Jeremia 10 - O Debleskro Lab 2024 (Sinte-Manouche)

O čačo Devel oun i rhorhene debla

¹ T'mer Israelitarya, shounenn, hoy o baro Devel t'menge penella!

² Kova penell o baro Devel: Ma djan i dromma, hoy i menshe an vavar themma djana! Yon darenn glan o sikepen, hoy krenn i momlia ap o bolepen. T'mer hounte darenn kova gar.

³ Lengro patsepen ap i moule deblende hi či moldo. Yon denn i rouk tele an o veesh, te krenn le i figura. Oun kova, kay hayvell o kashteha te boudrell, lell peskri čouri, oun krell dran o kasht i figura peskre vastentsa.

⁴ Palle čivell lo roup oun sonakay koy pre, oun čivell koy figura ap pire, dell nagle an late, te ačell li nay tardo.

⁵ Save debla hi či vavar har kol figure, hoy i harhe ap pengro kotar phoub čivenn, kay zenlepen bares vell, te tradenn le i čirklen krik. Yon nay rakrenn gar, vitar gar nay djan le, yaake hounte venn yon hidjedo. Doleske hounte trashenn t'mer lendar gar. Yon nay krenn kekeske čilačepen, vitar kek lačepen.

⁶ Baro Devel, kek hi har tou hal! Tou hal baro oun zorelo! Oun tiri bari zoor dikan i menshe.

⁷ Hakeno hounte trashell toutar oun hounte hadell tout. Tou hal o baro ray pral i themma! Ap toute hounte shounenn le. Mashkral kol tsele gosevende oun bare rayende ap kay phoub hi kek yaake har tou hal.

⁸ Lauter hi yon dinelo oun narvelo, kolla, kay mangenn o kasht an. Kol debla nay sikrenn lende či.

⁹ Yon hi kerdo menshendar, kay hayvenn mishto pengre vastentsa te boudrell. Rupeno saster dran o them Tarsis oun sonakay dran o foro Oufas tserdenn le pral kol figuren, oun rivenn len an blaueto oun lolo ripya.

¹⁰ O baro Devel hi o čačo Devel, ko djido Devel, kay hako tsireske o baro ray ačell. Te vell yob rhoyedo, trissell i phoub, oun i menshe nay rikrenn leskri rholi gar vin.

¹¹ Pen lenge: Kol deblenge, kay kran gar o bolepen, vitar gar i phoub, hi kek platsa ap kay phoub oun tel o bolepen, oun nay ačenn gar.

¹² Yob, o baro Devel, kras i phoub peskri zoryah. Dran peskro gosvepen čivas lo i phoub zoreles tardo, oun kras o bolepen koy pral.

¹³ Te dell yob gole, vell boud pani khetne an o bolepen; i volke moukell yob te vell foun doural, oun moukell yag pral oun tele karye te dell an o brishin. Ninna o phourdepen vell vin dran peskro kheer.

¹⁴ Glan sau baro koova hi hako mensho dineles koy tardo. Savo koova nay hayvell lo gar te krell. Kolla lauter, kay kran figure, te mangenn le len an, hounte ladjenna pen. Lengre figure hi kek čače debla, kek djipen hi an lende.

¹⁵ Yon molenn či, oun hi sapaske. An ko tsiro, kay rakrell o baro Devel o čačepen vin, hounte djan yon tele.

¹⁶ Har vavarčandes hi ko Devel, koles o Yakobeskre čave an-mangenna! Yob hi kova, kay kras halauter. Oun i Israelitarya hi leskre menshe. Yob kharell: o baro Devel, ko ray pral o bolepen oun i phoub.

I bibarht vell sik

¹⁷ Le tiro koova khetne, Yerusalem! I lourde hi troul toute tardo ap hake rigya.

¹⁸ O baro Devel penell: Kava kopo kamau me kal menshen krik tradell dran lengro them, te venn yon an i traash, oun lenn bare douka.

¹⁹ Ah, har doukell man miro dji! Miro doukepen kamell gar sasto te vell. Patsom, kova hi har i nasslepen oun me rikrap kova vin.

²⁰ Miro plarhteno kheer vas paash dino, oun mire shelle hi an kotya činlo. Mire čave djan mandar krik, oun hi gar bouder koy. Kek čivell miro kheer pale pre, kek čivell i plarhta koy pral.

²¹ Kol pralstoune his dinele, oun poučan gar pal o baro Debleste. Doleske his lauter čičeske, hoy yon kran. Oun kolla, kay denn yon garda pre, hi bouder gar khetne, oun djan kate te kote.

²² Shounenn, hoy gole dino vell! Bari gole – har kourepangre vourdyendar – vell dran ko them, hoy kote čiddo hi, kay norden hi. Lourde venna oun krenn i forya an Youda yaake paash, te vell o them i moulo them, kay djivenn i divye djoukle dren.

²³ Baro Devel, me djinau, kova, hoy pral i mensheste vella, hi gar an ko mensheskro vast čiddo. Kova hi gar yob, kay krell peskro djipah, hoy yob kamella.

²⁴ Baro Devel, de man i phagi an o čačepen, oun gar an tiri rholi, te maress man gar!

²⁵ Tiri rholi mouk te vell pral kol menshende, kay kamenn toutar či djinell, pral kolende, kay tout gar sharenn! Har divye firhe vavar firhen rhan, yaake rhan yon o Yakobeskre menshen pre, bis te bouder či pral ačas, Oun dran leskro them kran yon i moulo them.