Jakobo 2 - O Debleskro Lab 2024 (Sinte-Manouche)

I bravele hi gar boudeder moldo har i čorvele

¹ Mire phrala, t'mer patsenn ap maro rayeste, o Yezous Kristeste. Yob hi o ray pral i tsele rayende. Doleske, ma dikenn ap i menshende, koon yon hi, oun har bravelo yon hi!

² Hoy krans t'mer, te vals yek pash t'mende an i kangri, oun les vals i sonakaskri goustri ap peskro vast oun rayle ripya ap peste, oun koy vals ninna i čorvelo an čorvele ripya dren?

³ Oun t'mer penans ap koleste, kay raylo rido hi: “Besh tout kay ap ko shoukar beshepaskro,” oun ap ko čorveleste penans: “Ač koy tardo! Tou nay besheh tout ninna ap kay phoub!”

⁴ Kova vals yaake, har te penans: “Ko raylo hi feteder har ko čorvelo.” Te dikenn t'mer yaake ap t'mare phralende, hi kova čilačo.

⁵ Shounenn, mire kamle phrala! O Devel rodas kolen vin, kay hi čorvelo ap kay phoub, te venn le bravelo an o patsepen. Ko tsiro vella, kay djivenn le leha khetne an o bolepen oun lenn leskro bravlepen. Kova lenna kolla, kay kamenn les o djiyestar. Yaake penas les o Devel.

⁶ Har hi kova pash t'mende? I čorvele hi t'menge či moldo. I bravele hi t'menge boudeder moldo. Oun yon hi kolla, kay rikrenn t'men tele, oun anenn čilačo koova ap t'mende oun anenn t'men glan i čačepangre.

⁷ Oun pral koleste, koon t'maro ray hi, rakrenn le djoungeles.

⁸ O Yezous Kristo hi maro baro ray oun penell menge: Tou hounte vess yaake lačes ap o vavareste har hal lačo ap toute kokres! Yaake hi činlo an o Debleskro lab. Te djivenn yaake, palle krenn t'mer, hoy mishto hi.

⁹ T'mer te dikenn ap yekeste, koon yob hi oun har bravelo yob hi, palle lenn t'mer doosh ap t'mende. Oun o Debleskro lab penell t'menge, kay moukan t'mer o Debleskro drom.

¹⁰ Te rikreh tout ap i tsele laba, hoy an o Moseskre lila činlo hi, oun te kreh tou yek čilačo koova, palle hi kova, har te rikrals tou tout ap či, oun tou leh doosh ap toute.

¹¹ O Devel penella: Romeha, ma rhorhe tiri romyat i vavar djouvyah! Romniya, ma rhorhe tiro romes i vavar morsheha! Oun yob penell ninna: Ma mare kekes! Tou te rhorheh gar tiri romyat, oun tou mareh yekes, palle moukal tou o Debleskro drom.

¹² Rakrenn oun djivenn pal o Debleskro čačepen! Kava čačepen lell i menshen dran kova vin, hoy len pandas.

¹³ Ma bistrenn! Vell yek dives, kay rakrell o Devel o čačepen vin pral t'mende. Te hi yekes kek dji i vavareske, koleske hi o Debles vitar kek dji. Kones hi i dji i vavarenge, koles hounte vell kek daar ap ko dives, kay rakrell o Devel o čačepen pral i menshende vin.

O patsepen kokres hi gar doha

¹⁴ Mire phrala, te penell yek, kay yob ap o Yezous Kristeste patsella, oun krell či leske, koleskro patsepen hi či moldo ap ko dives, kay yob glan o Debleste tardo hi.

¹⁵ Hoy molell kova, te vell pash t'mende i phraal, i pheen, kay hi len gar doha ripaske, rhapaske oun pipaske,

¹⁶ oun t'mer denn len gar, hoy len hounte vell djipaske? Palle hi lenge či moldo, te penell yek ap lende: “O Devel hi t'mentsa. Yob dell t'men rhapaske oun ripaske.”

¹⁷ Čačepah, te krenn t'mer kek lačo koova, hi t'maro patsepen moulo.

¹⁸ Kanna nay vell yek, kay penella: “Yekes hi patsepen oun i vavar krell lačo koova.” Koleske penau me: Sike mande o patsepen kolestar, kay krell kek lačo koova. Miro patsepen sikrau toute dran kova, hoy me krau.

¹⁹ Tou patseh, kay dell yek Devel kokres. Mishto, kre kova! Ninna kol benga patsenn kova oun trashenna.

²⁰ Hoske hayveh tou kova gar? Dikeh tou gar, kay o patsepen ap o Debleste či molella, te kreh tou gar, hoy yob kamella?

²¹ Ninna pash maro phouro dadeste, o Abrahameste, his kova yaake: Yob vas lačo oun čačo glan o Debleste, har yob kras, hoy o Devel lestar kamas: Yob čivas peskro čaves ap i pre-čidde barra, te marell lo les o Debleske.

²² Tou dikeh, har yob kras, hoy o Devel lestar kamas, koy sikras lo, kay leskro patsepen ap o Debleste baro his.

²³ Kote vas čačo, hoy an o Debleskro lab činlo hi: O Abraham patsas o Debles. Doleske čivas les o Devel an o čačepen glan peste. Ninna i menshe penan lestar, kay hi yob o Debleskro maal.

²⁴ T'mer dikenn kanna, o patsepen kokres hi gar doha. O mensho hounte krell ninna, hoy o Devel kamella, te vell lo čačo oun erligo glan leste.

²⁵ Ninna koy loubni Rahab vas čačo oun erligo glan o Debleste, har yoy ko lačo koova kras. Yoy phoukras gar ap kol douy bičepangre dran Israel, kay van an lakro foro, te dikenn le, har zorelo o foro hi. Yoy khatras len, oun anas len ap i vavar drom dran ko foro vin.

²⁶ Yaake har o mensho moulo hi, te hi les kek dourho, yaake hi maro patsepen moulo, te krah kek lačo koova.