Jakobo 5 - O Debleskro Lab 2024 (Sinte-Manouche)

I bibarht vella pral i bravelende

¹ Kanna penau ap t'mende, kay bravelo han: Rovenn oun denn gole pral koy bibarht, hoy pral t'mende vella!

² T'mer nashrenn t'maro bravlepen. Oun t'mare ripya rhan i kirme.

³ T'maro sonakay oun roup molell bouder či. T'mer rikran les t'menge. Kova anell t'men glan o čačepaskro ray oun rhal t'men pre har i yag. I phoub ačell bouder gar rah. Ninna te djinan kova, anan t'menge boud bravlepen khetne!

⁴ Shounenn! T'mer rhorhran t'mare boudepangren, kay boudran ap t'maro them, oun dan len kek love. Kolla denn gole ap o bolepen. Lengri gole shounell o Devel, ko ray pral o bolepen oun i phoub.

⁵ T'menge djas mishto ap kay phoub, t'mer rhan oun piyan, oun van pesso, yaake har i firhe, kay venn maredo.

⁶ Koles, kay his kek doosh ap leste, anan t'mer glan i čačepangre, te vell lo moulo dino. Kova kamas pes gar t'mentsa te čingrell.

Ačenn zoreles an o patsepen!

⁷ Mire phrala, dikenn ap o dives, kay vell maro ray Yezous pale, oun avenn gar khino an t'mare djia, yaake har i harho dikell ap ko dives, kay peskro kouč djob bares vas. Yob djinell, o brishin hounte vell oun krell i phoub sapeno, oun pal i tsiro hounte dell pale brishin, te vell o djob bares. O tselo tsiro vell o harho gar khino an peskro dji.

⁸ Ninna t'mer, ma avenn khino an t'mare djia! Ačenn zoreles an o patsepen! Hi bouder gar rah, kay vell maro ray Yezous pale.

⁹ Mire phrala, ma rakrenn rhoyemen yek pral o vavareste, te lenn kek phagi o Deblestar! O Devel, kay rakrell o čačepen vin pral i menshende, hi kanna glan o voudar tardo.

¹⁰ Mire phrala, dikenn ap o Debleskre rakepangre, kay penan i menshenge o Debleskro lab. Yon van gar khino an lengre djia, ninna gar, har van boud douka ap lende. Avenn har yon!

¹¹ Kolla hi čačepah barhtelo, kay rikran zoreles ap o Debleste. T'mer shounan, har rikras pes o Hiob zoreles ap o Debleste, oun t'mer djinenna, havo bravlepen o Devel les lauter das. O Debles hi i baro dji i menshenge oun hi lenge lačes.

¹² Mire phrala, ma denn t'men sovel, gar ap o bolepen, vitar gar ap i phoub oun vitar gar ap vavar koova. Te penenn t'mer: “Ava,” yaake hounte vell kova ninna ava. Oun te penenn t'mer: “Na-a,” yaake hounte vell kova ninna na-a, te lenn kek phagi o Deblestar.

Mangenn o Debles!

¹³ Te hi yekes t'mendar i pharo tsiro, penell lo o Debleske, hoy leske phares hi! Te hi yek barhtelo, givell lo o Debleske gilya!

¹⁴ Te hi yek t'mendar nasselo, kharell lo kolen, kay hi i phoureder mank i patslende, te mangenn le o Debles leske, oun te makenn le les o djeteha dren an o Yezouseskro lab.

¹⁵ Te mangenn i phoureder o Debles oun patsenn ap leskri zoor, vell ko nasselo sasto. Oun o Devel krell les pale zoreles. Te hi doosh ap leste, palle lell o Devel koy doosh lestar.

¹⁶ Doleske penenn t'menge t'mari doosh, oun mangenn o Debles yek o vavareske, te venn t'mer sasto. I mensho, kay djivell yaake, har o Devel kamella, yob te mangell i tselo djiyeha čomone o Deblestar, nay krell o Devel boud leske.

¹⁷ O Eliya his i mensho har mer. Yob mangas o Deblestar, te dell kek brishin. Oun koy das kek brishin ap i phoub triin bersha oun shob čon.

¹⁸ Oun yob mangas o Debles pale. Oun koy das brishin. Oun lauter vas zenelo oun baro ap i phoub.

¹⁹ Mire phrala, djinenn: Te peras yek t'mendar o čačo dromestar tele, oun yek vavar anell les pale ap o čačo drom,

²⁰ palle las kava les dran o merepen vin, te djal yob gar nashedo. Oun leskri boud doosh hi lestar krik lino.