Jakobo 3 - O Debleskro Lab 2024 (Sinte-Manouche)

I čip

¹ Mire phrala, hi gar mishto, te venn boud t'mendar sikepangre. T'mer djinenna, kay o Devel rakrell o čačepen pral i menshende vin. Ap ko tsiro dikell lo ap kol sikepangren boudeder har ap kol vavarende.

² Mer halauter krah boud kope, hoy gar mishto hi. Koon rakrell an kek tsiro čilačo koova, kova hi i lačo mensho, kay nay rikrell pes khetne.

³ Dikenn ap i graya! Te čivah mer lenge ko kotar saster an o mouy, yaake nay anah mer len kote, kay mer kamah.

⁴ Dikenn ninna ap kol bare shiffe, kolen i zorelo dourho pral o baro pani tradell. Lengro ray anell len o tikno kashteha kote, kay yob kamella.

⁵ Yaake hi ninna mari čip tikno oun krell nay bare laba. T'mer djinenna, i tikni yag nay rhačrell i tselo veesh tele.

⁶ I čip hi har i yag. Lat hi i zoor, te krell li boud čilačo koova. I čip nay krell o tselo menshes djoungeles oun čilačes. Koy yag, hoy i čip krell, rhačrell o tselo djipen, oun vell o bengestar.

⁷ I menshe hi i raya pral i tsele divye firhende, ninna pral i čirkle, pral i bare sapa oun pral i bare mače. Oun kolla hounte krenn, hoy i menshe kamenna.

⁸ Kek mensho hi o ray pral peskri čip. I čip hi divyo oun čilačo. I čip hi har i midjak sap, hoy anell o merepen.

⁹ I čipyah sharah mer o Debles, kay hi maro ray oun dad. Oun i čipyah praasah mer i menshen, kay o Devel kras yaake har yob hi.

¹⁰ Dran ko emligo mouy vella sharepen oun praasepen. Kova hi gar mishto, mire phrala!

¹¹ Dran yek pani nay vell gar yek kopo lačo pani oun o vavar kopo londo pani.

¹² Mire phrala, i rouk, hoy hidjrella phabya, nay hidjrell kek brola. I rouk, kay hidjrell drake, nay hidjrell kek kiryasse. Yaake nay vell kek londo pani dran o lačo pani vin.

O gosvepen, hoy vella o Deblestar

¹³ Koon gosevo hi mank t'mende oun djinell boud, kova hounte sikrell dran peskro lačo djipen, kay hayvas lo, hoy mishto oun čačo hi. Oun yob sharell pes gar pral ko lačo koova, hoy yob kras.

¹⁴ Te zilverenn t'mer oun hadenn t'men pre pral i vavarende, ma penenn, kay han gosevo! Kova vals i rhorhepen oun gar o čačepen.

¹⁵ Savo gosvepen vell gar o Deblestar. Kova vell o menshestar oun o bengestar.

¹⁶ Kote, kay i menshe zilverenna, oun hadenn pen pre pral i vavarende, kote hi čingepen oun hako čilačo koova.

¹⁷ Ko gosvepen, hoy o Deblestar vella, hi vavarčandes. I mensho, kay hi les kava gosvepen, kova djivell i djoudjo djipen. Yob kamell te djivell lo lačes i vavarentsa khetne. Yob hi kamlo oun lačo. Les hi i dji i vavarenge, oun krell boud lačo koova. Yob moukell pes gar ap yekeskri rig te tserdell. Les hi gar douy čipya.

¹⁸ Kolla, kay lenn o čingepen mank i menshende krik, kolendar vell lačo koova, kay ačell hako tsiro.