari bibarht pral lende.

I menshe dran Anatot kamenn o Yeremiyeske čilačepen te krell

¹⁸ O baro Devel penas mange, hoy len glan hi, te djinap me kova.

¹⁹ Me homs har i terno bakro, kay djinell gar, te vell lo kote anlo, kay vell lo maredo. Yaake djinom gar, kay rakran le khetne, har te krenn le mange čilačepen. Yon penan mandar, har te voms i rouk: Mer dah ko rouk tele, yaake rah har hi lo sasto. Maras les, te vell lo bistedo!

²⁰ Koy penom: Baro Devel, tou ray pral o bolepen oun i phoub, djineh, hoy an o mensheskro dji oun shero glan djala. Tou hal i čačepaskro, kay djal pal o čačepen. An tire vasta dau miro koova. Mouk man dikell, har tou len ko čilačepen pale deh, hoy yon kamenn mange te krell.

^21-22 I menshe an Anatot kaman man moulo te dell, oun penan mange: Mouk tele, te rakress, hoy o baro Devel touke penas, te kameh gar, te maras tout mare vastentsa! Doleske penell o baro Devel, ko ray pral o bolepen oun i phoub: Me kamau kol menshen an Anatot i phagi te dell: Lengre terne morsha venn o rhareha moulo dino, oun lengre čave oun ča hounte merenn i bokatar.

²³ An ko bersh, kay dau i menshende an Anatot i phagi, oun anau i bibarht pral lende, ačell kek lendar djido.