Hosea 9 - O Debleskro Lab 2024 (Sinte-Manouche)

I bibarht vell pral i Israelitarya

¹ Ma de gole i barhtyatar, Israel, har i menshe an vavar themma krenna! Tiro Deblestar djal tou krik oun vavar deblenge palla. Tou bikreh tout ap lende ap haki platsa, kay o djob vin dino vella.

² Doleske vell yaake, te hi t'men bouder gar doha djob, vitar gar doha djet. Ninna dell bouder kek nevi mool.

³ T'mer ačenn gar an o them, hoy o baro Devel t'men das. I menshe dran o them Efrayim hounte djan pale an o them Egiptia, ninna an o them Assour. Kote hounte rhan le savo koova, hoy pale-čiddo hi.

⁴ Kote nay anenn le kek mool o baro Debleske. Oun ap kol firhe, hoy le leske marenn, dikell lo gar lačes. O rhapen, hoy le kote rhan, hi pale-čiddo, oun krell hakenes pale-čiddo, hoy kova rhal – yaake har ko maro, hoy an i kheer hi, kay yek meras. Lengro maro nay rhan le pash pende kokres, oun nay anenn či an o baro Debleskro kheer.

⁵ Hoy kamenn t'mer palle te krell an kol bare divessa, kay venn khetne te sharenn o baro Debles?

⁶ Dran t'maro them, hoy paash kerdo hi, hounte djan t'menge krik. O them Egiptia lell t'men pash peste pre, oun an o foro Memfis venn t'mer paskedo. Kote, kay kanna t'maro kouč roup hi, vell soubyengro zenlepen baro, oun soubyengre bourra venn baro an t'mare khera.

⁷ O tsiro hi koy, kay me t'menge t'mari phagi dau, oun t'maro čilačepen ap t'mare sherya pale anau. Oun t'mer Israelitarya hayvenn kova! T'mer penenn: “I narvelo hi ko Debleskro rakepaskro! Ko morsh, koles o Debleskro dourho hi, rakrell dinelo koova!” Yaake baro hi t'mari doosh oun t'mari rholi ap mande!

⁸ Miro Devel bičras man, leskro rakepaskres, te dap yak ap t'mende an o them Efrayim. Oun t'mer čivenn i netsa vin ap mire tsele dromma, te taprenn man har i čirkles. Ninna an o kheer miro Deblestar lenn t'mer man palla.

⁹ T'maro čilačo koova, hoy krenn, hi yaake djoungelo har kova, hoy vas kerdo an o foro Gibea glan i rah tsiro. Doleske bistrell o baro Devel gar t'mari doosh oun dell t'men t'mari phagi.

¹⁰ O baro Devel penell: I Israelitarya his mange har drake an o moulo them, har hatsom len kote. Oun t'mare phoure his mange har neve fayge ap i faygetikro rouk. I tsiro koy pre, har van le pash i berga Peor, dan le pen o vi-ladjedo debleske Baal koy, oun van yaake pale-čiddo har ko devel, kones yon kaman.

¹¹ Efrayim, tiro raylepen djal peske, har i čirklo peske djal. I djouvya venn bouder gar vavarčandes, oun anenn bouder kek čaven ap i phoub.

¹² Ninna te tserdenn le pengre čaven bares, lau len lendar pale krik. Kek lendar ačell djido. Havi bibarht vell pral lende, me te tserdau man lendar krik!

¹³ Har me dikom o Efrayimes, his lo har i terni palma, tardo ap shoukar zenlepen. Kanna hounte dell lo peskre čaven an i vasta kolendar, kay marenn len.

¹⁴ Baro Devel, hoy te poučap toutar, te dess lende? Kre, te nay venn i djouvya bouder gar vavarčandes, oun nay denn bouder kek čavo i čouči.

¹⁵ O baro Devel penell: Lengro tselo čilačepen krenn le kote pash o foro Gilgal; kote rhoyrom man pral lende ko tselo čilačepaske, hoy yon kran. Doleske tradau me len dran miro kheer vin. Me kamau len bouder gar. Lengre tsele pralstoune moukenn pen či mandar te penell.

¹⁶ O Efrayim hi har i moulo rouk. Leskre draba, len hi kek pani. Oun roukengre venn gar bares ap leste. Te lenn i djouvya ninna čave, me marau len, kolen yon pengro djiyestar kamenna.

¹⁷ I menshe Efrayim shounan gar ap miro Debleste. Doleske vitsrell lo len pestar krik. Yon venn naashepangre an i vavar themma.